Nghena endzeni

Hundzela eka leswi nga endzeni

 MHAKA YA VUTOMI

Ndzi Kule Ndzi Ri Xisiwana Kambe Sweswi Ndzi Fuwile

Ndzi Kule Ndzi Ri Xisiwana Kambe Sweswi Ndzi Fuwile

Loko ndzi velekiwa, yindlu ya ka hina a yo va kamara rin’we ntsena leri endliweke hi mapulanga, exidorobanini lexi vuriwaka Liberty, eIndiana le U.S.A. Vatswari va mina a va ri ni vana vanharhu loko ndzi velekiwa, ku nga buti na vasesi vambirhi. Endzhaku ka mina, manana u tlhele a va ni vana vambirhi va vafana ni unw’e wa nhwanyana.

Yindlu ya mapulanga leyi ndzi kuleleke eka yona

A ndzi ri un’wana wa vana va nkombo naswona ndzi dyondze ntirho wa le purasini ndza ha ri ntsongo

LOKO ndza ha ri exikolweni a ku cincanga swo tala. Eka xikolo lexi a ndzi nghena eka xona, vanhu lava ndzi sunguleke na vona xikolo hi vona lava ndzi heteke na vona, kahlekahle a ndzi tiva mavito ya vanhu vo tala exidorobanini xexo naswona na vona a va ndzi tiva.

Xidorobana xa Liberty a xi rhendzeriwe hi mapurasi lamatsongo naswona a ku rimiwa mavele. Loko ndzi velekiwa, tatana a tirha epurasini ra kwalaho. Loko ndza ha ri muntshwa, ndzi dyondze ku chayela teretere ni mintirho yin’wana ya le purasini.

Loko ndzi velekiwa, tatana se a kurile, a a ri ni malembe ya 56 kasi manana a ri ni malembe ya 35. Tatana a a larile, a ri ni rihanyo lerinene naswona a rhandza ku tirha hi matimba kutani hinkwerhu u hi dyondzise sweswo. A nga holi mali yo tala kambe a tiyiseka leswaku hi ni ndhawu yo tshama, swiambalo ni swakudya naswona mikarhi hinkwayo a hi khathalela. U love a ri ni malembe ya 93. Manana u love a ri ni malembe ya 86. Havumbirhi bya vona a va nga ri vagandzeri va Yehovha. Eka vamakwerhu, ko va ndzisana ya mina ntsena leyi tirheleke Yehovha hi ku tshembeka tanihi nkulu ku sukela loko ku sungule lunghiselelo rero hi va-1970.

LOKO NDZA HA RI NTSONGO

Manana a rhandza vukhongeri. A famba na hina ekerekeni ya Baptist Sonto yin’wana ni yin’wana. Loko ndzi ri ni malembe ya 12 ndzi sungula ku twa hi  dyondzo ya vunharhu-un’we. Leswi a ndzi rhandza ku tiva, ndzi vutise manana ndzi ku: “Swi tisa ku yini leswaku Yesu a va N’wana a tlhela a va Tatana hi nkarhi wun’we?” Ndza yi tsundzuka nhlamulo yakwe u te: “A ku na munhu la swi tivaka n’wananga. A hi nge pfuki hi swi twisisile.” Hakunene a swi nga twisiseki eka mina. Hambiswiritano, loko ndzi ri ni malembe ya 14 ndzi khuvuriwile enambyeni wa kwalaho, ndzi nyuperisiwe kanharhu hikwalaho ka Vunharhu-un’we!

