Nghena endzeni

Hundzela eka leswi nga endzeni

 XIHLOKO LEXI DYONDZIWAKA 40

Tshama U Khomekile “eMasikwini Lawa Yo Hetelela”

Tshama U Khomekile “eMasikwini Lawa Yo Hetelela”

“Tserhamani, mi nga tsekatsekisiwi, nkarhi hinkwawo mi va ni swo tala swo swi endla entirhweni wa Hosi.”—1 KOR. 15:58.

RISIMU 58 Hi Lavisisa Vanghana Va Ku Rhula

LESWI HI NGA TA SWI DYONDZA *

1. I yini lexi hi khorwisaka leswaku hi hanya “emasikwini yo hetelela”?

XANA u velekiwe endzhaku ka 1914? Loko swi ri tano, swi vula leswaku u velekiwe hi nkarhi wa “[masiku] yo hetelela” ya misava leyi. (2 Tim. 3:1) Hinkwerhu hi twile hi ta swiendlakalo leswi Yesu a profeteke leswaku swi ta endleka namuntlha. Sweswo swi katsa tinyimpi, ku kayivela ka swakudya, ku tsekatseka ka misava, mavabyi, ku engetelaka ka ku kala nawu ni ku xanisiwa ka vanhu va Yehovha. (Mat. 24:3, 7-9, 12; Luka 21:10-12) Nakambe vanhu va hanya hi ndlela leyi muapostola Pawulo a profeteke ha yona. (Vona bokisi leri nge “ Ndlela Leyi Vanhu Va Hanyaka Ha Yona Namuntlha.”) Leswi hi nga Timbhoni ta Yehovha, ha tiyiseka leswaku hi hanya “exiphen’wini xo hetelela xa masiku.”—Mik. 4:1.

2. Hi swihi swivutiso leswi hi lavaka tinhlamulo ta swona?

2 Leswi se ku hundzeke malembe yo tala ku sukela hi 1914, swi vula leswaku sweswi hi hanya evugimamusi bya ‘masiku yo hetelela.’ Leswi makumu ma nga kwala nyongeni, hi fanele hi kuma tinhlamulo ta swivutiso swa nkoka leswi nge: Hi swihi swiendlakalo leswi nga ta humelela emakumu ka ‘masiku yo hetelela’? Yehovha u lava hi endla yini loko ha ha rindzele swiendlakalo sweswo?

HI SWIHI SWIENDLAKALO LESWI NGA TA HUMELELA EMAKUMU KA ‘MASIKU YO HETELELA’?

3. Hi ku ya hi vuprofeta lebyi nga eka 1 Vatesalonika 5:1-3, hi xihi xitiviso lexi matiko ma nga ta xi endla?

3 Hlaya 1 Vatesalonika 5:1-3. Pawulo u boxe “siku ra Yehovha.” Tindzimana leti ti vulavula hi nkarhi lowu nga ta sungula hi ku hlaseriwa ka “Babilona Lonkulu,” ku nga mfumo wa misava wa vukhongeri bya mavunwa kutani wu hela hi ku fika ka Armagedoni. (Nhlav. 16:14, 16; 17:5) Loko “siku” rero ri nga si fika, matiko ma ta endla xitiviso lexi nge “ku rhula ni nsirhelelo!” (Tibibele tin’wana  ti ri: “Ku rhulile, ku hava xo karhata.”) Mikarhi yin’wana varhangeri va matiko va vula marito lawa loko va kondletela ku rhula exikarhi ka matiko yo karhi. * Kambe xitiviso xa “ku rhula ni nsirhelelo” lexi Bibele yi vulavulaka hi xona xi ta va xi hambanile. Hikwalaho ka yini? Endzhaku ka xitiviso xexo, vanhu va ta ehleketa leswaku varhangeri va matiko va swi kotile ku endla misava yi va ndhawu yo rhula ni leyi sirhelelekeke. Loko va ha tibyela sweswo, ku ta sungula “nhlomulo lowukulu” kutani va weriwa hi “ndzoviso wa xitshuketa.”—Mat. 24:21.

