Nghena endzeni

Hundzela eka leswi nga endzeni

 XIHLOKO LEXI DYONDZIWAKA 24

Tsuvula Miehleketo Yihi Ni Yihi Leyi Lwisanaka Ni Vutivi Bya Xikwembu!

Tsuvula Miehleketo Yihi Ni Yihi Leyi Lwisanaka Ni Vutivi Bya Xikwembu!

“Hi wisa makungu ni swilo hinkwaswo leswi tlakukeke leswi lwisanaka ni vutivi bya Xikwembu.”—2 KOR. 10:5.

RISIMU 124 Ku Tshama Hi Tshembekile

LESWI HI NGA TA SWI DYONDZA *

1. Hi xihi xilemukiso lexi Pawulo a xi tsaleleke Vakreste lava totiweke?

MUAPOSTOLA PAWULO u hi lemukisile a ku: “Tshikani.” U ri hi tshika ku endla yini? U ri: “Tshikani ku titwananisa ni mafambiselo lawa ya swilo.” (Rhom. 12:2) Marito wolawo, Pawulo a a ma byela Vakreste vo sungula. Hikwalaho ka yini a nyikele xilemukiso xo tano, xa matimba eka vavanuna ni vavasati lava tinyiketeleke eka Xikwembu va tlhela va totiwa hi moya lowo kwetsima?—Rhom. 1:7.

2-3. Sathana u ringeta hi ndlela yihi ku hi endla leswaku hi fularhela Yehovha kambe hi nga swi kotisa ku yini ku tsuvula swilo “leswi simekiweke swi tiya” emiehleketweni ya hina?

2 Pawulo a karhatekile hikuva Vakreste van’wana a va vonaka va kuceteriwa hi miehleketo ya Sathana leyi nga ni khombo. (Efe. 4:17-19) Sweswo swi nga ha endleka ni le ka un’wana ni un’wana wa hina. Sathana i mufumi wa misava leyi naswona a nga ha tirhisa marhengu yo hambanahambana leswaku a hi endla hi fularhela Yehovha. Hi xikombiso loko hi navela ku va ni ndhuma a nga ha tirhisa sweswo leswaku a hi endla hi fularhela Yehovha. A nga ha tlhela a tirhisa swilo leswi hi swi dyondzeke ekaya, exikolweni ni le ka vanhu lava hi tshamaka na vona, leswaku a hi endla hi ehleketa hi ndlela leyi a lavaka ha yona.

3 Xana hi nga swi kota ku tsuvula swilo “leswi simekiweke swi tiya” emiehleketweni ya hina? (2 Kor. 10:4) Xiya nhlamulo ya Pawulo: “Hikuva hi wisa makungu ni swilo hinkwaswo leswi tlakukeke leswi lwisanaka ni vutivi bya Xikwembu; hi tisa miehleketo hinkwayo evukhumbini leswaku hi yi endla yi yingisa Kreste.” (2 Kor. 10:5) A swi kanakanisi leswaku hi ku pfuniwa hi Yehovha  hi nga swi kota ku cinca ndlela leyi hi ehleketaka ha yona. Tanihi leswi ku nga ni murhi lowu kotaka ku humesa chefu, Rito ra Xikwembu ri nga hi pfuna leswaku hi susa nkucetelo wa Sathana lowu fanaka ni chefu.

‘HUNDZULANI MIANAKANYO YA N’WINA’

4. I yini leswi vo tala va hina a hi boheka ku swi cinca evuton’wini bya hina loko hi dyondza ntiyiso lowu nga eBibeleni?

4 Anakanya hi leswi u swi cinceke evuton’wini bya wena loko wa ha ku dyondza ntiyiso lowu nga eRitweni ra Xikwembu kutani u tinyiketela eka Yehovha. Vo tala va hina hi boheke ku tshika swilo swo biha leswi a hi swi endla. (1 Kor. 6:9-11) Hi khensa Yehovha leswi a hi pfuneke hi kota ku tshika ku endla swilo swo tano swo biha!

5. Hi swihi swilo swimbirhi leswi Varhoma 12:2 yi vulaka leswaku hi fanele hi swi endla?

5 Hambiswiritano, a hi fanelanga hi ehleketa leswaku a ka ha ri na swin’wana leswi hi nga swi cincaka evuton’wini bya hina. Hambileswi se hi tshikeke ku endla swidyoho leswikulu leswi a hi swi endla loko hi nga si khuvuriwa, hi fanele hi tirha hi matimba leswaku hi papalata xihi na xihi lexi nga hi ringaka ku tlhelela eka mahanyelo ya hina ya khale. Hi nga swi endlisa ku yini sweswo? Pawulo u hlamula a ku: “Tshikani ku titwananisa ni mafambiselo lawa ya swilo, kambe mi hundzuka hi ku hundzula mianakanyo ya n’wina.” (Rhom. 12:2) Kutani ku ni swilo swimbirhi leswi hi faneleke hi swi endla. Xo sungula, hi fanele hi “tshika ku titwananisa” ni misava leyi. Xa vumbirhi, hi fanele hi “hundzuka” hi ku hundzula mianakanyo ya hina.

