Xingheniso Xa Xiyenge 6
Loko Vaisrayele va fike eTikweni leri Tshembisiweke, tabernakela yi ve ndhawu leyi tirhiseriwaka vugandzeri bya ntiyiso. Vaprista a va dyondzisa Nawu kasi vaavanyisi a va kongomisa tiko. Xiyenge lexi xi kombisa vuyelo lebyi vaka kona eka van’wana hikwalaho ka swiboho ni swiendlo swa munhu. Muisrayele un’wana ni un’wana a a ri ni vutihlamuleri eka Yehovha ni le ka vanhu van’wana. Kandziyisa nkucetelo lowunene lowu Debora, Nawomi, Yoxuwa, Hana, n’wana wa nhwanyana wa Yefta na Samuwele va veke na wona lomu a va tshama kona. Kandziyisa leswaku ni vanhu van’wana lava a va nga ri Vaisrayele vo tanihi Rahava, Rhuti, Yayele ni Vagibiyoni va endle xiboho xo yima ni Vaisrayele hikwalaho ka leswi a va swi tiva leswaku Xikwembu xi na vona.
EKA XIYENGE LEXI
Yehovha A Hlawula Yoxuwa
Xikwembu xi nyike Yoxuwa swiletelo leswi na hina swi nga hi pfunaka namuntlha.
Rahava A Fihla Tinhlori
Makhumbi ya Yeriko ma wile. Kambe yindlu ya Rahava a yi wanga hambileswi a yi akiwe ekhumbini.
Yoxuwa Ni Vagibiyoni
Yoxuwa u khongele eka Xikwembu a ku: “Dyambu, yima!” Xana Xikwembu xi hlamurile?
Murhangeri Lontshwa Ni Vavasati Vambirhi Lava Nga Ni Xivindzi
Endzhaku ka loko Yoxuwa a file, Vaisrayele va sungule ku gandzela swifaniso. Vutomi byi sungule ku tika, kambe Xikwembu xi va pfunile hi ku tirhisa Muavanyisi Baraka, muprofeta wa xisati Debora na Yayele a tirhisa mhingu ya tende!
Rhuti Na Nawomi
Vavasati vambirhi lava feriweke hi vanuna va vona va tlhelela eIsrayele. Wansati un’wana eka vona ku nga Rhuti u ye a ya khwaja ensin’wini, laha a nga kuma ku tsakeriwa hi Bowazi.
Gidiyoni A Hlula Vamidiyani
Loko Vaisrayele va xanisiwa hi Vamidiyani, va kombele mpfuno eka Yehovha. Masocha ya Gidiyoni ma swi kotise ku yini ku hlula masocha ya valala va vona ya 135 000?
Hana A Khongelela Ku Kuma N’wana Wa Jaha
Elkana a a teka Hana, Penina ni vana va ya gandzela etabernakeleni eXilo. Kwalaho Hana a khongelela ku kuma n’wana. Ku nga si hela ni lembe u veleke Samuwele!
Xitshembiso Xa Yefta
Yefta u tshembise Yehovha yini naswona ha yini? N’wana wa Yefta u hlamule njhani mayelana ni xitshembiso xa tata wakwe?
Yehovha A Vulavula Na Samuwele
Vana va Muprista Lonkulu Eli a va tirha etabernakeleni, kambe a va n’wi yingisanga Yehovha. Samuwele a a nga ri tano. Vusiku byin’wana Yehovha u vulavule na yena.
Yehovha U Nyike Samsoni Matimba
Xikwembu xi endla leswaku Samsoni lowa Munaziri a va ni matimba. Loko Delila a tseme misisi yakwe, Vafilista va kote ku n’wi khoma. Lawa a ku ri makumu ya tempele ya Dagoni.
