Nghena endzeni

Hundzela eka leswi nga endzeni

 NDZIMA 7

Vafi Va Ta Pfuxiwa!

Vafi Va Ta Pfuxiwa!

1-3. I yini lexi hinkwerhu ka hina hi nga ta ka hi nga xi balekeli naswona Yehovha u ta hi ntshunxa njhani eka xona?

EHLEKETA u gweviwe ku tshama ejele vutomi hinkwabyo hikwalaho ka vugevenga lebyi u nga byi endlangiki. A swi tshembisi leswaku u ta kala u ntshunxiwa. A wa ha ri na ntshembo naswona a xi kona lexi u nga xi endlaka. Leswi u heleriweke hi ntshembo, u kuma leswaku ku na munhu un’wana loyi a nga ni matimba yo ku humesa naswona u ku tshembisa leswaku u ta ku pfuna! A wu ta titwa njhani?

2 Hinkwerhu ha fa. Hambiloko ho endla yini, a hi nge swi koti ku balekela rifu. Kambe Yehovha u ni matimba yo hi ponisa eka rifu. Nakambe u hi tshembisa leswaku “rifu i nala wo hetelela la nga ta herisiwa.”—1 Vakorinto 15:26.

3 Ehleketa ntsako lowu u nga ta va na wona loko u nga ha vilerisiwi hi ku fa! Kambe Yehovha a nge herisi rifu ntsena. U ta tlhela a pfuxa lava se va feke. Ehleketa ndlela leyi sweswo swi nga ta vula swona eka wena. U tshembisa leswaku lava “hluriweke hi rifu” va ta tlhela va hanya. (Esaya 26:19) Leswi hi swona leswi Bibele yi swi vulaka hi ku pfuxiwa ka vafi.

LOKO MUNHU LOYI HI N’WI RHANDZAKA A FA

4. (a) I yini lexi nga hi chavelelaka loko hi feriwa hi xirho xa ndyangu kumbe munghana? (b) A ku ri vamani vanghana lavakulu va Yesu?

4 Loko xirho xa ndyangu kumbe munghana lonkulu a fa, ku vava ni gome leri hi vaka na rona a swi tiyiseleleki.  Hi titwa hi nga pfuni nchumu. A hi nge swi koti ku pfuxa munhu yoloye leswaku a tlhela a hanya. Kambe Bibele ya hi chavelela. (Hlaya 2 Vakorinto 1:3, 4.) A hi kambisiseni xikombiso lexi kombisaka ndlela leyi Yehovha na Yesu va swi lavaka ha yona ku pfuxa vanhu lava hi va rhandzaka. Loko Yesu a ha ri emisaveni, a a tala ku endzela Lazaro ni vamakwavo vakwe, Marta na Mariya. Havanharhu ka vona a va ri vanghana lavakulu va Yesu. Bibele yi ri: ‘Yesu a a rhandza Marta, Mariya na Lazaro.’ Kutani siku rin’wana Lazaro u file.—Yohane 11:3-5.

5, 6. (a) Yesu u endle yini loko a vona ndyangu wa ka va Lazaro wu ri eku rileni? (b) Ha yini swi chavelela ku tiva ndlela leyi Yesu a titweke ha yona hi rifu?

5 Yesu u ye a ya chavelela Marta na Mariya. Loko Marta a twa leswaku Yesu u le ku teni, u ye ehandle ka muti kutani a ya hlangana na yena. A a tsakile loko a vona Yesu kambe u n’wi byele leswi: “Loko a wu ri kona laha, makwerhu ingi a nga fanga.” Marta a a ehleketa leswaku Yesu u hlwele ku fika. Endzhaku, loko Yesu a vona Mariya makwavo wa Marta a ri eku rileni, u twe ku vava kutani a rila. (Yohane 11:21, 33, 35) U twe ku vava swinene ku fana ni loku hi ku twaka loko hi feriwa hi vanhu lava hi va rhandzaka.

