Nghena endzeni

Hundzela eka leswi nga endzeni

Hlakulela Ku Va Ni Ntwelavusiwana Eka “Vanhu Va Mixaka Hinkwayo”

Hlakulela Ku Va Ni Ntwelavusiwana Eka “Vanhu Va Mixaka Hinkwayo”

LOKO Yesu a dyondzisa vadyondzisiwa vakwe ndlela yo chumayela mahungu lamanene, u va byele leswaku a hi vanhu hinkwavo lava a va ta amukela rungula ra Mfumo. (Luka 10:3, 5, 6) Eka nsimu ya hina, hi nga ha hlangana ni vanhu lava hi karihelaka loko hi va byela rungula ra Mfumo kumbe lava hi khomaka hi ndlela ya tihanyi. Swi le rivaleni leswaku sweswo swi nga endla leswaku swi hi tikela ku kombisa ntwelavusiwana eka vanhu lava hi va chumayelaka.

Munhu la nga ni ntwelavusiwana u xiya swilaveko ni swiphiqo swa van’wana, u twelana na vona naswona u lava ku va pfuna. Hambiswiritano, loko hi nga ha ri na ntwelavusiwana eka vanhu lava hi va chumayelaka, hi nga sungula ku ka hi nga ha hiseki naswona a hi nge swi koti ku va pfuna. Kambe loko hi tikarhatela ku va na ntwelavusiwana swi ta fana ni loko hi chela pharafini endzilweni, kutani hi ta tshama hi ri karhi hi hisekela ntirho wo chumayela!—1 Tes. 5:19.

Xana hi nga swi hlakulela njhani ku va ni ntwelavusiwana hambiloko swi tika ku endla tano? A hi kambisiseni swikombiso swinharhu leswi hi nga swi tekelela, ku nga Yehovha, Yesu na muapostola Pawulo.

TEKELELA NTWELAVUSIWANA WA YEHOVHA

Ku ringana magidi ya malembe, Yehovha u tiyisele ndzhukano lowu phyarhekiweke eka vito rakwe. Kambe u tshama a ri “ni musa eka lava nga nkhensiki ni lavo homboloka.” (Luka 6:35) U kombisa musa wakwe hi ku lehisa mbilu. Yehovha u navela leswaku “vanhu va mixaka hinkwayo” va ponisiwa. (1 Tim. 2:3, 4) Hambileswi Xikwembu xi vengaka vuhomboloki kambe xi teka vanhu va ri va risima naswona a xi lavi leswaku ni un’we wa vona a lova.—2 Pet. 3:9.

Yehovha wa yi tiva ndlela leyi Sathana a va pfaleke mahlo ha yona vanhu lava nga riki vapfumeri. (2 Kor. 4:3, 4) Vanhu vo tala va dyondzisiwe mavunwa malunghana ni Xikwembu ku sukela va ha ri va ntsongo naswona sweswo swi endla leswaku swi va tikela ku amukela ntiyiso. Yehovha u tiyimisele ku pfuna vanhu vo tano. Hi swi tivisa ku yini?

Xiya ndlela leyi Yehovha a a va languta ha yona Vaninivha. Hambileswi a va ri na madzolonga, Yehovha u byele Yonasi a ku: “Xana a ndzi fanelanga ndzi va ni nsovo eka muti lowukulu wa Ninivha, lowu wu nga ni vanhu vo tlula 120 000, lava va nga ku tiviki nikatsongo ku hambana exikarhi ka voko ra vona ra xinene ni ra ximatsi?” (Yon. 4:11) Yehovha a teka Vaninivha va ri lava nga tiviki tindlela takwe naswona hikwalaho ka tintswalo takwe u lerise Yonasi leswaku a ya va lemukisa.

Ku fana na Yehovha, na hina hi teka vanhu va ri va risima. Hi nga n’wi tekelela hi ku tikarhatela ku pfuna vanhu lava nga yingisaka hambiloko va tikomba onge a va nge yingiseli.

TEKELELA NTWELAVUSIWANA WA YESU

Ku fana ni Tata wakwe, Yesu na yena a susumetiwa hi ntwelavusiwana leswaku a pfuna vanhu lava a va lava ku dyondza hi Xikwembu. “Loko a vona mintshungu a yi twela vusiwana, hikuva a yi vavisiwile ni ku tsalangana ku fana ni tinyimpfu leti nga riki na murisi.” (Mat. 9:36) Yesu a xi twisisa kahle xiyimo xa vona, a swi tiva leswaku vanhu volavo lava a va tele ku n’wi yingisela, a va dyondzisiwe mavunwa naswona a va khomiwe ku biha hi varhangeri va vona va vukhongeri. Hambileswi a swi tiva leswaku vo tala a va ta pfumelela swiyimo swin’wana leswaku swi va sivela ku amukela rungula rakwe, Yesu u ye emahlweni a va “dyondzisa swilo swo tala.”—Mar. 4:1-9.

