VANDLHA leri a ra ha ku simekiwa ra Vukreste a ri ta hetisisa xiyenge xa nkoka eka xikongomelo xa Yehovha. Kambe Vakreste va lembe-xidzana ro sungula va hatle va hlaseriwa. Xana a va ta tshembeka eka Xikwembu loko va xanisiwa hi vakaneti ni loko va langutane ni swiphiqo swin’wana swa le vandlheni? Matsalwa ya Vukreste ya Xigriki ma ni mapapila ya 21 lama nga ni xitsundzuxo ni xikhutazo leswi a swi laveka.

Mapapila ya 14—lama sukelaka eka Varhoma ku ya eka Vaheveru—ma tsariwe hi muapostola Pawulo. Mapapila wolawo ma vitaniwa hi mavito ya vanhu lava a ma tsaleriwe vona—ku nga ha va munhu wo karhi kumbe swirho swa vandlha ro karhi. Xiya timhaka tin’wana leti mapapila ya Pawulo ma vulavulaka ha tona.

Xitsundzuxo malunghana ni mahanyelo ni ku tikhoma lokunene. Lava va endlaka vumbhisa, vuoswi ni swidyoho swin’wana leswikulu “va nge dyi ndzhaka ya mfumo wa Xikwembu.” (Vagalatiya 5:19-21; 1 Vakorinto 6:9-11) Vagandzeri va Xikwembu va fanele va va ni vun’we ku nga khathariseki leswaku i va rixaka rihi. (Varhoma 2:11; Vaefesa 4:1-6) Va fanele va tsakela ku titsona swo karhi leswaku va pfuna vapfumeri-kulobye lava pfumalaka. (2 Vakorinto 9:7) Pawulo u te: “Khongelani minkarhi hinkwayo.” Hakunene, vagandzeri va khutaziwa ku chulula leswi nga le timbilwini ta vona eka Yehovha hi xikhongelo. (1 Vatesalonika 5:17; 2 Vatesalonika 3:1; Vafilipiya 4:6, 7) Xikwembu xi yingisa swikhongelo leswi vuriwaka hi ripfumelo.—Vaheveru 11:6.

I yini leswi nga ta pfuna mindyangu leswaku swilo swi yi fambela kahle? Vanuna va fanele va rhandza vasati va vona tanihi mimiri ya vona. Vasati va fanele va va ni xichavo xo enta eka vanuna va vona. Vana va fanele va yingisa vatswari va vona, hikuva leswi swa xi tsakisa Xikwembu. Vatswari va fanele va kongomisa ni ku letela vana va vona hi rirhandzu, va tirhisa milawu leyi kongomisaka leyi kumekaka eRitweni ra Xikwembu.—Vaefesa 5:22–6:4; Vakolosa 3:18-21.

Vakreste va pfuniwile ku twisisa xikongomelo xa Xikwembu. Swiyenge swo tala swa Nawu wa Muxe a swi sirhelela ni ku kongomisa Vaisrayele ku kondza ku fika Kreste. (Vagalatiya 3:24) Hambiswiritano, Vakreste a va nga boheki ku hlayisa Nawu wolowo loko va gandzela Xikwembu. Loko Pawulo a tsalela Vaheveru, ku nga Vakreste lava kurisiweke hi ndlela ya Xiyuda, u hlamusele leswi Nawu a wu vula swona ni ndlela leyi xikongomelo xa Xikwembu xi hetisekaka ha yona eka Kreste. Pawulo u hlamusele leswaku swiyenge swo hambana-hambana swa Nawu wolowo a  swi ri vuprofeta bya nkoka. Hi xikombiso, ku endliwa ka switlhavelo hi swiharhi a swi fanekisela rifu ra Yesu leri nga gandzelo, leri a ri ta endla leswaku vanhu va rivaleriwa swidyoho hi ku helela. (Vaheveru 10:1-4) Xikwembu xi herise ntwanano wolowo wa Nawu hi ku tirhisa rifu ra Yesu, hikuva a wu nga ha laveki.—Vakolosa 2:13-17; Vaheveru 8:13.

Nkongomiso malunghana ni ndlela leyi vandlha ri faneleke ri hleriwa ha yona. Vavanuna lava tiyimiseleke ku tirhisiwa evandlheni va fanele va va ni mahanyelo lamanene va tlhela va va ni timfanelo leti hlamuseriweke eBibeleni. (1 Timotiya 3:1-10, 12, 13; Tito 1:5-9) Vagandzeri va Yehovha Xikwembu va fanele va hlengeletana ni vapfumeri-kulobye nkarhi na nkarhi leswaku va khutazana. (Vaheveru 10:24, 25) Minhlangano ya vandlha yi fanele yi va leyi akaka naswona yi dyondzisa.—1 Vakorinto 14:26, 31.

Loko Pawulo a tsala papila ra vumbirhi leri yaka eka Timotiya, a a ri eRhoma; a a khotsiwile naswona a a yimele ku avanyisiwa. A ku ri vanhu va nga ri vangani lava nga ni xivindzi lava a va n’wi endzela. Pawulo a a swi tiva leswaku a a saleriwe hi nkarhi wutsongo. U te: “Ndzi lwe nyimpi leyinene, ndzi tsutsume pfhumba ndzi kondza ndzi heta, ndzi hlayise ripfumelo.” (2 Timotiya 4:7) Swi nga ha endleka Pawulo u dlayeriwe ripfumelo endzhakunyana ka kwalaho. Kambe, hambi ku ri namuntlha mapapila ya muapostola loyi ma ha kongomisa vagandzeri va ntiyiso va Xikwembu.

—Xi sekeriwe eka Varhoma; 1 Vakorinto; 2 Vakorinto; Vagalatiya; Vaefesa; Vafilipiya; Vakolosa; 1 Vatesalonika; 2 Vatesalonika; 1 Timotiya; 2 Timotiya; Tito; Filemoni; Vaheveru.