6. Hi dyondza yini eka marito ya Yesu lama tsariweke eka Matewu 12:43-45?

6 Ku hundzuka loku Pawulo a vulavula ha kona a hi ku cinca ndlela leyi hi langutekaka ha yona ntsena. Swi khumba vutomi bya hina hinkwabyo. (Vona bokisi leri nge “ Xana Ndzi Hundzukile Kumbe Ndzi Tiendla Onge Ndzi Hundzukile?”) Hi fanele hi hundzula mianakanyo ya hina, vumunhu bya hina, langutelo ra hina,  ndlela leyi hi titwaka ha yona ni ku navela ka hina. Kutani hinkwerhu hi fanele hi tivutisa leswi, ‘Xana ndzi hundzukile hakunene leswaku ndzi va Mukreste kumbe ndzi tiendla onge ndzi hundzukile ematihlweni ya vanhu?’ I swa nkoka leswaku ku va ni ku hambana. Eka marito ya Yesu lama tsariweke eka Matewu 12:43-45, u kombise leswi hi faneleke hi swi endla. (Hlaya.) Marito wolawo ma kombisa ntiyiso lowu wa nkoka: Loko hi tshika miehleketo yo biha hi fanele hi yi siva hi miehleketo leyinene leyi tsakisaka Xikwembu.

“MI ENDLIWA MI VA LAVANTSHWA EMATIMBENI LAMA SUSUMETAKA MIANAKANYO YA N’WINA”

7. Hi nga yi hundzula njhani mianakanyo ya hina?

7 Xana swa koteka ku hundzula mianakanyo ya hina kumbe leswi hakunene hi nga xiswona embilwini? Rito ra Xikwembu ri hlamula ri ku: “Mi endliwa mi va lavantshwa ematimbeni lama susumetaka mianakanyo ya n’wina, kutani mi fanele mi ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” (Efe. 4:23, 24) Hi nga swi kota ku hundzula mianakanyo ya hina kambe a swi olovi. Hi fanele hi papalata ku navela ko biha ni ku endla swilo swo biha hi tlhela hi hundzula “matimba lama susumetaka mianakanyo ya hina.” Leswi swi katsa ku hundzula ku navela ka hina, mikhuva ya hina ni leswi swi hi susumetaka. Leswi swi lava leswaku hi hambeta hi endla matshalatshala.

8-9. Xana xikombiso xa makwerhu un’wana xi wu kombisa njhani nkoka wo hundzula mianakanyo ya hina?

8 Hi xikombiso, makwerhu un’wana u kule a ri munhu wa madzolonga. A a ri xilovekelo naswona a rhandza ku lwa, kambe u swi tshikile kutani a khuvuriwa. Sweswo swi nyikele vumbhoni endhawini ya ka vona. Siku rin’wana nimadyambu endzhakunyana ka loko a khuvuriwile u ringiwe hi ndlela leyi a a nga yi langutelanga. Wanuna un’wana loyi a dakwile u te ekaya ka yena a fika a n’wi tlhontlha. Eku sunguleni makwerhu u ringete ku tikhoma. Kambe loko wanuna loyi a sungula ku vulavula ku biha hi Yehovha, makwerhu u tsandzeke ku tikhoma naswona u fumbutele wanuna yoloye. Hikwalaho ka yini a endle tano? Hambileswi Bibele yi n’wi pfuneke ku tshika madzolonga, kambe a nga se swi kota ku hundzula matimba lama susumetaka mianakanyo yakwe. Hi marito man’wana a nga se yi hundzula mianakanyo ya yena.

9 Hambiswiritano, makwerhu loyi a nga wanga mapa. (Swiv. 24:16) Vakulu va n’wi pfunile a ya emahlweni a endla nhluvuko. Eku heteleleni u ve nkulu. Siku rin’wana nimadyambu loko a ri ehandle ka jarata ra Holo ya Mfumo u langutane ni ndzingo lowu fanaka ni lowu a nga tshama a langutana na wona loko a ha ku khuvuriwa. Wanuna loyi a dakwile a a lava ku ba nkulu un’wana. Xana makwerhu u endle yini? Hi moya wo rhula ni wo titsongahata u vulavurisane ni wanuna loyi a dakwile a n’wi endla a rhulisa mbilu a tlhela a n’wi pfuna leswaku a ya ekaya. Hikwalaho ka yini makwerhu a nga ha ri na vukarhi? Hikuva u hundzule mianakanyo yakwe. U hundzuke munhu wo rhula la titsongahata naswona leswi swi yisa ku dzuneka eka Yehovha!

