Nghena endzeni

Hundzela eka leswi nga endzeni

 XIHLOKO LEXI DYONDZIWAKA 42

Yehovha A Nga Ku Endla Xin’wana Ni Xin’wana Lexi A Xi Lavaka Hi Ndlela Yihi?

Yehovha A Nga Ku Endla Xin’wana Ni Xin’wana Lexi A Xi Lavaka Hi Ndlela Yihi?

“Xikwembu . . . xi tirha endzeni ka n’wina leswaku mi va ni matimba ya ku rhandza ni ku endla.”—FILP. 2:13.

RISIMU 104 Nyiko Ya Xikwembu Ya Moya Lowo Kwetsima

LESWI HI NGA TA SWI DYONDZA *

1. Yehovha a nga endla yini leswaku a hetisisa xikongomelo xakwe?

YEHOVHA a nga tiendla nchumu wun’wana ni wun’wana leswaku a hetisisa xikongomelo xakwe. Hi xikombiso, ku ni swilo swo tala swinene leswi Yehovha a swi endlaka, swin’wana swa swona hi leswi landzelaka: i Mudyondzisi, Muchaveleri ni Muchumayeri wa mahungu lamanene. (Esa. 48:17; 2 Kor. 7:6; Gal. 3:8) Hambiswiritano, mikarhi yo tala u tirhisa vanhu leswaku a hetisisa swikongomelo swakwe. (Mat. 24:14; 28:19, 20; 2 Kor. 1:3, 4) Nakambe, Yehovha a nga nyika un’wana ni un’wana wa hina vutlhari ni matimba yo endla xin’wana ni xin’wana leswaku a hetisisa xikongomelo xakwe. Leswi swi fambisana kahle ni nhlamuselo ya vito ra Yehovha, hilaha swidyondzi swo tala swi ri twisisaka hakona.

2. (a) Hikwalaho ka yini mikarhi yin’wana hi kanakana leswaku Yehovha wa hi tirhisa? (b) Hi ta bula hi yini eka nhlokomhaka leyi?

2 Hinkwerhu ha swi lava ku tirhisiwa hi Yehovha kambe van’wana va kanakana leswaku wa va tirhisa. Hikwalaho ka yini? Va tibyela leswaku a va nge swi koti ku n’wi tirhela hilaha ku faneleke hikwalaho ka malembe, swiyimo kumbe vuswikoti bya vona. Kasi van’wana va titwa va enerisekile hi leswi va swi endlaka sweswi naswona a va voni ku ri na xivangelo xo endla leswi engetelekeke. Eka nhlokomhaka leyi, hi ta bula hi ndlela leyi Yehovha a nga xi hetisisaka ha yona xikongomelo xakwe hi ku tirhisa un’wana ni un’wana wa hina. Hi ta tlhela hi kambisisa rungula ra le Bibeleni,  leri vulavulaka hi ndlela leyi Yehovha a nyikeke malandza yakwe ya xinuna ni ya xisati matimba ya ku endla ku rhandza kakwe. Hi ta gimeta hi ku kambisisa ndlela leyi hi nga pfumelelaka Yehovha ha yona leswaku a hi tirhisa.

NDLELA LEYI YEHOVHA A HI PFUNAKA HA YONA

3. Hi ku ya hi Vafilipiya 2:13, Yehovha u ta hi nyika matimba ya ku rhandza hi ndlela yihi?

3 Hlaya Vafilipiya 2:13. * Yehovha a nga hi nyika matimba ya ku rhandza. Njhani? A hi nge hi twa leswaku ku ni xilaveko xo karhi evandlheni ra ka hina. Kumbe hi twe vakulu va hlaya papila leri humaka erhavini leri vulaka leswaku ku ni xilaveko evandlheni ro karhi. Hi nga ha tivutisa leswi, ‘Ndzi nga pfuna njhani?’ Loko hi nyikiwe ntirho wo tika, hi nga ha tivutisa loko hi ta swi kota ku wu endla. Endzhaku ko hlaya rungula ro karhi eBibeleni, hi nga ha tivutisa leswi, ‘Ndzi nga ri tirhisa njhani rungula leri leswaku ndzi pfuna van’wana?’ Yehovha a nge hi sindzisi ku endla swilo swo karhi. Kambe loko a vona leswaku ha swi lava hakunene, u ta hi nyika matimba yo rhandza ni ya ku endla leswi hi swi navelaka.