U nga kanganyisiwi hi xitiviso xa mavunwa lexi matiko ma nga ta xi endla xa “ku rhula ni nsirhelelo” (Vona tindzimana 3-6) *

4. (a) I yini leswi hi nga swi tiviki mayelana ni xitiviso xa “ku rhula ni nsirhelelo”? (b) I yini leswi hi swi tivaka hi xona?

4 Ku ni swilo swo karhi leswi hi swi tivaka mayelana ni xitiviso xa “ku rhula ni nsirhelelo.” Kambe ku na swin’wana leswi hi nga swi tiviki. A hi swi tivi leswi nga ta endla ku tivisiwa xitiviso xexo ni leswaku xi ta tivisiwa njhani. Nakambe a hi swi tivi loko xi ta tivisiwa ka n’we kumbe xi ta tivisiwa ko tala. Ku nga khathariseki ndlela leyi xi nga ta tivisiwa ha yona, lexi hi xi tivaka hi lexi: A hi fanelanga hi kanganyisiwa hikuva ha swi tiva leswaku vafumi va misava a va nge swi koti ku tisa ku rhula laha misaveni. Bibele yi hi byela leswaku hi tshama hi xi languterile xitiviso xexo. Xi ti va xi kombisa leswaku “siku ra Yehovha” ri kwala nyongeni!

5. 1 Vatesalonika 5:4-6, yi hi pfuna njhani leswaku hi tshama hi lunghekele “siku ra Yehovha”?

5 Hlaya 1 Vatesalonika 5:4-6. Leswi Pawulo a swi vuleke, swi hi pfuna ku tiva leswi hi faneleke hi swi endla leswaku hi lunghekela “siku ra Yehovha.” A hi fanelanga hi etlela ku fana ni “lavan’wana hinkwavo lava etlelaka.” Hi fanele hi ‘hiteka’ hi tlhela hi tshama hi xalamukile. Hi xikombiso, hi fanele hi tshama hi xalamukile leswaku hi nga tikumi hi hoxe nhompfu eka swa tipolitiki. Loko ho nghenelela eka swa tipolitiki, hi ta va “xiphemu xa misava.” (Yoh. 15:19) Ha swi tiva leswaku Mfumo wa Xikwembu hi wona ntsena lowu nga ta tisa ku rhula laha misaveni.

6. Hi lava ku pfuna van’wana leswaku va endla yini naswona hikwalaho ka yini?

6 Leswi hina se hi xalamukeke, hi lava ku pfuna van’wana leswaku na vona va tiva leswi Bibele yi swi profeteke hi misava leyi. Tsundzuka, loko nhlomulo lowukulu wo kala wu sungula, a swi nge he koteki leswaku vanhu va sungula ku tirhela Yehovha. Leswi hi swona swi endlaka leswaku ntirho wa hina wo chumayela wu va wa xihatla swinene! *

TSHAMA U KHOMEKILE HI NTIRHO WO CHUMAYELA

Loko hi ri karhi hi chumayela hi byela vanhu leswaku Mfumo wa Xikwembu hi wona ntsena lowu nga ta tisa ku rhula ni nsirhelelo laha misaveni (Vona tindzimana 7-9)

7. I yini leswi Yehovha a lavaka leswaku hi swi endla sweswi?

7 Yehovha u lava leswaku hi tshama hi khomekile hi ntirho wo chumayela tanihi leswi “siku” rakwe ri nga kwala nyongeni. Hi fanele hi tiyiseka leswaku hi “ni swo tala swo swi endla entirhweni wa Hosi.” (1 Kor. 15:58) Yesu u profete leswi a hi  ta swi endla. Loko a vulavula hi swilo leswi a swi ta endleka hi nkarhi wa masiku ya makumu u te: “Nakambe, mahungu lamanene ma fanele ku chumayeriwa ematikweni hinkwawo ku sungula.” (Mar. 13:4, 8, 10; Mat. 24:14) Ehleketa hi mhaka leyi: Nkarhi ni nkarhi loko u ya ensin’wini, u va u hoxa xandla eku hetisiseni ka vuprofeta lebyi bya le Bibeleni!

