Nghena endzeni

Hundzela eka leswi nga endzeni

Papila Leri Humaka Eka Huvo Leyi Fumaka

Papila Leri Humaka Eka Huvo Leyi Fumaka

Eka Vamakwerhu:

Hi va-700 B.C.E., muprofeta Ezekiyele u vone xivono lexi hlamarisaka. U vone kalichi leyikulu ya le tilweni leyi a yi lawuriwa hi Hosi leyi Lawulaka vuako hinkwabyo. Lexi tsakisaka hi kalichi yoleyo, i ndlela leyi a yi famba ha yona. Yi famba hi rivilo ra rihati, hambiloko yi jikela kun’wana, yi jika handle ko hunguta rivilo!—Ezek. 1:4, 9, 12, 14, 16-27.

Xivono xolexo xi hi tsundzuxa leswaku xiphemu xa le tilweni xa nhlengeletano ya Yehovha minkarhi hinkwayo xi ya emahlweni. Xana ku vuriwa yini hi xiphemu xa laha misaveni? Lembe ra ntirho leri nga hundza ri swi veke erivaleni leswaku Yehovha u kongomisa vanhu vakwe lava hlelekeke hi ndlela leyi hlamarisaka!

Xiphemu xa le tilweni xa nhlengeletano ya Yehovha minkarhi hinkwayo xi ya emahlweni

EUnited States, swirho swa ndyangu wa Bethele a swi khomekile hi ku rhurha eBrooklyn swi ya eka ntsindza lowuntshwa wa misava hinkwayo lowu nga eWarwick, New York, ku katsa ni le tindhawini tin’wana swin’we ni le nsin’wini. Vatirhi va le Bethele va le marhavini man’wana yo hlayanyana emisaveni hinkwayo na vona va khomeke hi ku aka, ku pfuxeta miako, ku hlanganisa marhavi kumbe ku rhurhela etindhawini letintshwa. Ku vuriwa yini hi wena? Hambiloko sweswi u nga ri eku rhurheni, a swi kanakanisi leswaku u khomeke hi swilo swin’wana.

Huvo leyi Fumaka ya tsaka swinene ni ku tlhela yi khutazeka loko yi vona vanhu va Xikwembu emisaveni hinkwayo  va khomekile swinene loko va ri karhi va tikarhatela ku fambisana ni nhlengeletano ya Yehovha. Vo tala va rhurhele laha ku nga ni xilaveko lexikulu. Van’wana va ye eka xiavelo xin’wana lexintshwa, xo tanihi nsimu ya ririmi rin’wana. Vo tala va ringete ndlela yo chumayela leyi nga yintshwa eka vona yi tlhela yi nga tolovelekanga. Vo tala swinene va ndlandlamuxe ntirho wa vona hi tindlela tin’wana. Nakambe Vakreste hinkwavo vo tshembeka, ku katsa ni vadyuhari ni lava vabyaka, va tsutsuma mphikizano wa vutomi hi ku tshembeka, hi ku ya emahlweni ni ntirho wa Yehovha, xisweswo va pfuneta eku paluxeni ka leswaku Sathana i muhembi!—1 Kor. 9:24.

Tiyisekani leswaku Yehovha wa ma tlangela matshalatshala ya n’wina. (Hev. 6:10) Moya n’wina wa ku tinyiketa wu endla hi tsundzuka Abrahama na Sara. Emalembeni  yakwe ya va-70, Abrahama u suke emutini wa Vakalidiya lowu vuriwaka Ura kutani a famba ni ndyangu wakwe va ya eKanana, laha a a ta hanya malembe lama saleke ya 100 ya vutomi byakwe a ri ematendeni. Mawaku moya wa ku tinyiketela lowu yena ni nsati wakwe la rhandzekaka va wu kombiseke!—Gen. 11:31; Mint. 7:2, 3.

Xana na wena u kombisa moya wolowo? Hinkwerhu ka n’wina lava mi tiyiselaka hi ku tshembeka eminkarhini leyi yo tika, mi endla leswi Yesu a hi byeleke leswaku hi swi endla. U te: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima.”—Mat. 28:19.

Hambi ku ri Yesu u tirhise rito leri nge “fambani,” leswi vulaka leswaku hi fanele hi tirha hi matimba. Swa tsakisa ku vona leswi valandzeri va Kreste va swi endleke eka lembe leri nga hundza! Swa olova ku xiya leswaku voko ra Yehovha ra matimba a ri pfuna entirhweni lowu wo vula mahungu lamanene ya Mfumo ematikweni hinkwawo.—Mar. 13:10.

Vanhu vo tala va wu rhandza ntiyiso. Nhlayo ya vahuweleri ya lembe leri nga hundza a ku ri 8 340 847, loko avhareji ya tidyondzo ta Bibele leti hi ti fambiseke n’hweti ni n’hweti ku ri 10 115 264. Swi le rivaleni leswaku kalichi ya le tilweni yi ya emahlweni naswona swi tano ni le ka wena! Yana emahlweni u endla leswinene hi nkarhi wo koma lowu saleke emahlweni ko va Yehovha a teka goza.

Hakunene ndzimana ya hina ya lembe yi faneleka kahle, yi ri, “Tshemba Yehovha u endla leswinene”! (Ps. 37:3) Loko u yingisa marito wolawo, u endla leswinene hi ku endlela Yehovha ntirho wo kwetsima, u kombisa leswaku  wa n’wi tshemba. Minkarhi hinkwayo tivani leswaku a mi n’wexe. Marito ya Yesu lama nge: “Maswivo, ndzi na n’wina masiku hinkwawo ku fikela emakumu ka mafambiselo ya swilo” ma ta hetiseka.—Mat. 28:20.

NDZIMANA YA LEMBE YA 2017:

“Tshemba Yehovha u endla leswinene”

Tiyiseka leswaku Yehovha u ta ya emahlweni a katekisa ntirho wa wena. Ku nga khathariseki leswaku munyikelo wa wena wu tele kumbe i wutsongo, xa nkoka eka Yehovha hileswaku u endle leswi nga ematimbeni ya wena naswona u nyikele hi xikongomelo lexinene. Tinyiko teto hinkwato ta n’wi tsakisa naswona wa ti amukela. (2 Kor. 9:6, 7) Kutani, yana emahlweni u tshinela ekusuhi ni Tata wa wena wa rirhandzu hi ku khongela nkarhi na nkarhi, hi ku dyondza Rito ra Xikwembu, hi ku va kona eminhlanganweni ya Vukreste ni ku hlanganyela hi ku hiseka ensin’wini.

Tanihi leswi Diyavulosi a saleriweke hi “nkarhi wo koma,” muxandzuki yoloye wo homboloka u tiyimisele ku tirhisa tindlela tin’wana ni tin’wana leswaku a hi hambukisa hi nga tshembeki eka Yehovha. (Nhlav. 12:12) Tshama u ri ekusuhi na Yehovha kutani matshalatshala hinkwawo ya Diyavulosi a ma nge humeleli. (Ps. 16:8) Swi tiveni leswaku ha mi rhandza swinene naswona ha swi tlangela leswi mi pfunetaka entirhweni wa Hosi eminkarhini leyi ya makumu.

Vamakwenu,

Huvo leyi Fumaka ya Timbhoni ta Yehovha