4. Yehovha u ta hi nyika matimba yo endla swo karhi hi ndlela yihi?

4 Nakambe Yehovha a nga hi nyika matimba yo endla swo karhi. (Esa. 40:29) A nga hi nyika moya wakwe lowo kwetsima leswaku wu hi pfuna ku antswisa vuswikoti bya hina. (Eks. 35:30-35) Hi ku tirhisa nhlengeletano yakwe, Yehovha a nga hi dyondzisa ku endla mitirho yo karhi. Loko u vona onge a wu nge swi koti ku endla ntirho wo karhi, kombela mpfuno. Titwe u ntshunxekile ku kombela “matimba lama tlulaka lama tolovelekeke” eka Tata wa hina wa le tilweni. (2 Kor. 4:7; Luka 11:13) EBibeleni ku ni swikombiso swo tala swa vavanuna ni vavasati lava Yehovha a va nyikeke matimba ya ku rhandza ni ku endla swo karhi. Loko hi ri karhi hi dyondza hi van’wana va vona, ehleketa hi tindlela leti Yehovha na wena a nga ku tirhisaka ha tona hi ndlela leyi fanaka.

NDLELA LEYI VAVANUNA VA PFUNIWEKE HA YONA

5. Hi dyondza yini eka ndlela leyi Yehovha a tirhiseke Muxe ha yona leswaku a kutsula vanhu vakwe?

5 Yehovha u endle leswaku Muxe a va mukutsuri wa Vaisrayele. Kambe Yehovha u n’wi tirhise rini? Xana a ku ri hi nkarhi lowu Muxe a tivona a faneleka hikwalaho ka leswi a “leteriwe hi vutlhari bya Vaegipta”? (Mint. 7:22-25) Doo, Yehovha u tirhise Muxe endzhaku ka loko a n’wi dyondzise ku titsongahata ni ku va munhu wo rhula. (Mint. 7:30, 34-36) Yehovha u nyike Muxe xivindzi xo vulavurisana ni hosi leyi a yi chaviwa swinene ya le Egipta. (Eks. 9:13-19) Hi dyondza yini eka ndlela leyi Yehovha a tirhiseke Muxe ha yona? Yehovha u tirhisa vanhu lava nga ni timfanelo leti fanaka ni takwe naswona va titshegeke hi matimba yakwe.—Filp. 4:13.

6. Hi dyondza yini eka ndlela leyi Yehovha a tirhiseke Barizilayi ha yona leswaku a pfuna Hosi Davhida?

6 Endzhaku ka malembe yo tala, Yehovha u tirhise Barizilayi leswaku a pfuna Hosi Davhida. Davhida ni vanhu vakwe a va ‘khomiwe hi ndlala, va karhele naswona a va ri ni torha,’ hi nkarhi lowu a va baleka Absalomu n’wana wa Davhida. Hambileswi Barizilayi a khalabyile, yena ni vanhu van’wana va hoxe vutomi bya vona ekhombyeni leswaku va ya pfuna Davhida ni vanhu lava a ri na vona. Barizilayi a nga tibyelanga leswaku leswi se a dyuharile, a nga ha pfuni nchumu eka Yehovha. Ku ri na sweswo, u endle leswi a nga swi kotaka leswaku a pfuna malandza ya Xikwembu lawa a ma lava ku pfuniwa. (2 Sam. 17:27-29) Hi dyondza yini emhakeni leyi? Hambiloko hi dyuharile, Yehovha a nga hi  tirhisa leswaku hi pfuna Vakrestekulorhi lava lavaka ku pfuniwa, swi nga ri na mhaka leswaku va kumeka kwihi. (Swiv. 3:27, 28; 19:17) Hambiloko hi nga ta ka hi nga swi koti ku va pfuna hi ku kongoma, hi nga va pfuna hi ku nyikela eka ntirho wa misava hinkwayo, minyikelo yoleyo yi ta va pfuna hi nkarhi wa maxangu.—2 Kor. 8:14, 15; 9:11.