8. Hi swi tiva njhani leswaku ntirho wo chumayela hi Mfumo wu ya wu kula?

8 Hi swi tiva njhani leswaku ntirho wo chumayela hi Mfumo wu ya wu kula? Lembe ni lembe vanhu vo tala va twa mahungu lamanene ya Mfumo. Hi xikombiso, ehleketa hi ndlela leyi nhlayo ya vahuweleri va Mfumo yi andzeke ha yona emisaveni hinkwayo emasikwini lawa ya makumu. Hi 1914, a ku ri ni vahuweleri va 5 155 ematikweni ya 43. Namuntlha, ku ni vahuweleri va kwalomu ka 8,5 wa timiliyoni ematikweni ya 240! Kambe ntirho wa ha lo vuya. Hi fanele hi ya emahlweni hi chumayela hi Mfumo wa Xikwembu tanihi leswi ku nga wona ntsena lowu nga ta tlhantlha swiphiqo swa vanhu.—Ps. 145:11-13.

9. Hikwalaho ka yini hi fanele hi ya emahlweni hi chumayela rungula ra Mfumo?

9 Ntirho wa hina wo chumayela hi Mfumo a wu nge yimi loko Yehovha a nga se vula leswaku swi ringene. Xana ku sale nkarhi wo tanihi kwihi leswaku vanhu va dyondza hi Yehovha Xikwembu na Yesu Kreste? (Yoh. 17:3) A hi swi tivi. Lexi hi xi tivaka hileswaku loko nhlomulo lowukulu wu nga si sungula, vanhu lava nga ni “mboyamelo lowunene eka vutomi lebyi nga heriki,” va ha ri ni nkarhi wo twa ni ku amukela mahungu lamanene. (Mint. 13:48) Hi nga va pfuna njhani vanhu lava, dyambu ri nga si va pelela?

10. Hi wihi mpfuno lowu Yehovha a hi nyikaka wona leswaku hi kota ku dyondzisa vanhu ntiyiso?

10 Hi ku tirhisa nhlengeletano yakwe, Yehovha u hi nyika swilo leswi nga ta hi pfuna hi kota ku dyondzisa vanhu ntiyiso. Hi xikombiso, vhiki ni vhiki ha leteriwa etidyondzweni ta le xikarhi ka vhiki. Ha pfuniwa leswaku hi tiva leswi hi nga ta swi vula eka riendzo ro sungula ni le ka maendzo yo vuyela. Hi tlhela hi dyondzisiwa ndlela yo fambisa tidyondzo ta Bibele. Nakambe nhlengeletano ya Yehovha yi hi nyike Switirhisiwa Swo Pfuneta Ku Dyondzisa Vanhu Bibele. Switirhisiwa leswi swi hi pfuna hi kota ku . . .

  •   sungula mabulo,

  • koka rinoko ra vanhu lava hi va chumayelaka,

  • pfuna vanhu va tsakela ku dyondza Bibele,

  • dyondzisa vanhu ntiyiso wa leswi Bibele yi swi dyondzisaka,

  • komba vanhu website ya hina ni ku va rhamba leswaku va ta eHolweni ya Mfumo.

A hi fanelanga hi tsakisiwa hi ku va ni switirhisiwa leswi ntsena kambe hi fanele hi swi tirhisa. * Hi xikombiso, loko u hlangana ni munhu loyi a tsakelaka ku dyondza Bibele ivi u n’wi siyela xiphephana kumbe magazini, u ta sala a swi hlaya ku kondza u tlhelela eka yena. I vutihlamuleri bya hina ku tshama hi khomekile hi ntirho wo chumayela hi Mfumo n’hweti yin’wana ni yin’wana.

11. Hikwalaho ka yini ku endliwe leswaku vanhu va kota ku dyondza Bibele eka Website?

11 Xin’wana lexi kombisaka leswaku Yehovha wa hi pfuna emhakeni ya ku dyondzisa vanhu ntiyiso, i ku endliwa ka leswaku vanhu va kota Ku Dyondza Bibele Eka Website ya jw.org®. Hikwalaho ka yini ku endliwe leswi? N’hweti ni n’hweti, vanhu vo tala emisaveni hinkwayo va nghena eka Inthanete hi xikongomelo xo dyondza Bibele. Tidyondzo leti nga eka website ya hina ti ta pfuna vanhu volavo leswaku va dyondza ntiyiso lowu nga eRitweni ra Xikwembu. Vanhu van’wana lava u vulavulaka na vona va nga ha kanakana ku amukela dyondzo ya Bibele. Loko swi ri tano, va kombe tidyondzo leti nga eka website ya hina kumbe u va rhumela linki. *