1952—Loko ndzi ri na malembe ya 17, ndzi nga si yisiwa evusocheni

Loko ndza ha ri exikolweni xa le henhla, a ndzi ri ni munghana loyi a tlanga ntlangu wa xibakele leswaku a ta kuma mali naswona u ndzi kucetele leswaku na mina ndzi wu ringeta. Ndzi sungule ku tiletela kutani ndzi tsarise eka nhlangano wa xibakele lowu vuriwaka Golden Gloves. A ndzi nga ri na vuswikoti kutani endzhaku ka mintlangu yi nga ri yingani, ndzi tshikile. Hi ku famba ka nkarhi ndzi sindzisiwe ku va socha ra United States naswona ndzi rhumeriwe eJarimani. Loko ndzi ri kwale, un’wana wa varhangeri va mina u ndzi yise eXikolweni xa Vusocha hileswi a ehleketa leswaku ndzi ni vuswikoti bya ntumbuluko byo rhangela. A va lava leswaku ntirho wa vusocha wu va ntirhovutomi eka mina. A ndzi nga swi tsakeli ku ya emahlweni ndzi ri socha kutani endzhaku ka malembe mambirhi lama a va ndzi nyike wona, va ndzi pfumelerile leswaku ndzi tshika hi 1956. Hambiswiritano, swi nga si ya kwihi ndzi nghenele vusocha bya muxaka wun’wana.

1954-1956—Ndzi hete malembe mambirhi ndzi ri socha ra United States

KU SUNGULA VUTOMI LEBYINTSHWA

Loko ndzi nga si dyondza ntiyiso, a ndzi ri ni langutelo leri hoxeke hi leswi ku va wanuna wa xiviri swi vulaka swona. A ndzi kuceteriwa ngopfu hi ndlela leyi vavanuna a va languteka ha yona eka tifilimi ni laha a ndzi tshama kona. Eka mina, vachumayeri a va nga ri vavanuna va xiviri. Hambiswiritano, ndzi sungule ku dyondza swin’wana leswi cinceke vutomi bya mina. Siku rin’wana loko ndzi ri karhi ndzi chayela movha wa mina wo tshwuka wa xilahla edorobeni, vanhwanyana van’wana vambirhi va ndzi yimisele voko. A ndzi va tiva hikuva a va ri tindzisana ta sivara wa mina. Vanhwanyana lava a va ri Timbhoni ta Yehovha. Va tshame va ndzi nyika timagazini ta Xihondzo xo Rindza ni Xalamuka! kambe Xihondzo xo Rindza a xi ndzi tikela ku xi twisisa. Kambe sweswi a va ndzi rhambela eka Dyondzo ya Buku ya Vandlha, ku nga nhlangano lowutsongo wa dyondzo ya Bibele lowu a wu katsa bulo ni vayingiseri, lowu a wu khomeriwa ekaya ka vona. Ndzi va byele leswaku ndzi ta ehleketa ha swona. Vanhwanyana lava va ndzi vutise va ri karhi va n’wayitela va ku, “Xana wa tshembisa?” Ndzi te, “Ndza tshembisa.”

A ndzi tisola hileswi ndzi endleke xitshembiso xexo kambe a ndzi fanele ndzi xi hetisisa. Kutani ndzi yile madyambu wolawo. Vana hi vona lava ndzi tsakiseke swinene. Ndzi hlamarisiwe hi ndlela leyi a va tiva Bibele ha yona. Hambileswi a ndzi ya ekerekeni Sonto yin’wana ni yin’wana na manana a ndzi nga tivi swo tala hi Bibele. Sweswi a ndzi tiyimisele ku dyondza leswi engetelekeke. Ndzi pfumele ku dyondzeriwa Bibele. Loko ndzi sungula ku dyondza, ndzi tive leswaku vito ra Xikwembu xa Matimba Hinkwawo i Yehovha. A ndzi tshame ndzi vutisa manana hi Timbhoni ta Yehovha kutani u ndzi byele a ku: “Ti gandzela mukhalabye un’wana loyi a vuriwaka Yehovha.” Kutani sweswi a ndzi sungula ku pfuleka mahlo!

