Nghena endzeni

Hundzela eka leswi nga endzeni

 DYONDZO 92

Yesu A Humelela Eka Vaphasi Va Tinhlampfi

Yesu A Humelela Eka Vaphasi Va Tinhlampfi

Endzhaku ka loko Yesu a humelele eka vaapostola, Petro u ye a ya phasa tinhlampfi eLwandle ra Galeliya. Tomasi, Yakobo, Yohane ni vadyondzisiwa van’wana va fambe na yena. Va ringete ku phasa tinhlampfi vusiku hinkwabyo kambe a va phasanga nchumu.

Hi siku leri landzelaka nimixo, va vone wanuna a yime eribuweni. U va huwelele va ri ematini a ku: ‘Xana ku ni tinhlampfi leti mi ti phaseke?’ Va te: “A hi phasanga nchumu.” Wanuna loyi u te: “Hoxani rikoka etlhelweni ra xinene ra byatso.” Loko va endle tano, va phase tinhlampfi to tala lerova va nga ha swi koti ku humesa rikoka ematini. Yohane u hatle a swi xiya leswaku wanuna loyi a ku ri Yesu, kutani u te: “I Hosi!” Xikan’wekan’we Petro u tlulele ematini a hlambela a ya eribuweni. Vadyondzisiwa lavan’wana va n’wi landzele va ri exikepeni.

Loko va fika eribuweni, va vone xinkwa ni tinhlampfi leti a ti ri eku  oxiweni. Yesu u va byele leswaku va engetela tinhlampfi leti a ti ri eku oxiweni. Endzhaku u te: ‘Tanani mi ta fihlula.’

Loko va heta ku dya, Yesu u vutise Petro a ku: ‘Xana u ndzi rhandza ku tlula ku phasa tinhlampfi?’ Petro u te: ‘Ina, Hosi, wa swi tiva leswaku ndza ku rhandza.’ Yesu a ku: ‘Phamela swinyimpfana swa mina.’ Yesu u tlhele a n’wi vutisa a ku: ‘Petro, xana wa ndzi rhandza?’ Petro u te: ‘Hosi wa swi tiva leswaku ndza ku rhandza.’ Yesu u te: “Risa swinyimpfana swa mina.” Yesu u tlhele a n’wi vutisa ra vunharhu. Hiloko Petro a hela matimba. U te: ‘Hosi, u tiva swilo hinkwaswo. Wa swi tiva leswaku ndza ku rhandza.’ Yesu u te: “Phamela swinyimpfana swa mina.” Kutani u byele Petro a ku: “U nga tshiki ku ndzi landzela.”

“[Yesu] a ku eka vona: ‘Ndzi landzeleni, kutani ndzi ta mi endla vaphasi va vanhu.’ Hiloko va namba va tshika tinkoka ta vona ivi va n’wi landzela.”—Matewu 4:19, 20