Ndzi velekiwe hi 1966 matihlo ya mina ya ri ni mapapa naswona vuvabyi lebyi, lebyi nga tolovelekangi byi endle leswaku ndzi nga voni kahle. Hikwalaho ka sweswo, tihlo ra mina ra ximatsi a ri voni naswona ra xinene ri vona switsongo. Kambe hi tihlo ra mina ra xinene ndza swi kota ku vona xibakabaka ni ku hlaya buku loko ndzi yi tshinete ekusuhi. A ndzi swi koti ku endla swilo leswitsongo swo fana ni ku chayela ni ku tlanga mintlango. Nilokoswiritano, a ndzi byi pfumelelanga vuvabyi lebyi byi ndzi sivela ku va ni vuxaka na Yehovha.

Ndzi Dyondza Ku Rhandza Yehovha Ndza Ha Ri Ntsongo

 Ndzi kulele eRafaela, ku nga xidorobana lexitsongo lexi nga kwalomu ka 500 wa ti khilomitara en’walungu vupeladyambu bya Buenos Aires eArgentina. Mhani na kokwana a va ri Timbhoni ta Yehovha kasi papa a a nga pfumeli eka Xikwembu. A a ri ni musa naswona a a nga swi kaneti leswi mhani a a pfumela eka swona ni leswi a a ndzi kurisela entiyisweni.

 Mhani a a swi rhandza ku vulavula na mina hi Yehovha naswona a ndzi swi tsakela ku n’wi yingisela. A ndzo va ni malembe mambirhi ntsena loko a sungula ku dyondza na mina hi buku leyi nge, From Paradise Lost to Paradise Regained. a Mikarhi hinkwayo a a ta sungula hi ku vutisa xivutiso kutani a hlaya ndzimana ivi a ndzi vutisa xivutiso nakambe. Eku sunguleni a ndzi nga wu twisisi ntiyiso lowu a ndzi wu dyondza ebukwini yoleyo. Kambe hi ku famba ka nkarhi, dyondzo yoleyo yi ndzi pfune ku teka Xikwembu xi ri xa xiviri ni ku tshinela eka xona.

 Loko se ndzi kota ku hlaya, ndzi hlaye mikandziyiso hinkwayo leyi a yi vulavula hi Bibele leyi a ndzi kota ku yi kuma. Leswi ndzi nga voniki kahle, a ndzi fanele ndzi yi tshineta swinene buku exikandzeni kambe sweswo a swi ndzi hetanga matimba. Mhani u ndzi dyondzise ku rhandza ku hlaya, ku ta fikela ninamuntlha ndza ha swi tsakela ku hlaya.

 A ndzi rhandza ngopfu ku hlaya Tibuku Ta Lembe Ta Timbhoni ta Yehovha. Ndzi hlaye hi mitlhontlho ni mitokoto ya vamakwerhu va le matikweni man’wana ya le kule naswona a ndzi lava ku va murhumiwa ni ku ya tirha laha a ku ri ni xilaveko lexikulu. Leswaku ndzi kota ku fikelela sweswo, a ndzi swi tiva leswaku ndzi fanele ndzi endla nhluvuko kutani ndzi endle yini?

 Loko ndzi va ni malembe ya nkombo, ndzi ve muhuweleri loyi a nga khuvuriwangiki. A ka ha ri lembe leri fanaka leri mina na Alejandro hi languteke xibakabaka hi bula hi leswi hi lavaka ku swi fikelela. A ndzi tsake swinene loko ndzi va muhuweleri loyi a nga khuvuriwangiki. Tanihi muhuweleri loyi a ha ri muntshwa, ndzi endle hinkwaswo leswi ndzi nga swi kotaka leswaku ndzi chumayela tintangha ta mina ni ku tokota ntsako wo dyondzisa vana van’wana Bibele.

