Nghena endzeni

Hundzela eka leswi nga endzeni

 DYONDZO 71

Yehovha U Sirhelele Yesu

Yehovha U Sirhelele Yesu

Etikweni ra le vuxeni bya Israyele a ku tshama vanhu lava a va tshemba leswaku tinyeleti ti nga swi kota ku va kongomisa. Hi vusiku byin’wana, vavanuna van’wana lava humaka eVuxeni va vone nchumu lowu a wu fana ni nyeleti yo vangama wu ri karhi wu famba empfhukeni, hiloko va wu landzelela. Nchumu wolowo lowu a wu fana ni nyeleti wu va yise eYerusalema. Vavanuna volavo va sungule ku vutisa vanhu va ku: ‘U kwihi n’wana loyi a nga ta va hosi ya Vayuda? Hi te laha leswaku hi ta n’wi khinsamela.’

Loko Heroda, hosi ya le Yerusalema a twa hi ta hosi leyi leyintshwa, u sungule ku karhateka. U vutise vaprista lavakulu a ku: ‘Xana hosi leyi yi ta velekeriwa kwihi?’ Hiloko va ku: ‘Vaprofeta va vule leswaku yi ta velekiwa eBetlehema.’ Kutani Heroda u vitane vavanuna lava humaka eVuxeni ivi a ku: ‘Fambani mi ya lava n’wana loyi eBetlehema. Loko mi n’wi kumile mi vuya mi ta ndzi vikela leswaku u kwihi. Na mina ndzi lava ku n’wi khinsamela.’ Kambe a a ri ku hembeni.

Nchumu lowu a wu fana ni nyeleti wu tlhele wu sungula ku famba. Vavanuna volavo va wu landzelerile ku kondza wu ya va fikisa eBetlehema. Wu fike wu yima ehenhla ka yindlu hiloko vavanuna volavo va nghena endlwini yoleyo. Va kume Yesu a ri ni mana wakwe Mariya. Va khinsamele n’wana yoloye ivi va n’wi nyika tinyiko ta nsuku, murhi wa risuna ni mira. Xana Yehovha a ku ri yena loyi a rhume vavanuna volavo leswaku va lava Yesu? Doo!

Vusiku byebyo, Yehovha u byele Yosefa enorhweni a ku: ‘Heroda u lava ku dlaya Yesu. Teka nsati wa wena ni n’wana mi balekela Egipta. Mi fanele mi tshama kona ku fikela loko ndzi ta mi byela leswaku mi nga tlhelela endzhaku.’ Yosefa u teke ndyangu wakwe va balekela Egipta hi nkarhi wolowo.

Yehovha u byele vavanuna va le Vuxeni leswaku va nga ha tlheleli eka Heroda. Heroda u hlundzukile loko a xiya leswaku vavanuna va le Vuxeni a va ha vuyi. Leswi a nga n’wi kumangiki Yesu, u lerise leswaku vana va  vafana hinkwavo va le Betlehema lava a va ringana na Yesu hi malembe va dlayiwa. Kambe Yesu a a hlayisekile Egipta.

Hi ku famba ka nkarhi Heroda u file. Kutani Yehovha u byele Yosefa a ku: ‘U nga tlhelela ka rikwenu.’ Yosefa, Mariya na Yesu va tlhelele eIsrayele naswona va fike va tshama emutini wa Nazareta.

“Kutani rito leri humaka enon’wini wa mina ri ta endlisa sweswo . . . , ri ta hetisisa leswi ndzi ri rhumeke swona.”—Esaya 55:11