12. I yini leswi munhu a nga ta swi dyondza loko a ri karhi a Dyondza Bibele Eka Website?

12 Tinhlokomhaka leti munhu a nga dyondzaka ha tona eka Website hi leti landzelaka: “Bibele Ni Mutsari Wa Yona,” “Vanhu Lava Ku Vulavuriwaka Ngopfu Ha Vona eBibeleni” ni leyi nge “Rungula Ra Bibele Leri Nyikaka Ntshembo.” Tinhlokomhaka teto ti dyondzisa leswi landzelaka:

  • Ndlela leyi Bibele yi nga pfunaka munhu ha yona

  • I mani Yehovha, Yesu ni tintsumi

  • Hikwalaho ka yini Xikwembu xi vumbe vanhu

  • Hikwalaho ka yini ku ri ni ku xaniseka ni vuhomboloki

Ti tlhela ti dyondzisa hi ndlela leyi Yehovha a nga ta . . . 

  • herisa ku xaniseka ni rifu,

  • pfuxa vafi naswona a nga ta

  • herisa mimfumo ya vanhu kutani a yi siva hi Mfumo wa Xikwembu.

13. Loko munhu a heta ku dyondza Bibele eka website, xana a nga ha fanelanga a dyondzisiwa Bibele? Hlamusela.

13 Loko munhu a heta ku dyondza Bibele eka website, wa ha fanele a dyondzisiwa Bibele. Yesu u byi nyike hina vutihlamuleri byo endla vadyondzisiwa. Hi navela leswaku onge vanhu lava dyondzaka Bibele eka website, va nga tsakela leswi va swi dyondzaka kutani va lava ku dyondza leswi engetelekeke hi Bibele. Loko va endla tano, va ta pfumela ku dyondzisiwa Bibele. Emakumu ka dyondzo yin’wana ni yin’wana, mudyondzi u komberiwa ku rhumela fomo, a kombela munhu loyi a nga ta n’wi dyondzisa Bibele. Siku ni siku, eka website ya hina hi kuma swikombelo swo tlula 230, swa vanhu lava kombelaka ku dyondzisiwa Bibele! I swa nkoka swinene leswaku va kuma munhu loyi a nga ta va dyondzisa!

TIKARHATELE KU ENDLA VADYONDZISIWA

14. Hi ku ya hi xileriso xa Yesu lexi nga eka Matewu 28:19, 20, hi fanele hi tikarhatelaka ku endla yini naswona hikwalaho ka yini?

14 Hlaya Matewu 28:19, 20. Loko hi ri karhi hi dyondzisa vanhu Bibele, hi fanele hi tikarhatela ku “endla . . vadyondzisiwa,  . . . [hi] va dyondzisa ku hlayisa swilo hinkwaswo leswi [Yesu a] hi leriseke swona.” Hi fanele hi pfuna vanhu va xiya leswaku i swa nkoka swinene ku va va tirhela Yehovha ni ku seketela Mfumo wakwe. Leswi swi vula leswaku hi fanele hi tikarhatela ku pfuna vanhu va tirhisa leswi va swi dyondzaka, va tinyiketela eka Yehovha va tlhela va khuvuriwa. Loko va endla tano, va ta pona loko siku ra Yehovha ri fika.—1 Pet. 3:21.

15. I yini lexi endlaka hi nga swi lavi ku tlanga hi nkarhi naswona hikwalaho ka yini?

 15 Hilaha ku vuriweke hakona eku sunguleni, nkarhi lowu saleke wa leswaku misava leyi yi lovisiwa wutsongo swinene. Hikwalaho, a hi swi lavi ku tlanga hi nkarhi hi ku ya emahlweni hi dyondza Bibele ni vanhu lava nga tiyimiselangiki ku va vadyondzisiwa va Kreste. (1 Kor. 9:26) Ntirho wa hina i wa xihatla swinene! Ka ha ri ni vanhu vo tala lava faneleke va twa rungula ra Mfumo dyambu ri nga si va pelela.

