Nghena endzeni

Hundzela eka leswi nga endzeni

 DYONDZO 5

Vanghana Va Xikwembu Va Ta Hanya Eparadeyisini

Vanghana Va Xikwembu Va Ta Hanya Eparadeyisini

Paradeyisi a yi nge fani ni misava leyi hi hanyaka eka yona sweswi. Xikwembu a xi nga lavanga leswaku misava leyi yi tala hi maxangu ni nhlomulo, switlhavi ni ku xaniseka. Enkarhini lowu taka, Xikwembu xi ta endla misava leyi yi va paradeyisi. Xana Paradeyisi yi ta va yi ri njhani? A hi voneni leswaku Bibele yi ri yini:

Vanhu lavanene. Paradeyisi yi ta va kaya ra vanghana va Xikwembu. Va ta endlelana swilo leswinene. Va ta hanya hi ku pfumelelana ni tindlela letinene ta Xikwembu.​—⁠Swivuriso 2:⁠21.

Ndzalo ya swakudya. EParadeyisini, a ku nge he vi na ndlala. Bibele yi ri: “Ku ta va ni mavele [kumbe swakudya swo] tala emisaveni.”​—⁠Pisalema 72:⁠16.

Tiyindlu letinene ni ntirho lowu tsakisaka. Emisaveni leyi nga Paradeyisi, ndyangu wun’wana ni wun’wana wu ta va ni kaya ra wona. Munhu un’wana ni un’wana u ta endla ntirho lowu nga ta n’wi tsakisa hakunene.​—⁠Esaya 65:​21-⁠23.

 Ku rhula emisaveni hinkwayo. Vanhu a va nge he lwi hambi ku ri ku fela enyimpini. Rito ra ­Xikwembu ri ri: “[Xikwembu xi] herisa tinyimpi.”​—⁠Pisalema 46:​8, 9.

Rihanyo lerinene. Bibele ya tshembisa: “Ku hava munhu la tshamaka [eParadeyisini] la nga ta ku: ‘Ndza vabya.’” (Esaya 33:​24) Nakambe, a ku na munhu la nga ta va a lamarile kumbe a ri bofu kumbe a fe tindleve kumbe a ri mbheveve.​—⁠Esaya 35:⁠5, 6.

Switlhavi, nhlomulo ni rifu swi ta va swi herile. Rito ra Xikwembu ri ri: “Rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”​—⁠Nhlavutelo 21:⁠4.

Vanhu lavo biha va ta va va nga ha ri kona. Yehovha wa tshembisa: “Lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”​—⁠Swivuriso 2:⁠22.

Vanhu va ta rhandzana ni ku xiximana. A ku nge he vi na vuhomboloki, ku tshikileriwa, makwanga ni rivengo. Vanhu va ta va ni vun’we naswona va ta hanya hi ku pfumelelana ni tindlela ta Xikwembu leto lulama.​—⁠Esaya 26:⁠9.