Nghena endzeni

Hundzela eka leswi nga endzeni

 DYONDZO 70

Tintsumi Ti Tivisa Hi Ta Ku Velekiwa Ka Yesu

Tintsumi Ti Tivisa Hi Ta Ku Velekiwa Ka Yesu

Khezari Awugusto, mufumi wa le Rhoma u lerise leswaku Vayuda hinkwavo va tlhelela ka rikwavo leswaku va ya tsarisiwa. Kutani Yosefa na Mariya va teke riendzo va ya eBetlehema, laha ndyangu wa ka va Yosefa a wu huma kona. Nkarhi wa leswaku Mariya a veleka se a wu fikile.

Loko va fika eBetlehema, va kume ndhawu yo tshama eka yona exivaleni. Mariya u veleke n’wana wakwe Yesu kwalaho. U n’wi phutsele hi tinguvu ivi a n’wi lata endhawini leyi swifuwo swi dyelaka eka yona.

Varisi van’wana a va ri enhoveni nivusiku ekusuhi ni le Betlehema, va ri karhi va rindza tinyimpfu ta vona. Hi xitshuketa, ntsumi yi fike yi yima emahlweni ka vona naswona a va rhendzeriwe hi ku vonakala loku humaka eka Yehovha. Varisi volavo a va chuhile, kambe ntsumi yi te: ‘Mi nga chavi. Ndzi mi khomele mahungu yo tsakisa. Ku velekiwe  Mesiya eBetlehema namuntlha.’ Hi nkarhi wolowo, ku humelele tintsumi to tala emapapeni, ti ri karhi ti ku: ‘Ku vangama a ku ye eka Xikwembu etilweni ni ku rhula emisaveni.’ Kutani tintsumi teto ti nyamalarile. Varisi volavo va endle yini?

Va nambe va ku: ‘A hi yeneni eBetlehema sweswi.’ Va hatle va famba kutani va fika va kuma Yosefa na Mariya exivaleni ni n’wana wa vona loyi a ha ku velekiwa.

Hinkwavo lava tweke leswi ntsumi yi swi byeleke varisi va hlamarile. Mariya u anakanyisise hi marito ya ntsumi yoleyo naswona a nga ma rivalanga. Varisi volavo va tlhelele laha a ku ri ni tinyimpfu ta vona, va khensa Yehovha hikwalaho ka leswi va swi voneke ni leswi va swi tweke.

“Ndzi huma eka [Xikwembu]. Naswona a ndzi titelanga, kambe hi xona xi ndzi rhumeke.”—Yohane 8:42