Nghena endzeni

Hundzela eka leswi nga endzeni

 SWIENDLAKALO-NKULU SWA N’WEXEMU

Nhlangano Lowukulu Wa Timbhoni Ta Yehovha

Nhlangano Lowukulu Wa Timbhoni Ta Yehovha

HI Mugqivela, October 5, 2013, ku ve ni vayingiseri va 257 294 lava humaka ematikweni ya 21 eka nhlangano wa lembe ni lembe wa vu-129 wa Watch Tower Bible and Tract Society of Pennsylvania laha van’wana va yeke eka wona kasi van’wana va wu hlaleleke kunene. Endzhakunyana ka vhiki rero, mintlawa yin’wana ya Timbhoni yi hlalele nongonoko wolowo. Nhlayo ya lava wu voneke a ku ri vanhu va 1413 676 lava humaka ematikweni ya 31—leswi endleke leswaku ku va nhlangano lowukulu ngopfu wa Timbhoni ta Yehovha eka hinkwayo leyi nga tshama yi va kona.

Ku sukela hi va-1920, Timbhoni ta Yehovha a ti ri karhi ti haxa tinhlengeletano eka vanhu lava tshamaka ematikweni yo hambana-hambana, hi ku tirhisa tinqingho ni  switichi swo hambana-hambana swa xiya-ni-moya. Sweswi Internet yi endla leswaku ni vanhu lava tshamaka etindhawini leti nga toxe va twa ni ku vona swilo leswi nga eku endlekeni hi nkarhi wolowo kumbe endzhakunyana.

Swirho swa le marhavini yo hlayanyana swi tirhe lembe ni ku tlula leswaku swi lunghiselela ku haxiwa ka nongonoko lowu hi ku tirhisa endlelo ra Internet. Hi vhiki ro haxa, vativi va thekiniki a va langutela nongonoko va ri eBrooklyn, le New York naswona a ku tshama ku ri na munhu nkarhi hinkwawo tanihi leswi a wu haxiwa etindhawini to hambana-hambana hi minkarhi leyi nga faniki.