U nga hlundzuki loko munhu a nga kombisi ku tsakela eku sunguleni

Tanihi leswi swiyimo swa vanhu evuton’wini swi cincaka, langutelo ra vanhu hi Bibele na rona ra cinca

Loko vanhu va nga ri tsakeli rungula ra hina, hi  fanele hi ringeta ku twisisa xiyimo xa vona naswona hi tivutisa leswaku hikwalaho ka yini va angula tano. Van’wana va nga ha va ni langutelo leri hoxeke hi Bibele kumbe hi Vukreste hikwalaho ka swiendlo swo biha swa vanhu lava tivulaka Vakreste. Kumbexana van’wana va byeriwe mavunwa hi vukhongeri bya hina. Nakambe van’wana va nga ha hlekuriwa hi vanhu va le mugangeni wa ka vona kumbe hi swirho swa ndyangu loko va amukela rungula ra hina.

Van’wana lava hi hlanganaka na vona va nga ha ala ku hi yingisela hikwalaho ka swiyimo swo tika leswi va langutaneke na swona leswi va siyeke va tshikilelekile. Murhumiwa un’wana la vuriwaka Kim u ri: “Eka xiphemu xin’wana xa nsimu ya hina, vanhu vo tala va tshame va lahlekeriwa hi swilo swa vona hinkwaswo hikwalaho ka nyimpi. A va na ntshembo hi vumundzuku. Va pfilunganyekile naswona a va tshembi munhu. Endhawini leyi, hakanyingi hi hlangana ni vanhu lava kanetaka rungula ra hina. Siku rin’wana ndzi tshame ndzi biwa loko ndzi ri eku chumayeleni.”

Xana Kim u swi kotisa ku yini ku tshama a ri na ntwelavusiwana hambiloko a khomiwa hi ndlela yo biha? U ri: “Loko ndzi khomiwa hi ndlela yo biha ndzi ringeta ku tsundzuka Swivuriso 19:11, leyi nge: ‘Ku twisisa ka munhu ku vohlisa ku hlundzuka kakwe.’ Ku tsundzuka swiyimo leswi vanhu va le nsin’wini ya ka hina va langutaneke na swona swi ndzi pfuna leswaku ndzi va twela vusiwana. Naswona a hi vanhu hinkwavo lava hi hlanganaka na vona lava hi khomaka hi ndlela yo biha. Eka ndhawu yoleyo hi ni maendzo yo vuyela.”

Hi nga ha tivutisa leswaku, ‘Xana a ndzi ta angula njhani eka rungula ra Mfumo loko a ndzi ri eka xiyimo xo fana ni xa vanhu lava hi va chumayelaka?’ Hi xikombiso, a hi nge u byeriwe mavunwa hi ku phindhaphindha hi Timbhoni ta Yehovha? Kumbexana, eka xiyimo xo tano na hina a hi ta angula hi ndlela yo biha naswona a hi ta lava ku kombiwa ntwelavusiwana. Loko hi tsundzuka xileriso xa Yesu xo khoma vanhu hi ndlela leyi hi lavaka va hi khoma ha yona, hi susumeteleka ku angula hi ndlela ya musa hambiloko swi tika ku endla tano.—Mat. 7:12.

TEKELELA NTWELAVUSIWANA WA PAWULO

Muapostola Pawulo u kombise ntwelavusiwana ni le ka vakaneti va madzolonga. Hikwalaho ka yini? A nga swi rivalanga leswi a nga tshama a swi endla. U te: “Eku sunguleni a ndzi ri musandzi ni muxanisi ni murhukani. Nilokoswiritano, ndzi kombisiwe tintswalo, hikuva a ndzi pfumala vutivi naswona a ndzi endla hi ku pfumala ripfumelo.” (1 Tim. 1:13) U swi xiyile leswaku Yehovha na Yesu va n’wi kombe tintswalo letikulu. A swi twisisa leswi endlaka vanhu va ringeta ku n’wi sivela loko a chumayela hikuva na yena u tshame a va tano.

