Nghena endzeni

Hundzela eka leswi nga endzeni

 DYONDZO 8

Abrahama Na Sara Va Yingise Xikwembu

Abrahama Na Sara Va Yingise Xikwembu

Emutini wa Ura lowu a wu nga ri ekule ni muti wa Babele, vanhu vo tala a va nga gandzeli Yehovha, a va gandzela swikwembu swo tala. Kambe a ku ri ni wanuna un’wana loyi a a tshama eUra loyi a a gandzela Yehovha ntsena. Vito rakwe a ku ri Abrahama.

Yehovha u byele Abrahama a ku: ‘Siya muti wa wena ni maxaka ya wena, u ya etikweni leri ndzi nga ta ku komba rona.’ Kutani Xikwembu xi n’wi tshembisile xi ku: ‘U ta va tiko lerikulu naswona ndzi ta katekisa vanhu emisaveni hinkwayo hikwalaho ka wena.’

Abrahama a a nga ku tivi laha Yehovha a a lava a ya kona kambe a a tshemba Yehovha. Kutani Abrahama, nsati wakwe Sara, tata wakwe Tera na Lota n’wana wa makwavo wakwe va longe swilo swa vona va khoma ndlela.

 Abrahama a a ri ni malembe ya 75 loko yena ni ndyangu wakwe va fika etikweni leri Yehovha a a lava leswaku va ri vona. A ku ri tiko ra Kanana. Loko Abrahama a ri kwalaho Xikwembu xi vulavule na yena xi ku: ‘Tiko leri u ri vonaka ndzi ta ri nyika vana va wena.’ Kambe Abrahama na Sara a va dyuharile naswona a va nga ri na vana. Kutani Yehovha a a ta xi hetisisa njhani xitshembiso lexi?

“Hi ripfumelo, . . . Abrahama . . . u yingisile a ya endhawini leyi a a ta nyikiwa yona yi va ndzhaka; u fambile hambileswi a a nga ku tivi lomu a a ya kona.”—Vaheveru 11:8