10. I yini leswi hi faneleke hi swi endla loko hi lava ku hundzula mianakanyo ya hina?

10 Ku hundzuka ko tano a ku tiendlekeli, swi lava matshalatshala. Swi nga ha teka malembe hi ri karhi hi “endla matshalatshala” wolawo. (2 Pet. 1:5) U nga tibyeli leswaku loko u tirhela Yehovha malembe yo tala u ta va u hundzukile. Hi fanele tirha hi matimba leswaku hi hundzula mianakanyo ya hina. Ku ni swilo swa nkoka leswi hi faneleke hi swi endla. A hi kambisiseni swin’wana swa swona.

 NDLELA YO HUNDZULA MIANAKANYO YA HINA

11. Xana xikhongelo xi ta hi pfuna njhani leswaku hi hundzula mianakanyo ya hina?

11 Nchumu wo sungula wa nkoka i xikhongelo. Hi fanele hi khongela ku fana ni mupisalema: “Tumbuluxa mbilu yo tenga eka mina, wena Xikwembu, naswona u nghenisa moya lowuntshwa, lowu tserhameke endzeni ka mina.” (Ps. 51:10) Hi fanele hi xiya leswaku swi fanerile ku hundzula mianakanyo ya hina kutani hi kombela Yehovha a hi pfuna. Hikwalaho ka yini hi tshemba leswaku Yehovha u ta hi pfuna leswaku hi hundzuka? Hi nga khutaziwa hi xitshembiso lexi Yehovha a xi tshembiseke Vaisrayele lava a va ome tinhloko va le nkarhini wa Ezekiyele lexi nge: “Ndzi ta va nyika mbilu yin’we, ndzi va chela ni moya lowuntshwa endzeni . . . ndzi va nyika mbilu ya nyama [ku nga mbilu leyi yingisaka nkongomiso wa Xikwembu].” (Ezek. 11:19) Yehovha a a tiyimisele ku pfuna Vaisrayele leswaku va hundzuka naswona u tiyimisele ku hi pfuna na hina.

12-13. (a) Hi ku ya hi Pisalema 119:59, i yini leswi hi faneleke hi anakanyisisa ha swona? (b) Hi swihi swivutiso leswi u faneleke u tivutisa swona?

12 Nchumu wa vumbirhi wa nkoka i ku anakanyisisa. Siku ni siku loko hi hlaya Rito ra Xikwembu, hi fanele hi tinyika nkarhi wo anakanyisisa hi leswi hi swi hlayaka leswaku hi ta xiya laha hi nga antswisaka kona. (Hlaya Pisalema 119:59; Hev. 4:12; Yak. 1:25) Hi fanele hi xiya mboyamelo wun’wana ni wun’wana lowu hi nga na wona wo navela ku va ni vutlhari bya misava. Loko hi wu xiyile hi fanele hi tikarhatela ku wu tsuvula.

13 Hi xikombiso, tivutise: ‘Xana ndzi ni mavondzonyana?’ (1 Pet. 2:1) ‘Xana ndzi titekela ehenhla hikwalaho ka ndhawu leyi ndzi humaka eka yona, dyondzo kumbe hi leswi ndzi nga ni timali?’ (Swiv. 16:5) ‘Xana ndzi va vonela ebodlheleni vanhu va rixaka rin’wana kumbe lava nga riki na swona swilo leswi ndzi nga na swona?’ (Yak. 2:2-4) ‘Xana ndzi titwa ndzi rhandza swilo leswi nga emisaveni ya Sathana?’ (1 Yoh. 2:15-17) ‘Xana ndzi rhandza vuhungasi lebyi nga ni madzolonga ni ku tikhoma ko biha hi swa masangu?’ (Ps. 97:10; 101:3; Amo. 5:15) Tinhlamulo ta swivutiso leswi ti ta ku pfuna ku vona laha u faneleke u antswisa kona. Loko hi tsuvula swilo “leswi simekiweke swi tiya” etimbilwini ta hina, hi ta tsakisa Tata wa hina wa le tilweni.—Ps. 19:14.

