Nghena endzeni

Hundzela eka leswi nga endzeni

 DYONDZO 86

Yesu A Pfuxa Lazaro

Yesu A Pfuxa Lazaro

Yesu a a ri ni vanghana vanharhu lavakulu lava a va tshama eBetaniya. A ku ri Lazaro ni vamakwavo vakwe vambirhi va xisati, ku nga Mariya na Marta. Siku rin’wana loko Yesu a ri eka tlhelo lerin’wana ra Yordani, Mariya na Marta va n’wi rhumele rungula ra xihatla va ku: ‘Lazaro wa vabya swinene. Hi kombela u fika hi ku hatlisa!’ Kambe Yesu a nga fikanga hi nkarhi wolowo. Endzhaku ka masiku mambirhi u byele vadyondzisiwa vakwe a ku: ‘A hi yeneni eBetaniya. Lazaro u etlele ndzi lava ku ya n’wi pfuxa.’ Vadyondzisiwa vakwe va te: ‘Loko Lazaro a etlele, u ta hola.’ Kutani Yesu u va byele hi ku kongoma a ku: ‘Lazaro u file.’

Loko Yesu a fika eBetaniya, Lazaro se a a ri ni masiku ya mune a lahliwile. Mitshungu ya vanhu a yi tile yi ta chavelela Marta na Mariya. Loko Marta a twa leswaku Yesu u fikile, u tsutsume a n’wi hlanganisa. U te: “Hosi, loko a wu ri kona, makwerhu a a ta va a nga fanga.” Yesu u te: ‘Makwenu u ta tlhela a hanya. Xana wa swi tshemba sweswo, Marta?’ Yena a ku: ‘Ndza tshemba leswaku u ta pfuka loko ku pfuxiwa vafi.’ Yesu a ku: “Hi mina ndzi pfuxaka vanhu eku feni ndzi tlhela ndzi va nyika vutomi.”

Endzhaku ka sweswo Marta u ye eka Mariya a fika a ku: ‘Yesu u fikile.’ Mariya u tsutsume a ya eka Yesu kutani ntshungu wu n’wi landzela. U fike a wela emilengeni yakwe a ri karhi a rila. U te: ‘Hosi loko a wu ri kona, makwerhu ingi a nga fanga!’ Loko Yesu a vona ndlela leyi Mariya a twa ku vava ha yona, na yena u sungule ku rila. Loko ntshungu wu n’wi vona a rila, wu te: ‘Hakunene Yesu a a n’wi rhandza Lazaro.’ Kambe van’wana va te: ‘Ha yini a nga n’wi horisanga munghana wakwe?’ Xana Yesu a a ta endla yini?

Yesu u ye esirheni ra Lazaro leri a ri pfariwe hi ribye lerikulu. Kutani a ku: ‘Susani ribye leri.’ Marta u te: ‘Kambe se swi endla masiku ya mune a file! Miri wa yena wu fanele wu nun’hwa.’ Nilokoswiritano, va suse ribye rero kutani Yesu a khongela a ku: ‘Ndza khensa Tatana hi leswi u ndzi yingiseke. Ndza swi tiva leswaku mikarhi hinkwayo wa ndzi twa, kutani ndzi vulavula erivaleni leswaku  vanhu lava va ta swi tiva leswaku u ndzi rhumile.’ Hiloko a huwelela a ku: “Lazaro, huma!” Ku endleke nchumu lowu hlamarisaka: Lazaro u humile esirheni, a tsondzeriwe hi malapi. Kutani Yesu u te: “N’wi ntshunxeni, mi n’wi tshika a famba.”

Vo tala lava voneke leswi va ve ni ripfumelo eka Yesu. Kambe van’wana va ye va ya byela Vafarisi. Ku sukela kwalaho, Vafarisi a va lava ku dlaya Lazaro na Yesu. Yudasi Iskariyota loyi a a ri un’wana wa vaapostola va 12, u ye eka Vafarisi exihundleni a fika a ku eka vona: ‘Mi ta ndzi nyika mali muni loko ndzo mi pfuna ku kuma Yesu?’ Va vule leswaku va ta n’wi nyika swiphemu swa silivhere swa 30, kutani Yudasi a sungula ku lava nkarhi lowunene wo nyiketa Yesu eka Vafarisi.

“Xikwembu xa ntiyiso i Xikwembu lexi hi ponisaka; naswona Yehovha Hosi leyi Tlakukeke wa hi ponisa eka rifu.”—Pisalema 68:20