Nghena endzeni

Hundzela eka leswi nga endzeni

Xikolo xa Maphayona lexi a xi khomeriwe ekusuhi ni le Zugdidi

 GEORGIA | 1998 Ku Ya Eka 2006

Mikateko ‘Hi Nguva Leyinene Ni Hi Nguva Ya Ku Karhateka’—2 Tim. 4:2.

Mikateko ‘Hi Nguva Leyinene Ni Hi Nguva Ya Ku Karhateka’—2 Tim. 4:2.

 KU SUKELA eku heleni ka va-1990 ku ya emahlweni, Timbhoni ta le Georgia ti tsakisiwe hi ku andza loku hlamarisaka ka nhlayo ya vahuweleri ni ya vanhu lava tsakelaka. Hi 1998, ku ve ni vanhu va kwalomu ka 32 409 eXitsundzuxweni xa rifu ra Kreste.

Vahuweleri vo tala, ku katsa ni vakulu a va ha ku amukela ntiyiso naswona a va nga ri na ntokoto. Vo tala a va lava ku leteriwa malunghana ni nkongomiso wa nhlengeletano ni mintirho leyi fambisanaka ni ku chumayela. Kambe ndzetelo wolowo a wu ta huma kwihi?

Nhlengeletano Ya Yehovha Yi Hoxa Xandla Swinene

Arno na Sonja Tüngler, ku nga mathwasana mambirhi ya Xikolo xa Giliyadi lexi a xi khomeriwe eJarimani, va averiwe ku ya eGeorgia hi March 1998. Hi lembe rero, Huvo leyi Fumaka yi endle xiboho xa leswaku ku pfuriwa hofisi ya tiko eGeorgia, leyi a yi ta languteriwa hi rhavi ra le Rhaxiya.

Hi ku hatlisa, Komiti ya Tiko yi sungule ku langutela ntirho wo chumayela. Loko ntirho wa hina wu tsarisiwe ximfumo, hi ku kongoma minkandziyiso leyi sekeriweke eBibeleni a yi yisiwa endhawini leyi endzhaku yi tiviweke tanihi rhavi ra le Jarimani. Ku amukeriwa ximfumo swi tlhele swi endla leswaku hi kota ku xava tindhawu leti eka tona a hi ta aka Tiholo ta Mfumo ni miako ya rhavi.

Ndzetelo Lowu Fikeke Hi Nkarhi

Vahuweleri vo tala a va nga swi koti ku chumayela va ntshunxekile hi yindlu ni yindlu, hi nkarhi lowu mfumo wa Soviet a wu yirise ntirho wo chumayela. Arno Tüngler u ri: “Vahuweleri vo tala a va chumayela swinene eswitarateni,  kambe a hi hinkwavo lava a va tolovelane ni ntirho wo chumayela hi yindlu ni yindlu ni ku tlhela va ya eka lava kombiseke ku tsakela.”

Arno na Sonja Tüngler

Davit Devidze, loyi a sunguleke ku tirha ehofisini ya tiko leyi a ya ha ku simekiwa hi May 1999 u ri: “A ku ri ni ntirho wo tala lowu a wu fanele wu endliwa ensin’wini ni le Bethele. Swilo swin’wana a hi hlaya hi swona kambe a hi nga tivi leswaku swi endliwa njhani. Kutani hi xiyisise ni ku tlhela hi dyondza eka vamakwerhu lava nga ni ntokoto lava a va rhumeriwa hi Huvo leyi Fumaka.”

Vamakwerhu va le Georgia va sungule ku leteriwa. Kambe hilaha swi tolovelekeke ha kona eka lava rhurhelaka laha ku nga ni xilaveko lexikulu, ndzetelo lowu a wu vuyerisa vanhu hinkwavo. (Swiv. 27:17) Entiyisweni, lava a va tele ku pfuna va dyondze swo tala eka vamakwerhu va kwalaho.

Timbhoni Ta Kwalaho Ti Kombisa Rirhandzu

Arno na Sonja va tsundzuka swilo swo tsakisa malunghana ni ndlela leyi va amukeriweke ha yona hi mandla mambirhi loko va fika eGeorgia. Vamakwerhu va kwalaho va endle  leswi va nga swi kotaka leswaku va va pfuna va tolovelana ni xiavelo xa vona lexintshwa.

Sonja u tsundzuka ndlela leyi a va hanana ha yona. U ri: “Vatekani van’wana lava a va tshama kusuhi na hina a va tshamela ku hi tisela swakudya swo nandziha. Makwerhu wa xisati u fambe na hina ensin’wini, a hi tivisa eka vandlha ra hina lerintshwa ni ku hi dyondzisa swo tala hi ndhavuko wa le Georgia. Makwerhu un’wana wa xisati u hi lehisele mbilu loko a ri karhi a hi dyondzisa ririmi ra Xigeorgia.”

Warren na Leslie Shewfelt, lava a va averiwe ku ya eGeorgia va huma eCanada hi 1999, va ri: “Hi tsakisiwe swinene hi rirhandzu leri vamakwerhu va le Georgia va hi kombiseke rona. Hinkwavo ka vona ku katsa ni vantshwa, a va yi kombisa erivaleni ndlela leyi va titwaka ha yona ni ku tlhela va rhandzana.”

Vamakwerhu va kwalaho va tirhe ni varhumiwa lava nga ni ntokoto ehofisini ya le tikweni

Lava a va averiwe ku ya eGeorgia va huma ematikweni man’wana a va rivala hi swiphiqo swa vona kutani va languta  timfanelo letinene ta vanhu va kwalaho. Hikwalaho ka sweswo, ku titsongahata ni rirhandzu leri varhumiwa a va ri na rona swi endle leswaku va teka vamakwerhu va le Georgia va ri va nkoka.

