Vaisrayele va tlhele va tshika ku tirhela Yehovha va gandzela swikwembu swa mavunwa. Loko va hlaseriwa hi Vaamoni, swikwembu leswi a va swi gandzela a swi va ponisanga. Vaisrayele va xaniseke malembe yo tala. Eku heteleleni va byele Yehovha va ku: ‘Hi dyohile. Hi kombela u hi ponisa eka valala va hina.’ Vaisrayele va herise swikwembu swa vona swa mavunwa kutani va sungula ku gandzela Yehovha. Yehovha a a nga swi lavi ku va vona va ya emahlweni va xaniseka.

Ku hlawuriwe nhenha leyi vuriwaka Yefta leswaku yi ta rhangela Vaisrayele loko va lwa ni Vaamoni. Yefta u byele Yehovha a ku: ‘Loko wo hi pfuna hi hlula enyimpini leyi, ndza ku tshembisa leswaku loko ndzi tlhelela ekaya, munhu wo sungula loyi a nga ta huma endlwini ya mina leswaku a ndzi hlanganisa ndzi ta nyikela hi yena eka wena.’  Yehovha u yingise xikhongelo xa Yefta kutani a n’wi pfuna a hlula.

Loko Yefta a vuya enyimpini, munhu wo sungula loyi a n’wi hlanganiseke a ku ri n’wana wakwe wa nhwanyana, loyi o va yexe. A a ri karhi a cina ni ku chaya xichayachayana. Xana Yefta a a ta endla yini? U tsundzuke xitshembiso lexi a xi endleke kutani a ku: ‘Yo, n’wananga! U ndzi vavisile. Ndzi endle xitshembiso eka Yehovha. Leswaku ndzi xi hetisisa ndzi fanele ndzi ku rhumela leswaku u ya tirha etabernakeleni le Xilo.’ Kambe n’wana wakwe u te: ‘Tatana, loko u endle xitshembiso eka Yehovha u fanele u xi hetisisa. Kambe ndzi kombela ku rhanga hi ku ya tshama ni vanghana va mina va vanhwanyana etintshaveni ku ringana tin’hweti timbirhi. Endzhaku ka sweswo ndzi ta famba.’ N’wana wa Yefta u tirhe hi ku tshembeka etabernakeleni vutomi byakwe hinkwabyo. Lembe ni lembe vanghana vakwe a va n’wi endzela eXilo.