Nghena endzeni

Hundzela eka leswi nga endzeni

 DYONDZO 11

Papalata Vukhongeri Bya Mavunwa!

Papalata Vukhongeri Bya Mavunwa!

Sathana ni madimona yakwe a va swi lavi leswaku u gandzela Xikwembu. Va lava ku hambukisa vanhu hinkwavo leswaku va tshika ku gandzela Xikwembu loko swi koteka. Xana leswi va swi endlisa ku yini? Ndlela yin’wana leyi va yi tirhisaka i vukhongeri bya mavunwa. (2 Vakorinto 11:​13-⁠15) Vukhongeri i bya mavunwa loko byi nga dyondzisi ntiyiso lowu humaka eBibeleni. Vukhongeri bya mavunwa byi fana ni mali ya vuxisi​—⁠yi nga ha vonaka yi ri ya xiviri, kambe a yi pfuni nchumu. Yi nga ku hoxa ekhombyeni lerikulu.

Mavunwa ya vukhongeri a ma nge pfuki ma n’wi tsakisile Yehovha, Xikwembu xa ntiyiso. Loko Yesu a ri emisaveni, a ku ri ni ntlawa wa vukhongeri lowu a wu lava ku n’wi dlaya. A wu anakanya leswaku ndlela leyi wu gandzelaka ha yona i yinene. Wu te: “Hi ni Tatana un’we, ku nga Xikwembu.” Xana Yesu u pfumelelane na wona? Doo! U te: “N’wina mi huma eka tata wa n’wina Diyavulosi.” (Yohane 8:​41, 44) Namuntlha vanhu vo tala va anakanya leswaku va gandzela Xikwembu, kambe kahle-kahle va tirhela Sathana ni madimona yakwe!​—⁠1 Vakorinto 10:⁠20.

 Tanihi leswi murhi wo bola wu humesaka mihandzu yo biha, vukhongeri bya mavunwa byi humesa vanhu lava endlaka swilo swo biha. Misava leyi yi tele hi swiphiqo hikwalaho ka swilo swo biha leswi vanhu va swi endlaka. Ku ni mahanyelo yo biha, ku lwa, ku yiva, ku xanisiwa, ku dlayiwa ni ku pfinyiwa. Vo tala va lava endlaka swilo leswi swo biha i vanhu va vukhongeri, kambe vukhongeri bya vona a byi va susumeteli ku endla leswinene. A va nge vi vanghana va Xikwembu handle ka loko vo tshika ku endla swilo swo biha.​—⁠Matewu 7:​17, 18.

Vukhongeri bya mavunwa byi dyondzisa vanhu ku gandzela swifaniso. Xikwembu xi vula leswaku hi nga gandzeli swifaniso. Leswi swa twala. Xana a wu ta swi tsakela loko munhu wo karhi a nga ku vulavurisi kambe a vulavurisa xifaniso xa wena? Xana munhu yoloye a a ta va munghana wa wena wa ntiyiso? E-e, a nga ta va yena. Yehovha u lava leswaku vanhu va vulavula na yena, va nga vulavuli ni xifaniso kumbe xinepe, lexi nga hanyiki.​—⁠Eksoda 20:​4, 5.

Vukhongeri bya mavunwa byi dyondzisa leswaku swi lulamile ku dlaya vanhu van’wana hi nkarhi wa nyimpi. Yesu u vule leswaku vanghana va Xikwembu va ta rhandzana. A hi nge va dlayi vanhu lava hi va rhandzaka. (Yohane 13:​35) Swi hoxile ku dlaya hambi ku ri ku dlaya vanhu vo biha. Loko valala va Yesu va tela ku ta n’wi khoma, a nga va pfumelelanga vadyondzisiwa va yena ku n’wi sirhelela hi ku lwa.​—⁠Matewu 26:​51, 52.

Vukhongeri bya mavunwa byi dyondzisa leswaku vanhu lavo homboloka va ta xanisiwa endzilweni wa tihele. Kambe, Bibele yi dyondzisa leswaku xidyoho xi yisa eku feni. (Varhoma 6:​23) Yehovha i Xikwembu xa rirhandzu. Xana Xikwembu lexi nga ni rirhandzu xi nga xanisa vanhu hilaha ku nga heriki? A swi nge vi tano! EParadeyisini, ku ta va ni vukhongeri byin’we ntsena, ku nga lebyi Yehovha a byi amukelaka. (Nhlavutelo 15:⁠4) Vukhongeri hinkwabyo lebyi sekeriweke eka mavunwa ya Sathana byi ta va byi nga ha ri kona.