Nghena endzeni

Hundzela eka leswi nga endzeni

 DYONDZO 2

Xikwembu I Munghana Lonene Ku Tlula Hinkwavo

Xikwembu I Munghana Lonene Ku Tlula Hinkwavo

Ku va munghana wa Xikwembu i nkateko lowukulu. Xikwembu xi ta ku dyondzisa ndlela yo kuma ntsako ni nsirhelelo; xi ta ku ntshunxa eka tidyondzo to tala leti hoxeke ni le ka mikhuva leyi nga ni khombo. Xi ta yingisa swikhongelo swa wena. Xi ta ku pfuna leswaku u va ni ku rhula u tlhela u va ni ntshembo. (Pisalema 71:⁠5; 73:​28) Xikwembu xi ta ku seketela eminkarhini yo nonon’hwa. (Pisalema 18:​18) Naswona Xikwembu xi ku nyika nyiko ya vutomi lebyi nga heriki.​—⁠Varhoma 6:⁠23.

Loko vuxaka bya wena ni Xikwembu byi ya byi kula, ni vuxaka bya wena ni vanghana va Xikwembu byi ta kula. Na vona va ta hundzuka vanghana va wena. Kahle-kahle, va ta va vamakwenu. Va ta tsakela ku ku dyondzisa hi Xikwembu naswona va ta ku pfuna ni ku ku khutaza.

A hi ringani na xona Xikwembu. Loko u lava ku va munghana wa Xikwembu, ku ni mhaka yin’wana ya nkoka leyi u faneleke u yi twisisa. Ku va munghana wa Xikwembu a swi fani ni ku va munghana wa munhu un’wana. I khale swinene xi ri kona, naswona xi tlharihe ngopfu ni ku va ni matimba swinene ku hi tlula. Xi ni mfanelo ya ku va Mufumi wa hina. Kutani loko hi lava ku va munghana wa xona, hi fanele hi xi yingisa ni ku endla leswi xi hi byelaka leswaku hi swi endla. Leswi swi ta hi vuyerisa minkarhi hinkwayo.​—⁠Esaya 48:​18.