Ndzi hatle ndzi endla nhluvuko hikuva a ndzi swi xiya leswaku ndzi kume ntiyiso. Ndzi khuvuriwe hi March 1957, ku nga si hela tinh’weti ta kaye ku sukela loko ndzi ye eka nhlangano lowuya wa Dyondzo ya Buku. Ndlela leyi a ndzi byi languta ha yona vutomi yi cincile. Loko ndzi anakanya hi ndlela leyi a ndzi teka ku va wanuna ha yona, ndza tsaka leswi Bibele yi ndzi dyondziseke leswi ku va wanuna wa xiviri swi vulaka  swona. Yesu a ri wanuna la hetisekeke. A a ri ni miri wo tiyela a tlhela a va ni matimba, ku tlula ‘wanuna loyi a ndzi tibuma ha yena.’ Hambiswiritano, a nga katsekanga etinyimpini kambe “a a titshika a xaniseka” hilaha swi profetiweke ha kona. (Esa. 53:2, 7) Ndzi dyondze leswaku mulandzeri wa Yesu wa ntiyiso ‘u fanele a olova eka hinkwavo.’—2 Tim. 2:24.

Ndzi sungule ku phayona eka lembe leri landzeleke hi 1958. Kambe swi nga si ya kwihi, a ndzi fanele ndzi tshika ku phayona swa xinkarhana. Hikwalaho ka yini? A ndzi lava ku teka nsati, ku nga Gloria, un’wana wa vanhwanyana lavaya vambirhi lava ndzi rhambeleke eka dyondzo ya buku! A ndzi si tshama ndzi tisola hi xiboho xexo. Gloria a a ri mbhuri naswona wa ha ri tano ninamuntlha. Eka mina, Gloria u fana ni Dayimani leyi munhu a nga navelaka ku va na yona kambe mina se ndzi yi kumile. I nsati wa mina! I nge a mi chumbutela katsongo hi ta vutomi byakwe:

“A ndzi ri un’wana wa vana va 17. Manana a ri Mbhoni yo tshembeka. U love loko ndzi ri ni malembe ya 14. Wolowo i nkarhi lowu tatana a sunguleke ku dyondza Bibele ha wona. Leswi manana a nga ha ri kona, tatana u endle xikombelo eka nhloko ya xikolo. Leswi sesi wa mina a ri eka giredi 12, tatana u kombele leswaku mina na sesi hi ya exikolweni hi masiku lama hambaneke. A hi ta cincana leswaku un’wana a sala ekaya a khathalela vana ni ku sweka swakudya swa nimadyambu. Nhloko ya xikolo yi pfumerile naswona lunghiselelo rero ri ye emahlweni kukondza sesi a heta xikolo. Mindyangu yimbirhi ya Timbhoni ta Yehovha yi dyondze Bibele na hina naswona mina ni vamakwerhu va khume, hi ve Timbhoni ta Yehovha. A ndzi rhandza ntirho wa nsimu hambileswi a ndzi ri ni tingana. Hi ku famba ka nkarhi Sam u ndzi pfunile ku hlula xiphiqo xexo.”

Mina na Gloria hi tekane hi February 1959. Hi tiphinile hi ku phayona swin’we. Hi July, lembe rero, hi endle xikombelo xo ya tirha eBethele hikuva a hi navela ku ya tirha eyindlunkulu ya misava hinkwayo. Makwerhu Simon Kraker, u vulavurisane na hina. U hi byele leswaku hi nkarhi wolowo vatekani a va nga amukeriwi eBethele. Ku navela ka hina ku ya tirha eBethele a ku helanga kambe hi boheke ku rindza nkarhi wo leha.

Hi tsalele yindlunkulu ya misava hinkwayo hi kombela leswaku va hi rhumela laha ku nga ni xilaveko lexikulu. Hi rhumeriwe ePine Bluff le Arkansas. Enkarhini wolowo a ku ri ni mavandlha mambirhi ePine Bluff, ra valungu ni ra vantima. Hi rhumeriwe evandlheni ra vantima leri a ri ri ni vahuweleri va 14.

