Xiyenge lexi xi vulavula hi matimu ya Hosi Sawulo na Hosi Davhida, lawa ma tekeke malembe ya kwalomu ka 80. Eku sunguleni, Sawulo a a titsongahata a tlhela a chava Xikwembu kambe u hatlise a cinca a nga ha yingisi milawu ya Yehovha. Kutani Yehovha u n’wi tshikile naswona hi ku famba ka nkarhi u byele Samuwele leswaku a tota Davhida leswaku a va hosi leyi nga ta landzela eIsrayele. Sawulo loyi a a ri ni mavondzo u ringete ko tala ku dlaya Davhida kambe Davhida a nga rihiselanga. Yonathani n’wana wa Sawulo, a a swi tiva leswaku Davhida u hlawuriwe hi Yehovha kutani a a tshembeka eka Davhida. Davhida u endle swidyoho leswikulu kambe a nga si tshama a ala ndzayo ya Yehovha. Loko u ri mutswari, pfuna n’wana wa wena leswaku a vona nkoka wo landzela nkongomiso wa Xikwembu mikarhi hinkwayo.