Nghena endzeni

Hundzela eka leswi nga endzeni

 GEORGIA

A Ndzi Vona Onge Swi Ndzi Fambela Kahle eVuton’wini

Madona Kankia

A Ndzi Vona Onge Swi Ndzi Fambela Kahle eVuton’wini
  • U VELEKIWE HI 1962

  • U KHUVURIWE HI 1990

  • MATIMU YAKWE HI KU KOMISA Khale ka xirho xa Vandla ra Makhomunisi eGeorgia naswona u pfune vanhu vo tala leswaku va dyondza ntiyiso. Hi 2015 u thwase eka tlilasi yo sungula ya Xikolo Xa Vachumayeri Va Mfumo lexi a xi khomeriwe eTbilisi.

LOKO ndzi dyondza Bibele hi 1989, a ndzi ri xirho lexi dumeke xa Vandla ra Makhomunisi edorobeni leri ndzi kuleleke eka rona leri vuriwaka Senaki naswona nkarhi na nkarhi a ndzi kumeka eka Huvo ya Soviet ya le Georgia, leyi namuntlha yi nga fanisiwaka ni palamendhe. Leswi a ndzi vutiwile, a ndzi vona onge swi ndzi fambela kahle evuton’wini.

Manana na Tatana a va ndzi dyondzise ku rhandza Xikwembu. Kutani, a ndzi tshemba leswaku Xikwembu xi kona hambileswi a ndzi ri Mukhomunisi. Loko ndzi sungula ku dyondza Bibele, ndzi kume tinhlamulo leti enerisaka ta swivutiso hinkwaswo leswi a ndzi ri na swona, kutani ndzi endle xiboho xo nyiketela vutomi bya mina eka Yehovha. Kambe ndyangu, vanghana, vatirhikulorhi ni jaha ra mina a va nga yimi na xona xiboho xa mina.

Vukhongeri bya mina lebyintshwa byi endle leswaku maxaka ya mina ma ndzi fularhela naswona a byi nga fambisani ni ntirho wa  mina wa tipolitiki. Ndzi swi xiyile leswaku a ku ri hava lexi a ndzi ta xi endla handle ko famba ekaya, ndzi tshika jaha leri a ndzi rhandzana na rona, ntirho hambi ku ri Vandla ra Makhomunisi ni Huvo ya Soviet. Endzhaku ka loko ndzi khuvuriwile, vanghana ni ndyangu wa ka hina a va ndzi tshikilela swinene. Tanihi leswi a ndzi dumile swinene edorobeni leri ndzi kuleleke eka rona, ndzi rhurhele edorobeni ra Kutaisi, laha hi ku hatlisa ndzi sunguleke ku phayona.

Loko vanhu va ndzi vutisa loko swi fanerile leswaku ndzi langutana ni maxangu hikwalaho ka vukhongeri bya mina, a ndzi va hlamula handle ko tipfinyinga leswaku ndzi tsake ngopfu hi xiboho lexi ndzi xi tekeke. Hambileswi vatswari va mina a va nga swi twisisi swiboho swa mina, ndza tsaka hileswi va ndzi dyondziseke ku rhandza Xikwembu ni vanhu. Leswi swi ndzi pfunile swinene evuton’wini.