KU LANGUTANA NI XIHLAWUHLAWU

U nga ha tivutisa leswaku hikwalaho ka yini mavandlha ya Timbhoni ta Yehovha a ma hambanisiwe hi ku ya hi rixaka. Nhlamulo ya olova, vanhu a va nga tihlawuleli eka swo tala emikarhini yoleyo. A ku ri ni milawu leyi a yi sivela ku hlangana ka vanhu va tinxaka leti nga faniki nakambe loko u yi tlula, vutomi bya wena a byi ta va ekhombyeni. Etindhawini to tala vamakwerhu a va ri ni xivangelo lexi twalaka xo chava leswaku loko vamakwerhu va tinxaka timbirhi vo hlanganyela swin’we, Holo ya Mfumo a yi ta onhiwa. Swilo swo tano a swi endleka. Loko Timbhoni ta vantima to kumiwa ti ri karhi ti chumayela hi yindlu ni yindlu laha ku tshamaka valungu, a ti ta khomiwa ni ku tlhela ti biwa. Leswaku hi kota ku yisa ntirho wo chumayela emahlweni, hi yingisele nawu hi ri ni ntshembo wa leswaku swilo swi ta cinca siku rin’wana.

Ensin’wini a ku ri ni mintlhontlho yin’wana. Loko hi ri karhi hi tirha ensin’wini ya vantima, mikarhi yin’wana hi xihoxo a hi gongondza endlwini ya valungu. A hi xiyaxiya loko swi fanerile leswaku hi endla xingheniso xo koma xa tsalwa kumbe hi va byela leswaku hi nghene hi xihoxo kutani hi hundza. Eka tindhawu tin’wana, sweswo a ko va tshamelo maxelo.

A hi fanele hi tlhela hi tirha hi matimba leswaku hi kuma swo hanya ha swona loko hi ri karhi hi phayona. Mintirho yo tala leyi a hi yi kuma a yi holela swimalana hi siku. Gloria a tirha emakaya ya vanhu. Eka yindlu yin’wana va ndzi pfumelele leswaku ndzi n’wi pfuna leswaku a ta hatla a heta. Kwalaho a hi nyikiwa swakudya swa ninhlikanhi leswi vuriwaka TV dinner, a hi swi dya swin’we na Gloria hi nga si chayisa. Vhiki na vhiki Gloria a endla ntirho wo ayina emutini wun’wana. Mina a ndzi basisa jarata, ndzi hlantswa mafasitere ni ku endla mintirho yin’wana ya le kaya. Emutini wun’wana wa valungu a hi hlantswa mafasitere, Gloria a hlantswa endzeni mina ndzi hlantswa ehandle. Ntirho wolowo wu hi tekele siku hinkwaro kutani va hi nyike swakudya swa ninhlikanhi. Gloria a dyela endlwini kambe a nga dyi swin’we ni vandyangu kasi mina a ndzi dyela egaraji. Sweswo a swi nga ndzi  karhati, phela swakudya swa kona a swi nandziha. Ndyangu wolowo a wu ri kahle kambe a ko va enkarhini wa xihlawuhlawu. Ndzi tsundzuka siku rin’wana loko hi yime egaraji ya petirolo. Endzhaku ko chela petirolo emovheni wa hina, ndzi kombelele Gloria leswaku a tirhisa xihambukelo eka mucheri wa petirolo. U ndzi honolerile kutani a ku, “Xi lotleriwile.”

SWIENDLO SWA MUSA LESWI NGA RIVALEKIKI

Nilokoswiritano, hi ve ni nkarhi wo tsakisa ni vamakwerhu naswona a hi tiphina hi ntirho wa nsimu! Loko hi fika ePine Bluff, hi tshame na makwerhu un’wana loyi hi nkarhi wolowo a ri nandza wa vandlha. Nsati wakwe a a nga ri Mbhoni naswona Gloria u sungule ku dyondza Bibele na yena. Kasi mina ndzi sungule ku dyondza Bibele ni n’wana wa vona wa nhwanyana swin’we ni nuna wakwe. Manana ni n’wana wakwe va endle xiboho xo tirhela Yehovha kutani va khuvuriwa.