6 Ku tiva leswaku Yesu u titwa hi ndlela leyi hi titwaka ha yona hi rifu swa hi chavelela. Nakambe Yesu u fana ni Tata wakwe. (Yohane 14:9) Yehovha u ni matimba yo ri herisela makumu rifu naswona sweswo hi swona leswi a nga ta swi endla ku nga ri khale.

“LAZARO, HUMA!”

7, 8. Ha yini Marta a a nga swi lavi leswaku ku susiwa ribye eka sirha ra Lazaro, kambe xana Yesu u endle yini?

7 Loko Yesu a fika esirheni leri ntsumbu wa Lazaro a  wu ri eka rona, a ri pfariwe hi ribye lerikulu. Yesu u te: “Susani ribye.” Kambe Marta a a nga swi lavi ku ri susa. Ntsumbu wa Lazaro se a wu ri ni mune wa masiku wu ri kwalaho. (Yohane 11:39) A a nga swi tivi leswi Yesu a a lava ku swi endla leswaku a pfuna buti wakwe.

Ehleketa ntsako lowu ndyangu wa Lazaro ni vanghana vakwe va veke na wona loko a pfuxiwa!​—Yohane 11:38-44

8 Yesu u byele Lazaro a ku: “Huma!” Leswi Marta na Mariya va swi voneke a swi hlamarisa. “Munhu loyi a a file a huma, milenge yakwe ni mavoko swi boheleriwe hi swo tsondzela.” (Yohane 11:43, 44) Lazaro u pfuxiwile! U hlanganisiwe ni ndyangu wa ka vona swin’we ni vanghana vakwe. Va n’wi khoma ni ku tlhela va vulavula na yena. Hakunene rero a ku ri singita! Yesu u pfuxe Lazaro.

“NHWANYANA, NDZI RI EKA WENA, PFUKA!”

9, 10. (a) I mani loyi a nyikeke Yesu matimba yo pfuxa vanhu? (b) Ha yini ku pfuxiwa ka vanhu volavo ku ri ka nkoka eka hina?

9 Xana Yesu a tirhisa matimba yakwe ku pfuxa vanhu? Doo! Loko a nga si pfuxa Lazaro, Yesu u khongele eka Yehovha naswona U n’wi nyike matimba yo pfuxa Lazaro. (Hlaya Yohane 11:41, 42.) Lazaro a hi yena ntsena loyi a pfuxiweke. Bibele yi hi byela hi xinhwanyetana xa malembe ya 12 lexi a xi vabya swinene. Tata wa xona Yayiro, a nga ha swi tivi leswaku u ta endla yini kutani u kombele Yesu leswaku a xi horisa. A xo va xoxe. Loko a ri karhi a vulavula na Yesu, vanhu van’wana va tile kutani va ku: ‘N’wana wa wena wa nhwanyana u file! U nga ha n’wi karhati Mudyondzisi.’ Kambe Yesu u byele Yayiro a ku: “U nga chavi, ntsena kombisa ripfumelo, kutani yena u ta ponisiwa.” Hiloko a famba na Yayiro ekaya rakwe. Loko va ri ekusuhi ni yindlu, Yesu u vone ni ku twa vanhu va ri karhi va rila. Yesu u va byele a ku: “Tshikani ku rila, hikuva a nga fanga kambe u lo etlela.” Vatswari va xona va  nga ha va va hlamarile leswaku Yesu a a vula yini. Yesu u kombele vanhu hinkwavo leswaku va huma kutani a teka vatswari va xona a nghena na vona endlwini leyi xinhwanyetana a xi etlele eka yona. Hi musa Yesu u xi khome voko kutani a ku: “Nhwanyana, ndzi ri eka wena, pfuka!” Ehleketa ntsako lowu vatswari va xona va veke na wona loko hi ku hatlisa xi pfuka kutani xi sungula ku fambafamba! Yesu u pfuxe xinhwanyetana xa vona. (Marka 5:22-24, 35-42; Luka 8:49-56) Ku sukela hi siku rero ku ya emahlweni, loko va vona xinhwanyetana xa vona, a va tsundzuka leswi Yehovha a va endleleke swona hi ku tirhisa Yesu. *

10 Vanhu lava Yesu a va pfuxeke va tlhele va fa. Kambe leswi hi swi hlayaka hi vanhu lava i swa nkoka hikuva swi hi nyika ntshembo wa xiviri. Yehovha u lava ku pfuxa vanhu naswona u ta va pfuxa.