FAMBELA EKULE HI KU HELALA NI VUKHONGERI BYA MAVUNWA

16. Hi ku ya hi Nhlavutelo 18:2, 4, 5, 8, i yini leswi hinkwerhu hi faneleke hi swi endla? (Vona nhlamuselo ya le hansi.)

16 Hlaya Nhlavutelo 18:2, 4, 5, 8Tindzimana leti ti vulavula hi swilo swin’wana leswi Yehovha a lavaka leswaku vagandzeri vakwe va swi endla. Vakreste hinkwavo va ntiyiso va fanele va fambela ekule na Babilona Lonkulu. Swi nga endleka leswaku loko xichudeni xa Bibele xi nga si dyondza ntiyiso, a xi ri xirho xa vukhongeri byo karhi bya mavunwa. Kumbexana a xi katseka eka migingiriko hinkwayo leyi a yi endliwa eka vukhongeri byebyo. Kumbe a xi humesa mali ya nhlengo evukhongerini bya kona. Loko xichudeni xa Bibele xi nga si bumabumeriwa leswaku xi va muhuweleri loyi a nga khuvuriwangiki, xi fanele xi tihambanisa hi ku helela ni vukhongeri bya mavunwa. Xi fanele xi yisa papila eka vukhongeri bya xona bya khale leri kombisaka leswaku a xa ha swi lavi ku va xirho xa vukhongeri byebyo kumbe ku tihlanganisa ni vukhongeri lebyi fambisanaka na Babilona Lonkulu. *

17. I ntirho wa njhani lowu Mukreste a faneleke a wu papalata naswona hikwalaho ka yini?

17 Mukreste wa ntiyiso u fanele a papalata ntirho wun’wana ni wun’wana lowu fambisanaka na Babilona Lonkulu. (2 Kor. 6:14-17) Hi xikombiso, a nge pfumeli ku thoriwa ekerekeni. Nakambe Mukreste loyi a thoriweke hi khamphani yo karhi, a nge pfumeli ku ya tirha eka muako lowu fambisanaka ni vukhongeri bya mavunwa. Loko a ri ni khamphani, a nge xi amukeli kumbe ku endla xikombelo xo ya endla ntirho lowu fambisanaka na Babilona Lonkulu. Hikwalaho ka yini hi bava hi khalakhasa emhakeni leyi? Hikuva a hi lavi ku katseka nikatsongo emitirhweni ni le swidyohweni swa vukhongeri lebyi nga basangiki emahlweni ka Xikwembu.—Esa. 52:11. *

18. Makwerhu un’wana u swi kombise njhani leswaku u yi yingisa misinya ya milawu ya Bibele loko swi ta emhakeni ya ntirho wa ku tihanyisa?

18 Emalembeni lama hundzeke, mukontraka  un’wana u kombele makwerhu un’wana loyi a a titirha leswaku a ya endla ntirho wo vatla ekerekeni leyi a yi ri ekusuhi ni laha makwerhu loyi a a tshama kona. Mukontraka yoloye a swi tiva leswaku makwerhu a vule leswaku a nge pfuki a tirhe etikerekeni. Kambe a nga ha swi tivi leswaku u ta thola mani. Hambiswiritano, makwerhu u kombise leswaku u yingisa misinya ya milawu ya Bibele hi ku ala ku amukela ntirho wolowo. Vhiki leri landzeleke, phephahungu ra kwalaho ri humese xifaniso xa muvatli un’wana a ri karhi a vekela xihambano ekerekeni. Loko makwerhu a lo pfumela, a ku ta va ku ri xifaniso xa yena lexi a xi ta va xi kombisiwe eka phephahungu rero. Ehleketa ndlela leyi vamakwerhu a va ta n’wi teka ha yona makwerhu loyi! Nakambe ehleketa hi ndlela leyi Yehovha a ta titwa ha yona.

HI DYONDZE YINI?

19-20. (a) I yini leswi hi swi dyondzeke ku ta fikela sweswi? (b) I yini leswi ha ha faneleke hi swi dyondza?