A hi ri ni vanghana evandlheni ra valungu. A va hi rhamba eswakudyeni swa nimadyambu kambe a va swi endla exihundleni. Vandla ra Ku Klux Klan (KKK) leri a ri hlohlotela xihlawuhlawu ni madzolonga a ri tinyike matimba. Ndzi tsundzuka ndzi vona wanuna un’wana a tshame exitupini xa yindlu yakwe nimadyambu hi siku ra Halloween, a ambale lapi ro basa ni xihuku hilaha va vandlha ra KKK a va ambala hakona. Hambiswiritano, sweswo a swi va sivelanga vamakwerhu ku kombisa malwandla. Ndzi tsundzuka hi lavana ni mali yo ya enhlengeletanweni hiloko makwerhu un’wana a xava movha wa hina wa Ford wa 1950. Siku rin’wana endzhaku ka n’hweti loko hi huma ensin’wini, hi vuye hi karhele tanihi leswi a ku hisa swinene. Leswi hi swi voneke loko hi fika ekaya, swi hi hlamarisile. A ku ri ni movha wa hina, wu pakiwe emahlweni ka yindlu! A wu namekiwe rungula leri nge: “Hi mi nyika movha wa n’wina tanihi nyiko. Makwenu wa n’wina.”

Ku ni xiendlo xin’wana xa musa lexi ndzi nga taka ndzi nga xi rivali. Hi 1962, ndzi rhambiwe eXikolweni xa Vutirheli bya Mfumo lexi a xi ta khomeriwa eSouth Lansing le New York. A ku leteriwa lava rhangelaka emavandlheni, valanguteri va miganga ni va xifundzha ku ringana n’hweti. Hambiswiritano, loko ndzi kuma xirhambo, a ndzi nga tirhi naswona a hi koka exilogweni hi tlhelo ra timali. Kambe khampani ya thelefoni ya le Pine Bluff a yi ndzi kamberile ku vona loko ndzi fanelekela ntirho. Loko a va lo ndzi thola, a ndzi ta va ndzi ve munhu wa ntima wo sungula ku tirha ekhampanini yoleyo. Eku heteleleni va ndzi byele leswaku va ta ndzi thola. Xana a ndzi ta endla yini? Phela a ndzi nga ri na mali yo ya eNew York. A ndzi vona swi antswa ku amukela ntirho kutani ndzi nga yi exikolweni. Entiyisweni, loko ndza ha lava ku tsala papila ro vika leswaku a ndzi nge swi koti ku ya, ku humelele swin’wana leswi ndzi nga ta ka ndzi nga pfuki ndzi swi rivarile.

Makwerhu wa xisati loyi nuna wakwe a a nga ri Mbhoni u te laha a hi tshama kona nimixo kutani a ndzi nyika mvhilopho. A yi lo mphaa, hi mali. Yena ni vana vakwe lavatsongo a va hamba va pfuka nimixo va ya emasin’wini va ya kha khotoni (cotton) ni ku yi hlakulela leswaku va kuma mali leyi eneleke leswaku va ta ndzi nyika yona ndzi kota ku ya eNew York. Makwerhu yoloye wa xisati u te: “Famba exikolweni u ya dyondza hilaha u nga kotaka hakona kutani u vuya u ta hi dyondzisa!” Endzhakunyana, ndzi vutise khampani ya  thelefoni loko swi ta koteka leswaku ndzi sungula ku tirha endzhaku ka mavhiki ya ntlhanu. Nhlamulo yi te, “A swi nge koteki!” Kambe a swi ndzi karhatanga sweswo. Se a ndzi endle xiboho. Ndza tsaka leswi ndzi nga hlawulangiki ntirho wolowo!

Loko Gloria a tsundzuka loko ha ha ri ePine Bluff u ri: “A ndzi yi rhandza swinene nsimu ya kwale! A ndzi ri ni tidyondzo ta Bibele ta 15 ku ya eka 20. Nimixo a hi tirha hi yindlu na yindlu kutani endzhaku hi fambisa tidyondzo ta Bibele siku hinkwaro naswona mikarhi yin’wana ku ya fika hi 11 nivusiku. A hi tiphina entirhweni wa nsimu! A ndzi swi tsakela ku ya emahlweni ndzi tshama kwalaho. Ku vula ntiyiso, a ndzi nga swi tsakeli ku cinca xiavelo xexo hi ya endla ntirho wo endzela mavandlha kambe Yehovha a a swi tiva leswi a swi endla.” Hakunene a a swi tiva.

