VANA va Israyele va tshame malembe yo tala aEgipta naswona swilo a swi va fambela kahle hi hala tlhelo a va ri karhi va andza. Kambe, ku sungule ku fuma Faro un’wana. Mufumi loyi a a nga n’wi tivi Yosefa. Tanihi leswi a a ri mufumi la nga ni tihanyi loyi a a chava leswaku Vaisrayele va andza, u va endle mahlonga a tlhela a lerisa leswaku vana va vona hinkwavo va vafana lava a va ha ku velekiwa va n’werisiwa eNambyeni wa Nayili. Kambe manana un’wana loyi a a ri ni xivindzi u sirhelele ricece ra yena ra jaha ivi a ri tumbeta endzeni ka xirhundzu lexi a nga xi veka etinhlangeni. N’wana wa xisati wa Faro u kume ricece rero ivi a ri thya vito ra Muxe kutani a ri kurisela endyangwini wa vuhosi wa le Egipta.

Loko Muxe a ri ni malembe ya 40 hi vukhale, u ve ekhombyeni hileswi a a lava ku sirhelela Muisrayele eka ndhuna leyi nga Muegipta. Muxe u balekele etikweni ra le kule swinene, laha a nga fika a tumbela kona. Loko a ri ni malembe ya 80 hi vukhale, Yehovha u n’wi rhume leswaku a tlhelela aEgipta ku ya byela Faro leswaku u fanele a ntshunxa vanhu va Xikwembu.

Faro a nga swi endlanga sweswo. Hiloko Xikwembu xi hlasela Egipta hi makhombo ya khume. Minkarhi hinkwayo loko Muxe a ya eka Faro leswaku a ya n’wi byela leswaku a nga swi kota ku papalata khombo leri a ri ta n’wi wela, Faro u sihalarile a ala ku yingisa Muxe ni Xikwembu xa yena Yehovha. Eku heteleleni, khombo ra vukhume ri dlaye vana va mativula hinkwavo va le tikweni—handle ka vana va mindyangu leyi yingiseke Yehovha hi ku xuva ngati ya xinyimpfana lexi nga xitlhavelo emarimbeni ya minyangwa ya vona. Ntsumi ya Xikwembu leyi a yi tele ku ta lovisa mativula hinkwawo yi tlule tiyindlu toleto. Endzhaku ka sweswo Vaisrayele va tlangele ku ponisiwa hi ndlela yoleyo leyi hlamarisaka hi ku va ni nkhuvo wa lembe ni lembe lowu vuriwaka Paseka.

Tanihi leswi n’wana wa jaha la nga mativula wa Faro se a a file, Faro u lerise Muxe ni Vaisrayele hinkwavo leswaku va famba etikweni ra Egipta. Hi nkarhi wolowo va hlengelete vanhu vo tala leswaku va rhurha etikweni rero. Kambe Faro u cince miehleketo ya yena. Hiloko a hlengeleta tinhenha to tala ni makalichi ivi a va hlongorisa. A swi tikomba onge a yi nga ha ri kona ndlela yo baleka loko Vaisrayele va fika eribuweni ra Lwandle ro Tshwuka. Yehovha u endle leswaku mati ya Lwandle ro Tshwuka ma avana leswaku Vaisrayele va ta tsemakanya endhawini leyi omeke leyi a yi ri exikarhi ka lwandle! Loko Vaegipta va sungula ku va hlongorisa, Xikwembu xi tlherisele mati ivi Faro ni mavuthu ya yena va nwela.

Hi ku famba ka nkarhi, loko Vaisrayele va dzima mixaxa ekusuhi ni ntshava ya Sinayi, Yehovha u endle ntwanano na vona. Xikwembu xi tirhise Muxe tanihi muhlanganisi leswaku xi hundzisela milawu eka Vaisrayele, leyi a yi ta va kongomisa ni ku va sirhelela siku rin’wana ni rin’wana. Loko Vaisrayele a va ta pfumela hi timbilu hinkwato ku lawuriwa hi Xikwembu, Yehovha a a ta va sirhelela naswona vanhu van’wana a va ta katekisiwa hi tiko rero.

Hambiswiritano, Vaisrayele vo tala a va vanga ni ripfumelo eka Xikwembu. Hikwalaho, Yehovha u endle leswaku xitukulwana xexo xi tsendzeleka emananga ku ringana malembe ya 40. Kutani Muxe u hlawule Yoxuwa leswaku a n’wi tlhandlama. Eku heteleleni Vaisrayele a va ri kusuhi ni ku nghena etikweni leri Xikwembu a xi ri tshembise Abrahama.

—Xi sekeriwe eka Eksoda; Levhitika; Tinhlayo; Deteronoma; Tipisalema 136:10-15; Mintirho 7:17-36.