YEHOVHA a a swi tiva leswaku siku rin’wana N’wana wa yena loyi a n’wi rhandzaka a a ta xaniseka a tlhela a fa. Vuprofeta lebyi kumekaka eka Genesa 3:15 byi vulavule katsongo hi sweswo. Xana Xikwembu a xi ta swi kotisa ku yini ku komba ndlela leyi a xi ta titwa ha yona hi rifu ra n’wana wa xona? Bibele yi nyika xikombiso lexi yi hlamuselaka kahle mhaka leyi. Xikwembu xi kombele Abrahama leswaku a nyikela hi Isaka, n’wana wa yena loyi a a n’wi rhandza.

Abrahama a a ri ni ripfumelo leri tiyeke swinene. Tsundzuka leswaku Xikwembu a xi n’wi tshembise leswaku Mukutsuri kumbe Mbewu leyi ku nga vulavuriwa ha yona a yi ta huma erixakeni ra Isaka. Tanihi leswi Abrahama a a tshemba leswaku Xikwembu xi ta pfuxa Isaka, a a tiyimisele ku ya nyikela hi n’wana wa yena. Kambe ntsumi ya Xikwembu yi sivele Abrahama a nga si n’wi dlaya n’wana wa yena. Tanihi leswi Xikwembu a xi tsakisiwe hi leswaku Abrahama a a tiyimisele ku nyikela hi n’wana loyi a a n’wi rhandza, xi tlhele xi phindha xitshembiso lexi xi xi vuleke eka Abrahama.

Hi ku famba ka nkarhi Isaka u ve ni vana vambirhi va majaha ku nga Esawu na Yakobe. Ku hambana na Esawu, Yakobe a a tlangela swilo swo kwetsima naswona u kume hakelo ya yena. Xikwembu xi cince vito ra Yakobe ri va Israyele naswona vana va majaha va Israyele va 12 va ve tinhloko ta tinxaka ta Israyele. Kambe, xana ndyangu wolowo wu ve tiko lerikulu hi ndlela yihi?

Swiendlakalo swo tala swi sungule loko vana volavo vo hlayanyana va sungula ku vondzoka Yosefa ndzisana ya vona. Va n’wi xavisile ivi a va hlonga ra le Egipta. Kambe Xikwembu xi katekise muntshwa yoloye loyi a a tshembekile naswona a ri ni xivindzi. Hambileswi Yosefa a a langutane ni swiyimo swo tika, hi ku famba ka nkarhi u hlawuriwe hi Faro—loyi a a ri mufumi wa le Egipta—kutani a n’wi nyika vulawuri. Sweswo swi fike hi nkarhi hikuva loko Yosefa a ri mulanguteri wa swakudya hinkwaswo aEgipta, ku ve ni ndlala leyi endleke leswaku Yakobe a rhumela vana va yena van’wana etikweni ra Egipta leswaku va ya xava swakudya! Endzhaku ka loko Yosefa a hlangane ni vamakwavo lava a va hundzukile, u va rivalerile ivi a hlela leswaku ndyangu hinkwawo wu rhurhela aEgipta. Ndyangu wolowo wu nyikiwe tiko lerinene, laha a wu ta hambeta wu andza eka rona nileswaku swilo swi wu fambela kahle. Yosefa a a swi twisisa leswaku Xikwembu xi hlele swilo hi ndlela yoleyo leswaku xi ta hetisisa switshembiso swa xona.

Yakobe loyi se a a dyuharile, u hanye vutomi bya yena hinkwabyo aEgipta naswona a a tshama ni ndyangu wa yena lowu a wu andza. Loko a nga si fa, u profete leswaku Mbewu leyi tshembisiweke kumbe Mukutsuri a a ta va Mufumi la nga ni matimba, loyi a a ta huma erixakeni ra n’wana wa yena wa jaha ku nga Yuda. Endzhaku ka malembe yo karhi, loko Yosefa a nga si fa, u profete leswaku siku rin’wana, Xikwembu xi ta humesa ndyangu wa Yakobe aEgipta.

—Xi sekeriwe eka Genesa ndzima 20 ku ya eka ndzima 50; Vaheveru 11:17-22.