LOKO NDZI RI MULANGUTERI LA FAMBAFAMBAKA

Loko ha ha phayona ePine Bluff, hi endle xikombelo xo va maphayona yo hlawuleka. A hi ri ni ntshembo hikuva mulanguteri wa xifundzha a lava leswaku hi ya pfuna vandlha ra le Texas naswona a lava leswaku hi ya tirha kona tanihi maphayona yo hlawuleka. Ku cinca ko tano a hi ta ku tsakela. Hi yi rindzele nkarhi wo leha nhlamulo yo huma eRhavini kambe a ko fana na kwala! Eku heteleleni hi kume papila leri vulaka leswaku hi averiwe ntirho wo endzela mavandlha! A ku ri hi January 1965. Makwerhu Leon Weaver loyi sweswi a tirhaka tanihi muhlanganisi wa Komiti ya Rhavi ra le United States, u hlawuriwe ku va mulanguteri wa muganga hi nkarhi wun’we na mina.

Ku va mulanguteri wa muganga a swi ndzi chavisa. Se a swi endla lembe kumbe ku tlula mulanguteri wa xifundzha James A. Thompson, Jr. a ndzi kamberile ku vona loko ndzi ri ni timfanelo leti lavekaka. Hi musa u ndzi kombe laha ndzi nga antswisaka kona ni ku boxa timfanelo letinene leti mulanguteri wa muganga a faneleke a va na tona. Loko ndza ha ku va mulanguteri wa muganga ndzi hatle ndzi swi xiya leswaku switsundzuxo swakwe a swi fike hi nkarhi. Endzhaku ka loko ndzi averiwe ku va mulanguteri wa muganga, mulanguteri wa xifundzha wo sungula loyi ndzi tirheke na yena a ku ri Makwerhu Thompson. Ndzi dyondze swo tala eka makwerhu yoloye wo tshembeka.

Ndza wu tlangela mpfuno lowu ndzi wu kumeke eka vamakwerhu vo tshembeka

Enkarhini wolowo mulanguteri wa muganga a kuma ndzetelo wutsongo. Ndzi hete vhiki ndzi ri karhi ndzi dyondza hi ku languta mulanguteri wa muganga loko a endzele vandlha rin’wana. Kutani hi tlhele hi heta vhiki rin’wana a ri karhi a ndzi languta loko ndzi endzele vandlha rin’wana. U ndzi nyike swiringanyeto ni nkongomiso. Kambe endzhaku ka sweswo, a hi siya hi ri hexe. Ndzi tsundzuka ndzi ku eka Gloria, “Xana se i nkarhi wa leswaku a hi siya hi ri hexe?” Kambe, hi ku famba ka nkarhi, ku ni swin’wana swa nkoka leswi ndzi swi xiyeke evuton’wini, hileswaku ku tshama ku ri ni vamakwerhu lava lavaka ku ku pfuna loko u va pfumelela leswaku va ku pfuna. Ni sweswi  ndza ha wu tlangela mpfuno lowu ndzi wu kumeke eka vamakwerhu lava nga ni ntokoto, vo tanihi J. R. Brown loyi hi nkarhi wolowo a ri mulanguteri la fambafambaka na Fred Rusk loyi a nga xirho xa ndyangu wa Bethele.

Xihlawuhlawu a xi tinyike matimba enkarhini wolowo. Siku rin’wana ntlawa wa KKK a wu ri karhi wu toyitoya edorobeni leri a hi ri endzerile eTennessee. Ndzi tsundzuka nkarhi wun’wana loko mina ni vamakwerhu lava a hi ri na vona ensin’wini hi ri eku wiseni erhesiturente. Ndzi suke ndzi ya exihambukelweni naswona ndzi vone mulungu loyi a bohanile exikandzeni, a ri na tithathu loyi a a teka rixaka rakwe ri antswa eka rin’wana a suka a yima a ndzi landzela. Kambe makwerhu wa mulungu loyi a ri xihontlovila ku tlula mina kumbe mulungu luya wa tithathu, na yena u hi sale endzhaku. U ndzi vutise a ku: “Xana swi famba kahle Makwerhu Herd?” Kutani hi ku hatlisa wanuna luya wa tithathu u fambe handle ko nghena exihambukelweni. Loko nkarhi wu ri karhi wu famba, ndzi vone leswaku xihlawuhlawu a xi vangiwi hi muvala wa nhlonge kambe xi vangiwa hi xidyoho xa Adamu lexi hinkwerhu hi nga na xona. Ndzi dyondze leswaku makwerhu hambiloko a ri ni muvala wa nhlonge lowu hambaneke ni wa wena, a nga ku fela loko swi laveka.