19 Hi ku ya hi vuprofeta bya Bibele, xiendlakalo lexikulu lexi nga ta endleka ku nga ri khale laha misaveni, i ku tivisiwa ka xitiviso lexi nge “ku rhula ni nsirhelelo,” lexi nga ta tivisiwa hi matiko. Leswi Yehovha a hi dyondziseke, ha swi tiva leswaku matiko a ma nge swi koti ku endla leswaku ku va ni ku rhula laha misaveni. Xivutiso hi leswaku, sweswi hi fanele hi endla yini loko xitiviso xexo xi nga si tivisiwa ni ndzoviso wa xitshuketa wu nga si sungula? Yehovha u lava leswaku hi tshama hi khomekile hi ntirho wo chumayela hi Mfumo ni ku tikarhatela ku endla vadyondzisiwa. Hi fanele hi tlhela hi fambela ekule hi ku helela ni vukhongeri bya mavunwa. Leswi swi katsa ku huma hi ku helela eka vukhongeri bya hina bya khale ni ku papalata mitirho hinkwayo leyi fambisanaka na Babilona Lonkulu.

20 Ka ha ri ni swiendlakalo swin’wana leswi nga ta endleka emakumu ka ‘masiku yo hetelela.’ Nakambe ku ni swilo swin’wana leswi Yehovha a lavaka leswaku hi swi endla. I yini swilo swa kona naswona hi nga endla yini leswaku hi tshama hi lunghekele swilo hinkwaswo leswi nga ta endleka ku nga ri khale? Hi ta dyondza hi swona eka nhlokomhaka leyi landzelaka.

RISIMU 71 Hi Vuthu Ra Yehovha!

^ par. 5 Ku nga ri khale hi ta twa matiko ma vula leswaku se ku ni “ku rhula ni nsirhelelo!” Sweswo ku ta va xikombiso xa leswaku nhlomulo lowukulu wu kwala nyongeni. I yini leswi Yehovha a lavaka hi swi endla sweswi, xitiviso xexo xi nga si tivisiwa? Nhlokomhaka leyi yi ta hi pfuna.

^ par. 3 Hi xikombiso, Nhlangano wa Matiko eka website ya wona wu vula leswaku wu “hlayisa ku rhula ni nsirhelelo emisaveni hinkwayo.”

^ par. 10 Leswaku u twa hi ta ndlela yo tirhisa Switirhisiwa Swo Pfuneta Ku Dyondzisa Vanhu Bibele, vona nhlokomhaka leyi nge, “Dyondzisa Ntiyiso Lowu Nga eRitweni Ra Xikwembu” eka Xihondzo xo Rindza xa October 2018.

^ par. 11 Ku fikela sweswi, endlelo leri ra Ku Dyondza Bibele Eka Website ri kumeka hi Xinghezi ni Xiputukezi, kambe hi ku famba ka nkarhi ri ta kumeka hi tindzimi to tala.

^ par. 16 Nakambe hi fanele hi fambela ekule ni mihlangano ya vantshwa kumbe tindhawu ta vuhungasi leti fambisanaka ni vukhongeri bya mavunwa, to tanihi nhlangano wa majaha lowu vuriwaka YMCA (Young Men’s Christian Association) ni nhlangano wa tintombhi lowu vuriwaka YWCA (Young Women’s Christian Association). Hambiloko mihlangano yoleyo yi vula leswaku a hi mihlangano ya vukhongeri kambe leswi yi swi endlaka swi fambisana ni timhaka ta vukhongeri.

^ par. 17 Leswaku u kuma rungula leri engetelekeke mayelana ni leswi Matsalwa ma swi vulaka hi ku endla mitirho leyi fambisanaka ni vukhongeri, vona “Swivutiso Swa Vahlayi” eka Xihondzo xo Rindza xa April 15, 1999.

^ par. 83 NHLAMUSELO YA XIFANISO: Vaxavi lava nga exitolo xa kofi va hlamarisiwa hi “Hungunkulu” leri va ri twaka eka thelevhixini leri nge “ku rhula ni nsirhelelo.” Vatekani lava nga Timbhoni lava humaka ensin’wini a xi va tsemi nhlana xitiviso xexo.