Nghena endzeni

Hundzela eka leswi nga endzeni

 DYONDZO 18

Vana Munghana Wa Xikwembu Hilaha Ku Nga Heriki!

Vana Munghana Wa Xikwembu Hilaha Ku Nga Heriki!

Leswaku u va ni munghana swi lava matshalatshala; naswona leswaku u hlayisa vunghana byebyo swi lava matshalatshala. Matshalatshala ya wena yo va munghana wa Xikwembu naswona u tshama u ri munghana, ma ta katekisiwa swinene. Yesu u byele lava a va pfumela eka yena a ku: “Ntiyiso wu ta mi ntshunxa.” (Yohane 8:​32) Xana leswi swi vula yini?

U nga ntshunxeka sweswi. U nga ntshunxeka eka tidyondzo ta mavunwa ni le ka mavunwa lama hangalasiweke hi Sathana. U nga va na wona ntshembo lowu vanhu va timiliyoni lava nga tiviki Yehovha va nga riki na wona. (Varhoma 8:​22) Vanghana va Xikwembu va ntshunxekile, a va ha ri ‘chavi rifu.’​—⁠Vaheveru 2:​14, 15.

U nga kuma ntshunxeko emisaveni leyintshwa ya Xikwembu. Mawaku ntshunxeko lowukulu lowu u nga tiphinaka ha wona enkarhini lowu taka! Emisaveni leyi nga Paradeyisi, a ku nge he vi na nyimpi, vuvabyi ni vugevenga. A ku nge he vi na vusweti ni ndlala. A ku nge he vi na vudyuhari ni rifu. A ku nge he vi na ku chava, ntshikilelo ni vuhomboloki. Bibele yi vula leswi hi Xikwembu: “U pfula voko ra wena u enerisa ku navela ka xilo xin’wana ni xin’wana lexi hanyaka.”​—⁠Pisalema 145:⁠16.

 Vanghana va Xikwembu va ta hanya hilaha ku nga heriki. Vutomi lebyi nga heriki i nyiko ya risima leyi Xikwembu xi nga ta yi nyika hinkwavo lava lavaka ku va vanghana va xona. (Varhoma 6:​23) Wa nga anakanya hi leswi vutomi lebyi nga heriki byi nga ta vula swona eka wena!

U ta va ni nkarhi wa ku endla swilo swo tala. Kumbexana u ta lava ku dyondza ku tlanga xichayana xa vuyimbeleri. Kumbe u ta lava ku dyondza ku dirowa swifaniso kumbe ku va muvatli. U nga ha tsakela ku dyondza hi swiharhi kumbe swimilana. Kumbexana u lava ku famba u vona matiko yo hambana-hambana ni vanhu va kona. Vutomi lebyi nga heriki byi ta endla leswaku swilo leswi hinkwaswo swi koteka!

U ta va ni nkarhi wa ku va ni vanghana vo tala. Ku hanya hilaha ku nga heriki swi ta endla leswaku u kota ku tiva vanhu van’wana vo tala lava va nga vanghana va Xikwembu. U ta tiva vuswikoti bya vona ni timfanelo ta vona letinene, kasi na vona va ta va vanghana va wena. U ta va rhandza, na vona va ta ku rhandza. (1 Vakorinto 13:⁠8) Ku va ni vutomi lebyi nga heriki swi ta endla leswaku u va ni nkarhi wa ku va ni xinghana ni munhu un’wana ni un’wana laha misaveni! Xa nkoka swinene, vunghana bya wena na Yehovha byi ta tshama byi ri karhi byi kula loko malembe ma ri karhi ma hundza. Onge u nga va munghana wa Xikwembu hilaha ku nga heriki!