7. Yehovha u n’wi tirhise njhani Simiyoni naswona sweswo swi hi khutaza njhani?

7 Yehovha u tshembise Simiyoni, mukhalabye wo tshembeka wa le Yerusalema leswaku a nge fi a nga si vona Mesiya. Xitshembiso xexo xi n’wi chavelerile swinene Simiyoni, tanihi leswi a ku ri khale a rindzele Mesiya. U katekisiwile hikwalaho ka ku tiyisela ni ripfumelo kakwe. Siku rin’wana, “moya wu n’wi [susumetele] ku ya nghena etempeleni.” Loko a ri kwalaho, Simiyoni u vone Yesu a ha ri ricece naswona Yehovha u tirhise yena ku profeta mayelana ni n’wana loyi, loyi a ta va Kreste. (Luka 2:25-35) Hambileswi Simiyoni a nga fa Yesu a nga si sungula ntirho wakwe wo chumayela, u yi tlangerile swinene ndlela leyi Yehovha a n’wi tirhiseke ha yona naswona u ta tiphina hi mikateko yo tala enkarhini lowu taka! Emisaveni leyintshwa, Simiyoni u ta vona ndlela leyi Mfumo wa Yesu wu nga tisela mindyangu hinkwayo mikateko laha misaveni. (Gen. 22:18) Na hina a hi tlangeleni ndlela yin’wana ni yin’wana leyi Yehovha a hi tirhisaka ha yona entirhweni wakwe.

8. Yehovha a nga hi tirhisa njhani ku fana ni ndlela leyi a tirhiseke Barnaba ha yona?

8 Hi nkarhi wa vaapostola, wanuna un’wana loyi a vuriwaka Yosefa naswona a ri ni malwandla u pfumele ku tirhisiwa hi Yehovha. (Mint. 4:36, 37) Leswi Yosefa a swi kota kahle ku chavelela van’wana, vaapostola va n’wi thye vito ra Barnaba, leri vulaka “N’wana wa Nchavelelo.” Hi xikombiso, endzhaku ka loko Sawulo a ve mupfumeri, Vakreste vo tala a va chava ku n’wi tshinelela hikwalaho ka leswi a dume hi ku xanisa Vakreste. Kambe Barnaba u pfune Sawulo naswona Sawulo u wu tlangerile swinene mpfuno wakwe. (Mint. 9:21, 26-28) Hi ku famba ka nkarhi, vakulu va le Yerusalema va vone swi fanerile ku ya khutaza vamakwavo ku ya fika ni le Antiyoka ya le Siriya. Xana va rhume mani? Va rhume Barnaba! Va hlawule munhu loyi a faneleka kahle. Hi byeriwa leswaku Barnaba “a sungula ku va khutaza hinkwavo leswaku va tshama eHosini hi mbilu hinkwayo.” (Mint. 11:22-24) Hilaha ku fanaka, ninamuntlha Yehovha a nga hi pfuna leswaku hi va “vana va nchavelelo” eka Vakrestekulorhi. Hi xikombiso, a nga hi tirhisa leswaku hi chavelela vanhu lava loveriweke. A nga thlela a endla leswaku hi endzela kumbe hi fonela makwerhu loyi a vabyaka kumbe loyi a nga ni ntshikilelo leswaku hi n’wi chavelala. Xana u ta n’wi pfumelela Yehovha a ku tirhisa hilaha a n’wi tirhiseke hakona Barnaba?—1 Tes. 5:14.

9. Hi dyondza yini eka ndlela leyi Yehovha a n’wi pfuneke ha yona makwerhu loyi a vuriwaka Vasily leswaku a va murisi lonene?

9 Yehovha u pfune makwerhu loyi a vuriwaka Vasily leswaku a va murisi lonene. Loko a ri ni malembe ya 26, Vasily u hlawuriwe ku va nkulu kambe a a chava hi ku ehleketa leswaku a nge swi koti ku pfuna vamakwavo evandlheni, ngopfungopfu lava a va langutane ni swiyimo swo tika. Kambe u pfuniwe hi vakulu lava se a ku ri khale va ri vakulu ni hi Xikolo Xa Vutirheli Bya Mfumo. Vasily u kulule a n’watseka. Hi xikombiso, u tsale swilo swi nga ri swingani leswi a lava ku swi fikelela. Ku chava kakwe ku ye ku hela hakatsongotsongo loko a ri karhi a fikelela swilo leswi a swi tsaleke. Sweswi u ri: “Swilo leswi a swi ndzi chavisa khale hi swona leswi ndzi tsakisaka sweswi. Ndza tsaka swinene loko Yehovha a ndzi pfuna ndzi kuma tsalwa ro karhi leri ndzi nga chavelelaka makwerhu ha rona evandlheni.” Vamakwerhu, loko mi pfumela ku tirhisiwa hi Yehovha hilaha Vasily a endleke hakona, Yehovha  u ta mi nyika vuswikoti byo hetisisa vutihlamuleri bya n’wina evandlheni.

