Nghena endzeni

Hundzela eka leswi nga endzeni

Tirhela Yehovha, Hayi Sathana

Tirhela Yehovha, Hayi Sathana

Hinkwerhu ka hina hi ni ntshunxeko wo tihlawulela. Hi fanele hi hlawula leswaku hi lava ku tirhela Yehovha kumbe Sathana ni madimona yakwe. A hi nge swi koti ku swi endla ha swimbirhi. Vona ndlela leyi ku nga vutlhari ha yona ku tirhela Yehovha!

Yehovha Hi Lonene

Hilaha hi dyondzeke hakona, madimona ma tsakela ku vavisa ni ku kanganyisa vanhu. Yehovha a nga tano. U rhandza vanhu ku fana ni tatana la rhandzaka vana va yena. I Munyiki wa “nyiko yin’wana ni yin’wana leyo saseka ni mikateko hinkwayo leyi hetisekeke.” (Yakobo 1:​17) Ku hava nchumu lowunene lowu a wu tsonaka vanhu, hambi hi nxavo lowukulu eka yena hi yexe.​—⁠Vaefesa 2:​4-⁠7.

Yesu, N’wana wa Xikwembu, u kombise rirhandzu eka vanhu hi ku horisa mavabyi ya vona

Ehleketa hi swilo leswi endliweke hi Yesu N’wana wa Xikwembu loko a ri laha misaveni. U endle leswaku timbheveve ti vulavula ni leswaku mabofu ma vona. U hanyise vanhu va nhlokonho ni vanhu lava lamaleke. U hlongole madimona ni ku hanyisa mixaka hinkwayo ya mavabyi. Hi ku pfuniwa hi matimba ya Xikwembu Yesu u kote ku pfuxa vafi.​—⁠Matewu 9:​32-35; 15:​30, 31; Luka 7:​11-⁠15.

 Ematshan’wini yo vula mavunwa leswaku xi hi kanganyisa, mikarhi hinkwayo Xikwembu xi vulavula ntiyiso. A xi kanganyisi munhu hambi ku ri wihi.​—⁠Tinhlayo 23:⁠19.

Papalata Mikhuva Leyi Thyakeke

Hilaha vulwembu bya pume byi phasaka nhongana ha kona, vanhu va timiliyoni va phasiwe hi ku tshemba mavunwa. Va chava vafi. Va chava madimona. Va karhateka hi mindzhukano, mihlolo, timhamba, ni ku phahla. Va boheleriwe hi tidyondzo ni mikhuva leyi sekeriweke eka vun’wa bya Sathana Diyavulosi. Malandza ya Xikwembu a ma phasiwanga hi xin’wana xa swilo leswi.

Yehovha u ni ntamu lowukulu swinene ku tlula Sathana. Loko u tirhela Yehovha, u ta ku sirhelela eka madimona. (Yakobo 4:⁠7) Vuloyi a byi nge tirhi eka wena. Hi xikombiso, eNigeria, tin’anga tinharhu ta xintima ta matimba swinene ti tirhise vuloyi, a ti lava ku dlaya Mbhoni ya Yehovha leyi aleke ku suka edorobeni. Loko vuloyi byi hlulekile, yin’wana ya tin’anga leti ta xintima yi sungule ku chava, yi ya eka Mbhoni, ivi yi kombela ndzivalelo.

Vaefesa va hise tibuku ta vona ta vungoma

Loko madimona ma ku karhata, u nga vitana Xikwembu hi vito ra xona ku nga Yehovha naswona xi ta ku sirhelela. (Swivuriso 18:​10) Kambe leswaku u kuma nsirhelelo wa Xikwembu, u fanele u papalata xin’wana ni xin’wana lexi fambisanaka ni vungoma ni ku gandzela madimona. Vagandzeri va Xikwembu va le Efesa wa khale va endle tano. Va hlengelete tibuku ta vona hinkwato ta vungoma ivi va ti hisa. (Mintirho 19:​19, 20) Namu ntlha malandza ya Xikwembu ma fanele ku endla tano. Tihambanise ni timhamba, switshungulo, swihakarho swa “nsirhelelo,” ku phahla, tibuku ta vungoma ni xin’wana ni xin’wana lexi hlanganeke ni mikhuva ya vungoma.

Vana eVugandzerini Bya Ntiyiso

Loko u lava ku tsakisa Xikwembu, a swi enelanga ku fularhela vugandzeri bya mavunwa ni ku tshika ku endla swilo swo biha ntsena. U fanele u va evugandzerini lebyi tengeke naswona u byi hisekela. Bibele yi komba leswi lavekaka:

Vana kona eka minhlangano ya Vukreste.​—⁠Vaheveru 10:​24, 25

Dyondza Bibele.​—⁠Yohane 17:3

Chumayela van’wana.​—⁠Matewu 24:⁠14

Khongela eka Yehovha.​—⁠Vafilipiya 4:​6, 7

Khuvuriwa.​—⁠Mintirho 2:⁠41

 Hlanganyela Ni Timbhoni Ta Yehovha

Sathana ni madimona va ni vanhu emisaveni lava dyondzisaka ni ku endla swilo swo biha. Kambe Yehovha na yena u ni vanhu. I Timbhoni ta Yehovha. (Esaya 43:​10) Emisaveni hinkwayo, ku ni Timbhoni leti tlulaka nhungu wa timiliyoni. Hinkwato ka tona ti ringeta hi matimba ku endla swilo leswinene ni ku dyondzisa vanhu ntiyiso. Ematikweni yo tala, u nga tihlanganisa na tona eHolweni ya Mfumo, laha ti nga ta ku amukela hi mandla mambirhi.

Ntirho wa tona i ku pfuna van’wana ku tirhela Xikwembu. Ti ta dyondza Bibele na wena ekaya ra wena, ti ku pfuna ku dyondza ku gandzela Yehovha hi ndlela leyi lulameke. Leswi a swi kali swi lava u swi hakelela. Timbhoni ta swi tsakela ku dyondzisa ntiyiso hikuva ti rhandza vanhu naswona ti rhandza Yehovha Xikwembu.

Timbhoni ta Yehovha ti ta ku pfuna ku tirhela Xikwembu