Nghena endzeni

Hundzela eka leswi nga endzeni

Mexico: Va dyondze Braille swin’we

 KU CHUMAYELA NI KU DYONDZISA EMISAVENI HINKWAYO

Matiko Ya Amerika

Matiko Ya Amerika
  • MATIKO 57

  • VAAKATIKO 998 254 087

  • VAHUWELERI 4 154 608

  • TIDYONDZO TA BIBELE 4 353 152

“Ndzi Ta Dyondza Na Wena”

Ismael, loyi a tshamaka eMexico, a tiendlele xiboho xo hlaya Bibele hinkwayo. Ku nga si hela lembe, se a yi hlaye kambirhi, kambe endzhakunyana, u fe mahlo. Endzhaku ka malembe yo hlayanyana, Ángel loyi a nga Mbhoni ya Yehovha u hlangane na Ismael kutani a bula na yena hi leswi Xikwembu xi swi tshembisaka. Ismael a a swi tsakela ku dyondza leswi engetelekeke, kambe u te: “Ndzi fe mahlo; A ndzi nge swi koti ku hlaya Bibele.”

 Ángel u n’wi tiyisekise a ku: “U nga karhateki, ndzi ta ku dyondzisa ku hlaya Braille.”

Ismael u n’wi vutise a ku: “Xana wa yi tiva Braille?”

Ángel u hlamule a ku: “Doo, kambe ndzi ta dyondza na wena.” Ismael a a nga swi tshembi leswaku Ángel u ta swi endla sweswo. Kambe Ángel u ye ekaya a fika a endla ndzavisiso malunghana ni ndlela yo hlaya Braille, ivi a tiendlela maletere lama tirhisiwaka eka Braille hi ku tirhisa bokisi. Kutani u sungule ku dyondzisa Ismael ku hlaya Braille. Swi nga si ya kwihi, Ismael u dyondze tialfabete ta Braille, a ya eminhlanganweni a tlhela a hlaya minkandziyiso ya hina ya Braille. Sweswi Ángel u fambisela vanhu va mune lava nga voniki tidyondzo ta Bibele. Va swi rhandza ku vulavula hi Paradeyisi laha va nga ta tlhela va vona.

A A Nga Ha N’wi Tivi

Viannei la nga ni malembe ya 14 loyi a tshamaka eUnited States u tsale a ku: “Loko hi ri etlilasini mudyondzisi wa mina wa nkarhinyana u sungule ku vulavula hi vukhongeri. U hi byele leswaku hi xaxameta mavito ya vukhongeri byin’wana kutani mina ndzi vule ra Timbhoni ta Yehovha. Vadyondzikulorhi va ndzi hlekile va vula leswaku hi va dyela nkarhi, hi kala ntirho naswona va cukumeta minkandziyiso ya hina. Mudyondzisi wa mina na yena a a vulavula ku biha hi Timbhoni.

Kutani ndzi khongele Yehovha leswaku a ndzi nyika xivindzi xo chumayela. Ndzi va byele leswaku xivangelo xo va hi ya emakaya ya vona a hi leswi hi lavaka ku va dyela nkarhi, kambe hikwalaho ka leswi Yehovha a hi rhumeke  leswaku hi va nyika switsundzuxo leswinene swa le Bibeleni. Ndzi va kombele leswaku va nga yi cukumeti minkandziyiso; yi nga cinca vutomi bya vona yi tlhela yi va ponisa. Mudyondzisi wa mina u kombele ku rivaleriwa, a tshembisa leswaku enkarhini lowu taka loko Mbhoni yi ta, u ta yi yingisela a tlhela a hlaya minkandziyiso ya hina. A ndzi nga tshembi leswaku u ta swi endla sweswo.

 Ndzi tlhele ndzi n’wi vona endzhaku ka tinh’weti ta mune naswona ndzi hlamarisiwe hileswi a dyondza Bibele. Endzhaku ka tinh’weti ta tsevu leti landzeleke, u tile eka mina exikolweni leswaku a ta ndzi khensa hileswi ndzi n’wi chumayeleke. A ndzi nga ha n’wi tivi hikuva se a tsemete misisi a tlhela a byevula malebvu. Sweswi se i muhuweleri la nga khuvuriwangiki.”

 Ku Chumayela eAmazon

Lembe leri nga hundza, vanhu va Yehovha va le Brazil a va hlele ku ya chumayela exifundzheni lexikulu xa Amazon. Vo tala eka xifundzha xolexo a va nga si tshama va chumayeriwa mahungu lamanene. Hikwalaho ka sweswo, Huvo leyi Fumaka yi hlele tsima ro hlawuleka ro chumayela leri tekeke lembe leswaku ku chumayeriwa vanhu va magidi lava tshamaka etindhawini ta le kule ta le Amazon.