Vanhu Lava Chavaka Xikwembu Va Amukela Ntiyiso

Hi va-1990, vanhu vo tala va timbilu letinene va ye emahlweni va amukela ntiyiso. Hi lembe ra 1998 ntsena, ku khuvuriwe vanhu va 1 724. I yini lexi endleke leswaku vanhu vo tala va le Georgia va amukela ntiyiso?

Tamazi Biblaia, loyi a veke mulanguteri wa muganga ku ringana malembe yo tala, u ri: “Ku rhandza Xikwembu a ku ri nchumu wun’wana wa nkoka lowu endleke leswaku vanhu va rhandza ntiyiso. Loko hi va byela rungula ra le Bibeleni, a va namba va ri tsakela.”

Davit Samkharadze, loyi a nga muleteri eka Xikolo Xa Vachumayeri Va Mfumo, u ri: “Loko munhu a sungula ku dyondza Bibele, hakanyingi maxaka ni vaakelani na vona a va ta. Loko va ringeta ku tshikisa xichudeni ku dyondza Bibele, hakanyingi vo tala va vona a va hetelela va ri karhi va dyondza Bibele.”

Loko rungula ra Mfumo ri ri karhi ri hangalaka, ri cince vutomi bya vanhu vo tala. Hi April 1999, ku fikeleriwe nhlohlorhi leyintshwa ya vanhu va 36 669 lava veke kona eXitsundzuxweni.

“Ku Ni Vakaneti Vo Tala”

Malunghana ni ntirho wakwe wo chumayela emutini wa khale wa Efesa, muapostola Pawulo u tsale a ku: “Ndzi pfulekeriwe hi nyangwa leyikulu leyi yisaka entirhweni, kambe ku ni vakaneti vo tala.” (1 Kor. 16:9) Marito yakwe ma xi hlamusela kahle xiyimo lexi Timbhoni ta le Georgia ti langutaneke na xona eka tin’hweti ti nga ri tingani endzhaku ka  nhlohlorhi leyi fikeleriweke ya vanhu lava veke kona eXitsundzuxweni xa 1999.

Hi August lembe rero, swirho swa ntlawa wa Orthodox lowu a wu rhangeriwa hi Vasili Mkalavishvilihi loyi khale a a ri muprista, wu hlele nhlangano eTbilisi kutani wu yirisa minkandziyiso ya hina. Leswi swi endle leswaku va langutana ni nxaniso lowu heteke malembe ya mune.

Ku sukela hi 1999, Timbhoni ta Yehovha ta le Georgia a ti kanetiwa, ti hiseriwa minkandziyiso ti tlhela ti hlaseriwa

Hi October 17, 1999, vanhu va nga ri vangani va vukhongeri va hlele ntlawa wa vapfukeri wa kwalomu ka 200 kutani wu kavanyeta minhlangano ya Vandlha ra le Gldani, eTbilisi. Hi ku tirhisa swigombo ni tinsimbi, wu hlasele lava a va ri kona, leswi endleke leswaku Timbhoni to hlayanyana ti yisiwa exibedlhele.

Lexi twisaka ku vava hileswaku vahlaseri lava a va khotsiwanga naswona va ye emahlweni va hlasela Timbhoni. Vatirhelamfumo vo hlaya ku katsa ni Presidente Shevardnadze, va sole swiendlo swoleswo swo biha kambe a va tekanga magoza lama faneleke. Kahlekahle, maphorisa a ma tala ku fika hi nkarhi lowu se Timbhoni a ti hlaseriwile.

Hi nkarhi wolowo, Guram Sharadze xirho xa le palamendhe ya le Georgia, u simeke tsima ra leswaku ku hlaseriwa Timbhoni. U hehle Timbhoni hi ku vula leswaku ti ni khombo. A swi vonaka onge “nguva leyinene” yo chumayela mahungu lamanene a ku ri nchumu wa nkarhi lowu nga hundza.

Nhlengeletano Ya Yehovha Yi Teka Goza Loko Timbhoni Ti Kanetiwa

Nhlengeletano ya Yehovha yi teke goza hi ku hatlisa eka swilaveko swa Timbhoni ta le Georgia. Vamakwerhu va kume nkongomiso malunghana ni leswi va faneleke va swi endla loko va hlaseriwa. Nakambe va tsundzuxiwe hi  swivangelo leswi minkarhi yin’wana Vakreste va ntiyiso va faneleke va tiyisela nxaniso eka swona.—2 Tim. 3:12.

Ku engetela kwalaho, nhlengeletano ya Yehovha yi teke magoza ya nawu leswaku yi sirhelela vamakwerhu ehubyeni. Makwerhu loyi a a tirha eka Ndzawulo ya swa le Nawini erhavini u ri: “Eka malembe wolawo ya mune, hi yise swivilelo swo tlula 800 malunghana ni swiendlo swa ntlawa wa Vasili Mkalavishvili. Hi kombele vatirhelamfumo ni minhlangano ya timfanelo ta vanhu leswaku yi hi pfuna. Ntsindza wa misava hinkwayo wa Timbhoni ta Yehovha wu simeke tsima lerikulu, kambe ku hava nchumu lowu siveleke minhlaselo leyi.” *

^ ndzim. 30 Leswaku u kuma rungula leri engetelekeke malunghana ni ku hlula ka le nawini ka timfanelo ta hina, hlaya Xalamuka! ya Xinghezi ya January 22, 2002, matluka 18-24.