NDLELA LEYI VAVASATI VA PFUNIWEKE HA YONA

10. I yini leswi Abigayele a swi endleke naswona u dyondza yini eka yena?

10 Davhida ni malandza yakwe yo tshembeka a va ri eku balekeni ka Hosi Sawulo naswona a va lava ku pfuniwa. Malandza ya Davhida ma ye eka wanuna un’wana loyi a fuwile swinene wa Muisrayele loyi a vuriwa Nabali, ma ya kombela swakudya. Ma titwe ma ntshunxekile ku kombela eka yena tanihi leswi a ma sirhelela ntlhambi wakwe emananga. Kambe Nabali u ma tsonile. Sweswo swi hlundzukise Davhida lerova a lava ku dlaya Nabali swin’we ni vavanuna hinkwavo va ndyangu wakwe. (1 Sam. 25:3-13, 22) Kambe Abigayele nsati wa Nabali, a rhulile naswona a sasekile. Hi xivindzi, u tiwisele emilengeni ya Davhida a n’wi kombela leswaku a nga tirihiseli leswaku a nga vi ni nandzu wa ngati. Hi vutlhari Abigayele u tsundzuxe Davhida leswaku a swi tshikela Yehovha. Marito ya Abigayele ma n’wi khumbile swinene Davhida. U swi xiyile leswaku Abigayele a rhumiwe hi Yehovha. (1 Sam. 25:23-28, 32-34) Abigayele a ri ni timfanelo letinene leti endleke leswaku a kota ku tirhisiwa hi Yehovha. Hilaha ku fanaka, vamakwerhu va xisati lava rhuleke naswona va nga ni vuxiyaxiya, Yehovha a nga va tirhisa leswaku va pfuna mindyangu ya vona ni van’wana evandlheni.—Swiv. 24:3; Tito 2:3-5.

11. Vana va Xalumu va vanhwanyana va endle yini naswona i vamani lava namuntlha va va tekelelaka?

11 Vana va Xalumu va vanhwanyana, i van’wana va lava Yehovha a va tirhiseke ku pfuxeta marhangu ya Yerusalema. (Neh. 2:20; 3:12) Hambileswi tata wa vona a ri hosana, vana va Xalumu va vanhwanyana a va tiyimiserile ku endla ntirho wolowo lowu a wu ri ni khombo naswona a wu tika. (Neh. 4:15-18) A va hambanile swinene ni vavanuna va le Tekowa lava nga ti tisangiki “tinhamu ta vona leswaku ti tirhela vini va vona.” (Neh. 3:5) Ehleketa hi ndlela leyi vana va Xalumu va vanhwanyana a va tsake ha yona loko ntirho hinkwawo wo aka wu hela hi masiku ya 52 ntsena! (Neh. 6:15) Ninamuntlha, vamakwerhu vaxisati va tsaka swinene hileswi va hoxaka xandla eka mitirho yo kwetsima, leyi katsaka ku aka ni ku khathalela miako leyi hi gandzelaka Yehovha eka yona. Vuswikoti, ku tiyimisela ni ku tshembeka ka vona swi endla leswaku ntirho lowu wu famba khwatsi.

12. Yehovha a nga hi tirhisa njhani ku fana ni ndlela leyi a tirhiseke Thavitha ha yona?

12 Yehovha u khutaze Thavitha leswaku a endlela vanhu swilo leswinene ni ku va nyika “tinyiko to tala ta tintswalo,” ngopfungopfu tinoni. (Mint. 9:36) Leswi a ri ni musa ni malwandla, vo tala va ve ni gome loko a fa. Kambe endzhaku ka loko muapostola Petro a n’wi pfuxile, a va nga tikoti hi ku tsaka. (Mint. 9:39-41) Hi dyondza yini eka Thavitha? Swi nga ri na mhaka leswaku hi vanhu lavakulu kumbe lavatsongo, hi vavanuna kumbe vavasati, hinkwerhu hi nga swi kota ku pfuna vamakwerhu.—Hev. 13:16.

