Nghena endzeni

Hundzela eka leswi nga endzeni

 GEORGIA

Nuna Wa Mina A Nga Tshikanga Ku Hlaya!

Marina Kopaliani

Nuna Wa Mina A Nga Tshikanga Ku Hlaya!
  • U VELEKIWE HI 1957

  • U KHUVURIWE HI 1990

  • MATIMU YAKWE HI KU KOMISA Marina ni nuna wakwe Badri, va ve vahuweleri lava hisekaka loko hi hala tlhelo va ri karhi va kurisa majaha ya vona mambirhi. Endzhaku ka sweswo Badri u tirhe eka Komiti ya Tiko naswona u tshame a tshembekile kukondza a fa hi 2010.

HI 1989, mina ni nuna wa mina hi hlangane ni Timbhoni ekaya ra vaakelani va hina. Makwerhu Givi Barnadze, loyi a dyondza Bibele ni muakelani wa hina, a nga ri na yona Bibele hikuva hi nkarhi wolowo a swi tika ku yi kuma eGeorgia.

Swi hi tsakisile leswi hi swi tweke kutani hi lave ku va na Bibele. Loko nuna wa mina a ri ni buti wakwe, u n’wi byele leswaku u lava Bibele. Lexi hlamariseke hileswaku, buti wakwe u n’wi byele leswaku a ha ku xava Bibele ya Xigeorgia naswona a ta swi tsakela ku n’wi nyika yona.

Loko Badri a vuya ekaya, u fike a tshama etafuleni kutani a hlaya Bibele ku kondza ku va vusiku. Hi siku leri landzeleke, u ye emahlweni a yi hlaya. Loko ndzi vuya entirhweni,  ndzi n’wi kume a tshame etafuleni a ri karhi a hlaya Matsalwa. A nga tshikanga ku hlaya. Kutani ndzi ringanyete leswaku a teka masiku entirhweni leswaku a ta hetisa ku hlaya Bibele. Hi nkarhinyana se a yi hlaye hinkwayo.

Loko hi sungula ku dyondza buku leyi nge Ntiyiso Lowu Yisaka eVuton’wini Lebyi Nga Heriki na Makwerhu Barnadze, a hi tsakile hi leswi a hi ri ni Bibele. Dyondzo yi fambe kahle hambileswi a hi nga ri na yona buku leyi nge Ntiyiso naswona mudyondzisi wa hina a nga ri na yona Bibele. Endzhaku ka lembe mina na Badri hi khuvuriwile.