LESWI HI SWI DYONDZAKA HI TA KU PFUXIWA KA VAFI

Muapostola Petro u pfuxe wansati loyi a nga Mukreste loyi a vuriwaka Dorkasi.—Mintirho 9:36-42

Eliya u pfuxe n’wana wa noni.—1 Tihosi 17:17-24

11. Eklesiasta 9:5 yi hi dyondzisa yini hi Lazaro?

11 Bibele yi swi veka erivaleni leswaku “lava feke, a va tivi nchumu nikatsongo.” A swi ri tano eka Lazaro. (Eklesiasta 9:5) Hi laha Yesu a vuleke hakona, a swi fana ni loko Lazaro a etlele. (Yohane 11:11) Loko a ri esirheni, Lazaro a nga tivi “nchumu nikatsongo.”

12. Hi swi tivisa ku yini leswaku Lazaro u pfuxiwile hakunene?

12 Vanhu vo tala va swi vonile loko Yesu a pfuxa Lazaro. Hambi ku ri valala va Yesu a va swi tiva leswaku u ri  endlile singita ro tano. Lazaro a hanya naswona sweswo swi kombise leswaku u pfuxiwile hakunene. (Yohane 11:47) Nakambe vanhu vo tala va endzele Lazaro naswona hikwalaho ka sweswo va sungule ku tshemba leswaku Yesu a rhumiwe hi Xikwembu. Valala va Yesu a swi va tsakisanga sweswo, kutani va pulane ku dlaya Yesu na Lazaro.—Yohane 11:53; 12:9-11.

13. Ha yini hi tiyiseka leswaku Yehovha u ta pfuxa lava feke?

13 Yesu u vule leswaku ‘hinkwavo lava nga emasirheni’ va ta pfuxiwa. (Yohane 5:28) Leswi swi vula leswaku hinkwavo lava Yehovha a va tsundzukaka va ta tlhela va hanya. Kambe leswaku Yehovha a pfuxa munhu, u fanele a tsundzuka swilo hinkwaswo leswi munhu yoloye a swi endleke. Xana hakunene a nga swi endla sweswo? Ku ni tinyeleti ta magidi ya timiliyoni exibakabakeni. Bibele yi vula leswaku Yehovha u tiva vito ra nyeleti yin’wana ni yin’wana. (Hlaya Esaya 40:26.) Loko a tiva vito ra nyeleti ha yin’we, ha tiyiseka leswaku swi ta n’wi olovela ku tsundzuka swilo hinkwaswo leswi endliweke hi lava a nga ta va pfuxa. Xa nkoka swinene, Yehovha u tumbuluxe swilo hinkwaswo, kutani ha swi tiva leswaku u ni matimba yo pfuxa lava feke.

14, 15. Marito ya Yobo ma hi dyondzisa yini hi ku pfuxiwa ka lava feke?

14 Yobo wanuna wo tshembeka a a tshemba leswaku ku ta va ni ku pfuxiwa ka vafi. U vutise a ku: “Xana loko munhu la tiyeke emirini a fa a nga tlhela a hanya?” Kutani u byele Yehovha a ku: “U ta vitana, mina ndzi ta ku hlamula. U ta navela ntirho wa mavoko ya wena.” Yobo a a swi tiva leswaku ku ta fika nkarhi lowu Yehovha a nga ta pfuxa lava feke.—Yobo 14:13-15.

15 Xana u titwa njhani hi ntshembo wa ku pfuxiwa ka  lava feke? U nga ha tivutisa u ku, ‘Xana ndyangu wa ka hina swin’we ni vanghana va mina lava feke, va ta pfuxiwa?’ Hakunene swa hi chavelela ku tiva leswaku Yehovha u lava ku pfuxa lava feke. A hi voneni leswi Bibele yi swi vulaka hi laha va nga ta tshama kona ni leswaku i vamani lava nga ta pfuxiwa.

