Nghena endzeni

Hundzela eka leswi nga endzeni

 DYONDZO 74

Yesu A Va Mesiya

Yesu A Va Mesiya

Yohane a a chumayela a ku: ‘Munhu un’wana loyi a ndzi tlulaka wa ta.’ Loko Yesu a ri ni malembe ya kwalomu ka 30, u suke eGaleliya a ya eNambyeni wa Yordani laha Yohane a a khuvulela vanhu kona. Yesu a a lava leswaku Yohane a n’wi khuvula kambe Yohane u te: ‘A hi mina ndzi faneleke ndzi ku khuvula. Hi wena u faneleke ku khuvula mina.’ Yesu u te: ‘Yehovha u lava leswaku wena u ndzi khuvula.’ Kutani va nghene eNambyeni wa Yordani ivi Yohane a n’wi nyuperisa ematini.

Endzhaku ka loko Yesu a hume ematini u khongerile. Hi nkarhi wolowo, matilo ma pfulekile kutani moya wa Xikwembu wu xikela eka yena ku fana ni tuva. Kutani Yehovha u vulavule a ri etilweni a ku: “U N’wana wa mina loyi ndzi n’wi rhandzaka; ndza tinyungubyisa ha wena.”

Loko moya wa Yehovha wu fike eka Yesu, wu endle leswaku a va Kreste kumbe Mesiya. Se a a ta sungula ntirho lowu Yehovha a n’wi rhumeke leswaku a ta wu endla emisaveni.

Loko Yesu a ha ku khuvuriwa, u ye emananga laha a nga fika a heta masiku ya 40. Loko a vuyile u endzele Yohane. Loko Yesu a tshinela eka yena, Yohane u te: ‘Lexi i Xinyimpfana xa Xikwembu lexi nga ta susa xidyoho xa misava.’ Hi ku vula marito lawa, Yohane a a tivisa vanhu leswaku Yesu a a ri Mesiya. Xana wa swi tiva leswi humeleleke eka Yesu loko a ri emananga? A hi voneni.

“Ku twala rito ri huma ematilweni ri ku: ‘U N’wana wa mina loyi ndzi n’wi rhandzaka; ndza tinyungubyisa ha wena.’”—Marka 1:11