13. Yehovha u n’wi tirhise njhani Ruth hambileswi a ri ni tingana naswona u gimete hi ku vula yini?

13 Hambileswi Ruth a ri ni tingana kambe a lava ku va murhumiwa. Loko a ha ri ntsongo, a chumayela hi yindlu ni yindlu a nyika vanhu swiphephana. U ri: “A ndzi wu rhandza ngopfu ntirho lowu.” Kambe a swi n’wi tikela swinene ku vulavurisana ni vanhu hi Mfumo wa Xikwembu. Hambileswi a ri ni tingana, loko a ri ni malembe ya 18 u ve phayona ra nkarhi hinkwawo. Hi 1946, u ye eXikolweni xa Bibele xa Giliyadi xa Watchtower naswona hi ku famba ka nkarhi u komberiwe ku ya chumayela eHawaii ni le Japani. Yehovha u n’wi tirhise ngopfu leswaku a chumayela mahungu lamanene ematikweni wolawo.  Endzhaku ka malembe ya kwalomu ka 80 Ruth a ri muchumayeri wa mahungu lamanene, loko a gimeta u ri: “Yehovha u ndzi seketerile swinene. U ndzi pfunile ndzi hlula tingana. Ndza tiyiseka leswaku Yehovha a nga tirhisa mani na mani ntsena loko a titshega hi yena.”

PFUMELELA YEHOVHA A KU TIRHISA

14. Hi ku ya hi Vakolosa 1:29, hi fanele hi endla yini loko hi lava ku tirhisiwa hi Yehovha?

14 I khale Yehovha a ri karhi a tirhisa malandza yakwe hi tindlela to hambanahambana. Xana a nga ku tirhisa leswaku u endla yini? Swi titshege hi wena. (Hlaya Vakolosa 1:29.) Loko u pfumelela Yehovha a ku tirhisa, a nga endla leswaku u va muchumayeri la hisekaka, mudyondzisi lonene, muchaveleri lonene, mutirhi loyi a nga ni vutshila, munghana lonene kumbe a ku endla xin’wana ni xin’wana leswaku a hetisisa xikongomelo xakwe.

15. Hi ku ya hi 1 Timotiya 4:12, 15, vamakwerhu va xinuna lava ha riki vantshwa va fanele va kombela Yehovha a va pfuna va endla yini?

15 Ku vuriwa yini hi n’wina vamakwerhu va xinuna ma ha riki vantshwa? Ku ni xilaveko lexikulu xa malandza ya vutirheli emavandlheni. Emavandlheni yo tala ku tale vakulu ku tlula malandza ya vutirheli. Hikwalaho ka yini mi nga tikarhateli ku kuma vutihlamuleri lebyi engeteleke evandlheni? Vamakwerhu van’wana va xinuna va vula leswi: “Ndzi titwa ndzi tsakile leswi ndzi nga muhuweleri ntsena.” Loko ku ri leswaku u titwa hi ndlela yoleyo, kombela Yehovha a ku pfuna u navela ku va nandza wa vutirheli, a tlhela a ku nyika matimba ya ku n’wi tirhela hilaha u nga kotaka hakona. (Ekl. 12:1) Ha wu lava swinene mpfuno wa wena!—Hlaya 1 Timotiya 4:12, 15.

16. Hi fanele hi kombela yini eka Yehovha naswona hikwalaho ka yini?

16 Yehovha a nga ku endla xin’wana ni xin’wana lexi a xi lavaka leswaku a hetisisa xikongomelo xakwe. Hikokwalaho, n’wi kombele a ku pfuna u rhandza ntirho wakwe, u tlhela u n’wi kombela a ku nyika matimba ya ku wu endla. Swi nga ri na mhaka leswaku wa ha ri muntshwa kumbe u munhu lonkulu, tirhisa nkarhi, matimba ni rifuwo ra wena leswaku u vangamisa Yehovha. (Ekl. 9:10) U nga pfumeleli ku chava kumbe ku kanakana ku ku tshikisa ku tirhela Yehovha hilaha u nga kotaka hakona. Mayana nkateko wonghasi lowu hi nga na wona wo hoxa xandla eku endleni ka leswaku Tata wa hina wa rirhandzu a vangamisiwa hilaha swi n’wi fanelaka hakona!

RISIMU 127 Muxaka Wa Munhu Loyi Ndzi Faneleke Ndzi Va Yena

^ par. 5 Xana u vona onge a wu nge swi koti ku tirhela Yehovha hilaha a wu lava hakona? Xana wa tivutisa loko Yehovha a ha ku teka u ri wa nkoka? Kumbexana u swi vona swi nga ri swa nkoka ku pfumelela Yehovha a ku tirhisa hilaha a lavaka hakona? Eka nhlokomhaka leyi, hi ta bula hi tindlela to hambanahambana leti Yehovha a nga ku nyikaka matimba ha tona ya ku endla xin’wana ni xin’wana leswaku a hetisisa xikongomelo xakwe.

^ par. 3 Hambileswi Pawulo a ri tsalele Vakreste va le nkarhini wakwe papila leri, rungula leri ra ha tirha eka malandza hinkwawo ya Yehovha namuntlha.