VA “TA TWA RITO RA YENA KUTANI VA HUMA”

16. Lava pfuxiweke va ta tiphina hi vutomi bya njhani laha misaveni?

16 Enkarhini lowu hundzeke, lava pfuxiweke va hlanganisiwe ni mindyangu ya vona swin’we ni vanghana va vona laha misaveni. Nakambe swi ta va tano enkarhini lowu taka, kambe swi ta va hi ndlela leyikulu. Ha yini? Hikuva lava nga ta pfuxiwa laha misaveni va ta va ni lunghelo ro hanya hilaha ku nga heriki naswona a va nge he tlheli va fa. Nakambe va ta hanya emisaveni leyi hambaneke swinene ni leyi hi hanyaka eka yona namuntlha. Tinyimpi, vugevenga ni vuvabyi swi ta va swi nga ha ri kona.

17. I vamani lava nga ta pfuxiwa?

17 I vamani lava nga ta pfuxiwa? Yesu u vule leswaku ‘hinkwavo lava nga emasirheni va ta twa rito ra yena kutani va huma.’ (Yohane 5:28, 29) Nakambe Nhlavutelo 20:13 yi hi byela leswi: ‘Lwandle ri humesa vafi lava nga eka rona, rifu ni Sirha swi humesa vafi lava nga eka swona.’ Hakunene, vanhu va magidi ya timiliyoni va ta tlhela va hanya. Nakambe muapostola Pawulo u vule leswaku ku ta va ni ku pfuxiwa ka “lava lulameke ni ka lava nga lulamangiki.” (Hlaya Mintirho 24:15.) Xana sweswo swi vula yini?

Lava feke va ta pfuxiwa kutani va tlhela va hlanganisiwa ni vanhu lava va va rhandzaka eParadeyisini

18. I vamani “lava lulameke” lava nga ta pfuxiwa?

18 “Lava lulameke” va katsa malandza yo tshembeka  ya Yehovha lama hanyeke emahlweni ko va Yesu a ta laha misaveni. Vanhu vo fana na Nowa, Abrahama, Sara, Muxe, Rhuti na Estere va ta pfuxiwa leswaku va hanya laha misaveni. U nga hlaya hi van’wana va vavanuna ni vavasati lava eka Vaheveru ndzima 11. Ku vuriwa yini hi malandza yo tshembeka ya Yehovha lama faka enkarhini wa hina? Na wona ma vuriwa lama “lulameke,” kutani ma ta pfuxiwa.

19. I vamani “lava nga lulamangiki”? Hi rihi lunghelo leri Yehovha a nga ta va nyika rona?

 19 “Lava nga lulamangiki” va katsa vanhu va magidi ya timiliyoni lava nga vangiki ni lunghelo ro tiva Yehovha. Hambileswi va feke, Yehovha a nga va rivalanga. U ta va pfuxa naswona va ta va ni lunghelo ro dyondza hi yena ni ku n’wi tirhela.

20. Ha yini ku ta ka ku nga pfuxiwi un’wana ni un’wana loyi a feke?

20 Xana leswi swi vula leswaku ku ta pfuxiwa un’wana ni un’wana loyi a feke? Doo! Yesu u vule leswaku vanhu van’wana a va nge pfuxiwi. (Luka 12:5) I mani loyi a nga ta endla xiboho xa leswaku i mani a nga ta pfuxiwa kumbe i mani loyi a nga ta ka a nga pfuxiwi? Yehovha i Muavanyisi wo hetelela, kambe u tlhele a nyika Yesu vulawuri bya ku va “muavanyisi wa lava hanyaka ni lava feke.” (Mintirho 10:42) Un’wana ni un’wana loyi a nga ta avanyisiwa tanihi loyi a endlaka swilo swo biha naswona a nga lavi ku hundzuka a nge pfuxiwi.—Vona Nhlamuselo ya le hansi 19.