Brazil: Va ri karhi va chumayela eAmazon

Rhavi ri hlawule madoroba ya 53 lama nga eAmazon leswaku ku ya chumayeriwa rungula ra Mfumo. Hi tinh’weti ta mune ntsena, vahuweleri vo tlula 6 500 va amukele xiavelo xolexo.

Eka doroba ra le kule ra Anamã, laha ku nga riki na vahuweleri va Mfumo, vamakwerhu va khume va tshame kwalaho ku ringana masiku ya 11 laha va fambiseke minkandziyiso yo tlula 12 500 ni ku tlhela va sungula tidyondzo ta Bibele ta kwalomu ka 200 leti sweswi va ti fambisaka hi ku tirhisa riqingho. Loko va ri kwalaho, vamakwerhu a va tlhela va khoma ni minhlangano. Eka nhlangano wo hetelela lowu va wu khomeke va nga si famba, a va tsakile ku vona vanhu va 90 va ri kona. Mihandzu leyinene ya tsima leri ya ha ta vonaka.

U N’wi Byele Leswaku A Nghena Eka Website Ya jw.org

Eka malembe ya tsevu lama hundzeke, Jehizel na Mariana a va ri eka tlilasi yin’we exikolweni eVenezuela. Leswi Jehizel a a ri Mbhoni ya Yehovha, Mariana a a rhandza ku n’wi hlekula. Mariana a a vula leswaku Jehizel a nga yi tivi ndlela yo tiphina hi vutomi. Siku rin’wana, endzhaku ka loko a hlekuriwile swinene, u te: “Mariana, nghena eka website ya hina ya jw.org. Loko u nghenile,  yana ehansi ka nhlokomhaka leyi nge ‘Tivhidiyo’ ivi u tlilika bokisi leri nge ‘Vantshwa.’”

Nhlikanhi wolowo, Mariana u ye eka Jehizel ivi a ku: “Sweswi se ndza swi tiva leswaku ha yini u hanya hi ndlela leyi.”

Leswi a nga tiyiseki hi leswi a swi vulaka, Jehizel u n’wi vutise a ku: “Xana u lava ku tlhela u ndzi hlekula?”

Mariana u te: “Doo, a ndzi nge he tlheli ndzi ku hlekula. Ndza nkhensa, se ndza swi xiya leswaku ndlela leyi ndzi hanyaka ha yona hi yona yi ndzi vangelaka swiphiqo.” Ku endliwe malunghiselelo ya leswaku Mariana a fambiseriwa dyondzo ya Bibele ya nkarhi ni nkarhi naswona sweswi u va kona eka minhlangano hinkwayo.

 U Vutise Mufundhisi Wakwe Swivutiso

Gérole loyi a a ri matsalana ekerekeni leyi a nghena eka yona eHaiti, u tsakisiwe hi leswi Timbhoni ti koteke ku hlamula swivutiso swakwe hinkwaswo hi ku tirhisa Bibele. Yena ni n’wana wakwe wa nhwanyana va pfumele ku dyondza Bibele. Hikwalaho ko tsakisiwa hi leswi a va swi dyondza, va kombele ku dyondza kambirhi hi vhiki.

Endzhaku ka tinh’weti tinharhu va ri karhi va dyondza, Gérole u ye eka mufundhisi wa kereke yakwe ivi a n’wi vutisa swivutiso swa mune a ku: “Hi rihi lembe leri Yesu a vekiweke ku va Hosi? Vanhu lavanene va ya kwihi loko va fa? Lavo homboloka va ya kwihi loko va fa? Xana Yesu u fele exihambanweni kumbe emhandzini?” Mufundhisi loyi u n’wi byele leswaku u ta kota ku hlamula ntsena xivutiso xa vumbirhi ni xa vunharhu. Hi loko a ku: “Timbhoni ta Yehovha ti vula leswaku i vanhu va 144 000 lava yaka etilweni. Kambe ndzi ri hinkwavo lava endlaka ku rhandza ka Xikwembu va ta ya etilweni. Lavo homboloka va ta hisiwa etiheleni hi laha ku nga heriki.” Loko makwerhu a kombele Matsalwa lama vulaka sweswo, a nga swi kotanga ku n’wi nyika wona. Gérole a a hele matimba kambe a tiyimisele ku ya emahlweni a dyondza Bibele. U tshike kereke yakwe a tlhela a vula leswaku u dyondze swo tala hi Bibele eka tinh’weti tinharhu leti a ri karhi a dyondza ni Timbhoni ta Yehovha, ku tlula leswi a nga swi dyondza eka malembe yo tlula 30 lama a ma heteke a nghena kereke. Gérole ni n’wana wakwe wa nhwanyana va ha ku khuvuriwa naswona va sungule tidyondzo ta Bibele ta 23 endhawini leyi va tshamaka eka yona.

Haiti: Gérole ni n’wana wakwe wa nhwanyana va fambisa tidyondzo to tala ta Bibele