KU KUMA MIKATEKO LEYI FUWEKE EKU HETELELENI

Hi hete malembe ya 12 entirhweni wo endzela mavandlha naswona hi hete malembe ya 21 eka wo endzela swifundzha. Wolawo a ku ri malembe lama tsakisaka ma tlhela ma va ni mintokoto yo tala leyi khutazaka. Hambiswiritano, mikateko yin’wana a ya ha ta. Hi August 1997, ku navela ka hina ka khale ku hetisekile. Endzhaku ka malembe ya 38 hi endle xikombelo, hi rhambiwe ku ya tirha eBethele ya le United States. Hi sungule ku tirha eBethele hi September 1997. A ndzi anakanya leswaku vamakwerhu lava nga ni vutihlamuleri eBethele, a va lava ndzi ya pfuna swa xinkarhana kambe a swi vanga tano.

Gloria a a ri mbhuri loko ndzi n’wi teka naswona wa ha ri tano ninamuntlha

Eku sunguleni a ndzi averiwe ku tirha eka Ndzawulo ya Ntirho. Ndzi dyondze swo tala kwalaho. Vamakwerhu lava tirhaka kwalaho va tirha hi timhaka ta xihundla ni swivutiso swo tika leswi humaka eka tihuvo ta vakulu ni valanguteri va miganga etikweni hinkwaro. Ndza tsaka leswi vamakwerhu va ndzi lehiseleke mbilu loko va ndzi pfuna ni ku ndzi letela. Nilokoswiritano, ndzi ehleketa leswaku loko ndzo averiwa ku ya tirha kona nakambe, ndza ha ta dyondza swo tala.

Mina na Gloria ha byi rhandza vutomi bya laha Bethele. Loko hi nga si ta eBethele, a hi toloverile ku pfuka nimixo naswona sweswo swa pfuna loko u ri eBethele. Endzhaku ka lembe kumbe ku tlula, ndzi sungule ku tirha tanihi mupfuni eka Komiti ya Ntirho ya Huvo leyi Fumaka ya Timbhoni ta Yehovha. Kutani hi 1999, ndzi hlawuriwe ku va xirho xa Huvo leyi Fumaka. Ndzi dyondze swo tala eka xiavelo lexi, kambe xa nkoka swinene lexi ndzi xi dyondzeke, i ndlela leyi swi nga erivaleni ha yona leswaku Yesu Kreste hi yena nhloko ya vandlha ra Vukreste, a hi munhu wo karhi.

Hi 1999, ndzi ve ni lunghelo ro tirha tanihi xirho xa Huvo leyi Fumaka

Loko ndzi tsundzuka ta khale, minkarhi yin’wana ndzi twa onge vutomi bya mina byi fana ni bya muprofeta Amosi. Yehovha u xiye murisi yoloyo, loyi a a titsongahata ni ku tirha ntirho wa xiyimo xa le hansi wa ku kha makuwa ya swinkuwana, ku nga swakudya leswi a swi tekiwa swi ri swa swisiwana. Xikwembu xi hlawule Amosi leswaku a va muprofeta, ku nga xiavelo lexi tisaka mikateko leyi fuweke. (Amo. 7:14, 15) Na mina, Yehovha u ndzi vonile hambileswi ndzi nga n’wana wa murimi la nga xisiwana wa le Liberty, eIndiana kutani a ndzi chululela mikateko yo tala swinene leyi fuweke lerova a yi hlayeki! (Swiv. 10:22) Entiyisweni, ndzi kule ndzi ri xisiwana kambe eku heteleleni ndzi kume mikateko yo tala swinene, leyi a a ndzi nga yi anakanyi!