KU PFUXERIWA KU YA HANYA ETILWENI

21, 22. (a) Munhu loyi a pfuxeriwaka ku ya hanya etilweni u pfuxiwa a ri ni miri wa njhani? (b) I mani munhu wo sungula loyi a pfuxiweke ku ya hanya etilweni?

21 Bibele yi tlhela yi hi byela leswaku ku ni vanhu van’wana lava nga ta hanya etilweni. Loko munhu wo karhi a pfuxeriwa ku ya hanya etilweni, a nga pfuxiwi a ri ni miri wa nyama. U pfuxiwa a ri munhu wa moya.

22 Yesu i munhu wo sungula ku pfuxiwa a ri munhu wa moya. (Yohane 3:13) Hi siku ra vunharhu Yesu a dlayiwile, Yehovha u n’wi pfuxile. (Pisalema 16:10; Mintirho 13:34, 35) Yesu a nga pfuxiwanga a ri ni miri wa nyama. Muapostola Petro u hlamusela leswaku Yesu ‘u dlayiwe a  ri wa nyama, kambe u hanyisiwe a ri wa moya.’ (1 Petro 3:18) Yesu u pfuxiwe a ri munhu wa moya loyi a nga ni matimba! (1 Vakorinto 15:3-6) Kambe Bibele yi vula leswaku a hi yena ntsena loyi a ta pfuxiwa hi ndlela yoleyo.

23, 24. I vamani lava “ntlhambinyana” lava Yesu a vulavuleke ha vona naswona i vangani?

23 Emahlweni ko va Yesu a fa, u byele vadyondzisiwa vakwe vo tshembeka a ku: “Ndzi ya mi lunghiselela ndhawu.” (Yohane 14:2) Leswi a swi vula leswaku van’wana va valandzeri vakwe a va ta pfuxeriwa ku ya hanya etilweni na yena. Xana i vangani lava nga ta hanya etilweni? Yesu u vule leswaku a va ta va nhlayo leyitsongo, “ntlhambinyana.” (Luka 12:32) Muapostola Yohane u boxe nhlayo leyi kongomeke loko a vona Yesu a ‘yime eNtshaveni ya Siyoni, a ri ni lava 144 000.”—Nhlavutelo 14:1.

24 Xana Vakreste va 144 000 a va ta pfuxiwa rini? Bibele yi hi byela leswaku leswi a swi ta endleka endzhaku ka loko Kreste a sungule ku fuma etilweni. (1 Vakorinto 15:23) Sweswi hi hanya enkarhini wolowo naswona vo tala va lava 144 000 se va pfuxeriwe ku ya hanya etilweni. Lava va ha riki laha misaveni naswona va faka sweswi va ta pfuxeriwa ku ya hanya etilweni. Hambiswiritano, vanhu vo tala va ta pfuxiwa enkarhini lowu taka leswaku va hanya emisaveni leyi nga Paradeyisi.

25. Hi ta dyondza yini eka ndzima leyi landzelaka?

25 Ku nga ri khale, Yehovha u ta ntshunxa vanhu hinkwavo eka rifu naswona ri ta heriseriwa makumu! (Hlaya Esaya 25:8.) Kambe lava yaka etilweni va ya endla yini? Bibele yi hlamusela leswaku va ta fuma na Yesu eMfun’weni wa Xikwembu. Hi ta dyondza leswi engetelekeke hi mfumo lowu eka ndzima leyi landzelaka.

^ ndzim. 9 Eka tindzima tin’wana, Bibele yi hi byela hi ku pfuxiwa ka vanhu lavatsongo ni lavakulu, vavanuna ni vavasati, Vaisrayele ni vanhu lava nga riki Vaisrayele. U nga hlaya hi vona eka 1 Tihosi 17:17-24; 2 Tihosi 4:32-37; 13:20, 21; Matewu 28:5-7; Luka 7:11-17; 8:40-56; Mintirho 9:36-42; 20:7-12.