Mikarhi yin’wana Pawulo a hlangana ni vanhu lava a va nghene hi nhloko evukhongerini bya mavunwa. Xana u angule njhani? Mintirho 17:16 yi vula leswaku loko Pawulo a ri eAtena, ‘moya  wakwe endzeni kakwe wu sungule ku karhateka hi ku vona leswaku muti a wu tele swifaniso swa hava.’ Hambiswiritano, Pawulo u tirhise nkarhi wolowo leswaku a nyikela vumbhoni hambileswi swiendlo swa vona a swi n’wi nyenyetsa. (Mint. 17:22, 23) U endle leswaku ntirho wakwe wo chumayela wu fambisana ni swiyimo swa vanhu hinkwavo ‘leswaku a ponisa van’wana hi tindlela hinkwato.’—1 Kor. 9:20-23.

Hi nga tekelela Pawulo loko hi chumayela vanhu lava nga tsakeliki kumbe lava nga eka vukhongeri bya mavunwa hi ku tirhisa vutlhari loko hi va byela “mahungu lamanene ya leswo antswa.” (Esa. 52:7) Makwerhu la vuriwaka Dorothy u ri: “Vanhu vo tala ensin’wini ya hina va dyondzisiwe leswaku Xikwembu xi ni tihanyi naswona xi ta va avanyisa. Ndza va bumabumela hikwalaho ka leswi va pfumelaka eka Xikwembu kutani ndzi va komba leswi Bibele yi swi vulaka hi timfanelo leti rhandzekaka ta Yehovha ni switshembiso swa xona swa nkarhi lowu taka.”

“HAMBETA U HLULA SWO BIHA HI LESWINENE”

Tanihi leswi hi hanyaka “emasikwini yo hetelela” hi nga langutela leswaku vanhu van’wana lava hi va chumayelaka “va ta ya emahlweni va nyanya evubihini bya vona.” (2 Tim. 3:1, 13) Kambe a hi fanelanga hi pfumelela sweswo swi hi tekela ntsako kumbe ku endla leswaku hi nga ha swi koti ku kombisa ntwelavusiwana. Yehovha u ta hi nyika matimba yo ‘hambeta hi hlula swo biha hi leswinene.’ (Rhom. 12:21) Phayona leri vuriwaka Jessica ri ri: “Mikarhi yo tala ndzi hlangana ni vanhu lava tikukumuxaka, lava hi tekelaka ehansi swin’we ni rungula ra hina. Sweswo swi heta matimba. Loko ndzi sungula bulo, ndzi khongela eka Yehovha hi mbilu ndzi kombela mpfuno wakwe leswaku ndzi languta munhu yoloye hi ndlela leyi Yehovha a n’wi langutaka ha yona. Sweswo swi endla leswaku ndzi tshika ku anakanya hi ndlela leyi ndzi titwaka ha yona kambe ndzi anakanya hi ndlela leyi ndzi nga n’wi pfunaka ha yona.”

Hi ya emahlweni hi lava, lava nga ni mboyamelo lowunene eka vutomi lebyi nga heriki

Van’wana va ma vona matshalatshala lama hi ma endlaka yo va pfuna leswaku va dyondza Bibele

Hi fanele hi tlhela hi anakanya hi ndlela leyi hi nga va khutazaka ha yona vamakwerhu. Jessica u ri: “Loko un’wana wa hina a khomiwe hi ndlela yo biha, ndzi ringeta ku papalata ku vulavula ngopfu hi swona. Ku ri na sweswo, ndzi ringeta ku endla leswaku mabulo ya hina ma aka, hi ku bula hi swilo leswinene leswi ntirho wa hina wu swi fikelelaka hambiloko vanhu van’wana va nga ri tsakeli rungula ra hina.”

Yehovha wa swi vona swiphiqo leswi hi hlanganaka na swona ensin’wini. Anakanya ndlela leyi a tsakaka ha yona loko hi tekelela tintswalo takwe! (Luka 6:36) I ntiyiso leswaku Yehovha a nge kombisi ntwelavusiwana wakwe hilaha ku nga heriki. Hi nga tiyiseka leswaku u wu tiva kahle nkarhi lowu faneleke wo herisa misava leyi. Loko ha ha rindzele sweswo, ntirho wo chumayela i wa xihatla. (2 Tim. 4:2) A hi yeni emahlweni hi endla ntirho wa hina hi ku hiseka ni ku va ni ntwelavusiwana eka “vanhu va mixaka hinkwayo.”