14. Hikwalaho ka yini swi ri swa nkoka ku hlawula vanghana lavanene?

14 Nchumu wun’wana wa vunharhu wa nkoka i ku hlawula vanghana lavanene. Hambi ha swi xiya kumbe a hi swi xiyi, vanghana va hina va hi kucetela ngopfu. (Swiv. 13:20) Exikolweni kumbe emintirhweni hi hanya ni vanhu lava nga ta ka va nga hi pfuni ku ehleketa hi ndlela leyi tsakisaka Xikwembu. Hambiswiritano, hi nga kuma vanghana lavanene emihlanganweni ya Vukreste naswona hi ta khutaziwa “erirhandzwini ni le mintirhweni leyinene.”—Hev. 10:24, 25.

MI “TIYISIWA ERIPFUMELWENI”

15-16. Xana Sathana u ringeta ku onha miehleketo ya hina hi ndlela yihi?

15 Tsundzuka leswaku Sathana u tiyimisele ku onha miehleketo ya hina. U tirhisa swilo swo hambanahambana leswaku a hi tshikisa leswi Rito ra Xikwembu ri hi dyondziseke swona.

16 Nisweswi Sathana wa ha vutisa xivutiso lexi a xi vutiseke Evha entangeni wa Edeni lexi nge: “Xana hakunene i ntiyiso leswaku Xikwembu xi vule leswaku . . . ?” (Gen. 3:1) Leswi misava leyi yi lawuriwaka hi Sathana, hi tshamela ku twa swivutiso leswi nga hi endlaka hi kanakana ripfumelo ra hina, swo fana ni leswi nge: ‘Xana hakunene Xikwembu a xi ku pfumeleli ku tekana ka vanhu va rimbewu leri fanaka? Xana hakunene Xikwembu a xi swi lavi leswaku mi tlangela  Khisimusi ni masiku ya ku velekiwa? Xana hakunene Xikwembu xa n’wina a xi swi lavi leswaku mi cheriwa ngati? Xana hakunene Xikwembu lexi nga ni rirhandzu xi lava leswaku mi papalata ku tihlanganisa ni maxaka ya n’wina lama susiweke?’

17. Hi fanele hi endla yini loko hi vutisiwa swivutiso leswi ringaka ripfumelo ra hina naswona Vakolosa 2:6, 7, yi kombisa leswaku ku ta va ni vuyelo byihi?

17 Hi fanele hi swi twisisa kahle leswi hi swi pfumelaka. Loko hi tshika ku lava tinhlamulo ta swivutiso swa nkoka swa ripfumelo ra hina, hi nga sungula ku kanakana leswi hi swi pfumelaka? Ku kanakana ko tano ku nga onha miehleketo ya hina ni ku dlaya ripfumelo ra hina. Kutani hi fanele hi endla yini? Rito ra Xikwembu ri vula leswaku hi fanele hi hundzula mianakanyo ya hina leswaku hi ta tiyiseka “hi ku rhandza ka Xikwembu loku nga kunene ni loku amukelekaka ni loku hetisekeke.” (Rhom. 12:2) Loko hi dyondza nkarhi na nkarhi hi ta tiyiseka leswaku leswi hi swi dyondzeke eBibeleni i ntiyiso. Hi ta tiyiseka hi ku helela leswaku milawu ya Yehovha yi lulamile. Na hina hi ta dzima timitsu ku fana ni nsinya lowu dzimeke timitsu, hi ta “tiyisiwa eripfumelweni.”—Hlaya Vakolosa 2:6, 7.

18. I yini lexi nga hi pfunaka leswaku hi tisirhelela eka chefu ya misava ya Sathana?

18 Ku hava munhu la nga endlaka ripfumelo ra wena ri tiya wena u tshamile u khondle mavoko, hikwalaho, hambeta u endliwa lontshwa ematimbeni lama susumetaka mianakanyo ya wena. Khongela nkarhi na nkarhi, u kombela moya lowo kwetsima wa Yehovha. Anakanyisisa hi vuenti; hambeta u kambisisa leswi u swi ehleketaka ni leswi ku susumetaka ku endla swo karhi. Lava vanghana lavanene; tolovelana ni vanhu lava nga ta ku pfuna leswaku u cinca miehleketo ya wena. Loko u endla tano u ta tisirhelela eka chefu leyi humaka emisaveni ya Sathana ni le ka “makungu ni swilo hinkwaswo leswi tlakukeke leswi lwisanaka ni vutivi bya Xikwembu.”—2 Kor. 10:5.

RISIMU 50 Xikhongelo Xanga Xa Ku Tinyiketela

^ par. 5 Mikarhi hinkwayo miehleketo ya hina yi kuceteriwa hi swilo leswi nga tshama swi hi humelela, ndhavuko ni dyondzo. Swi nga ha endleka hi ri ni miehleketo yo biha leyi dzimeke timitsu. Xihloko lexi xi ta hi pfuna ku vona ndlela leyi hi nga yi tsuvulaka ha yona miehleketo leyi nga riki yinene.