 A ndzi swi tiva leswaku a ndzi fanele ndzi ya emahlweni ndzi endla nhluvuko loko ndzi lava ku tsakisa Xikwembu. (1 Timotiya 4:15) Endzhaku ka malembe mambirhi, ndzi byele vatswari va mina leswaku ndzi lava ku va nandza loyi a khuvuriweke wa Yehovha. Loko ndzi hlamusele xivangelo xa xiboho xa mina, tatana u pfumerile. Ndzi khuvuriwe ndzi ri ni malembe ya kaye swin’we ni munghana wa mina Alejandro.

Ndlela Leyi Ndzi N’wi Rhandzaka Hayona Yehovha Yi Ringiwa

 Hi 1976, loko ndzi nga si va ni lembe ndzi khuvuriwile, mfumo wa le Argentine wu yirise migingiriko ya Timbhoni ta Yehovha. Etikweni hinkwaro, vana va madzana va Timbhoni ta Yehovha va hlongoriwile eswikolweni hi leswi a va ala ku yimbelela risimu ra rixaka. Vadyondzisi vo hlayanyana va ndzi byele leswaku na mina a ndzi ta hlongoriwa loko ndzi nga yimbeleli.

 Xiyimo xi ye xi nyanya loko tatana a ndzi byela leswaku wa karhateka hi vumundzuku bya mina. U te: “A ndzi na mhaka loko u ya etidyondzweni kumbe u chumayela van’wana kambe a ndzi nge ku tshiki u hlongoriwa exikolweni ivi ndzi nga endli nchumu. Dyondzo wa yi lava hikuva a wu voni kahle, loko u nga dyondzanga u ta tikhathalela njhani loko se u kurile?”

 Entiyisweni, a ndzi swi lava ku tsakisa tatana kambe a ndzi swi tiva leswaku ndzi fanele ndzi tshembeka eka Yehovha. Ndzi khongele ko tala eka Yehovha ndzi n’wi kombela leswaku a ndzi pfuna ni ku ndzi kongomisa. Endzhaku ko hlaya ni ku anakanyisisa hi marito lama kumekaka eka Mitirho 5:29 ndzi teke xiboho xo ya emahlweni ndzi ala ku yimbelela risimu ra rixaka. Yehovha a nga ndzi tshikanga, u ndzi tiyisile ni ku ndzi pfuna leswaku ndzi ya emahlweni ndzi tiyisela. (1 Vakorinto 10:13) Ndzi nga swi langutelanga, vadyondzisi va mina va tshike ku ndzi chavisela ku ndzi hlongola exikolweni. Kutani hi 1979, Khoto Leyikulu ya le Argentina yi lerise leswaku vana vambirhi va Timbhoni ta Yehovha va tlheriseriwa exikolweni. Tikhoto to tala letitsongo na tona ti endle xiboho lexi fanaka. Ndzi yi vone hi lawa ya ka mina ndlela leyi Yehovha a hi sirheleleke hayona. Sweswo swi endle leswaku ndzi lava ku ya emahlweni ndzi tirhela Xikwembu lexi ndzi xi rhandzaka.

A Ndzi Swi Rivalanga Leswi A Ndzi Lava Ku Swi Fikelela

 Endzhaku ko khuvuriwa ndzi ye emahlweni ndzi ehleketa hileswi ndzi lavaka ku swi fikelela. Swin’wana swa swona a ku ri ku ya eXikolweni xa Giliyadi ni ku va murhumiwa. b Loko a vo ndzi hlawurisa tiko leri ndzi lavaka ku ya tirha eka rona, a ndzi ta hlawula Equatorial Guinea. Loko ndzi ri karhi ndzi hlaya Tibuku ta Lembe, ndzi kume leswaku a ku ri ni xilaveko lexikulu xa vachumayeri va Mfumo etikweni rero naswona Xipaniya a ku ri rin’wana ra tindzimi leti a ti vulavuriwa.

 Mhani u endle hinkwaswo leswi a a swi kota leswaku a ndzi khutaza ku fikelela leswi a ndzi swi lava. Hi xikombiso, mikarhi yo tala a a rhamba mulanguteri wa muganga ni nsati wakwe ekaya. Ripfumelo ni ku hiseka ka vona swi endle leswaku ndzi lava ku nghenela ntirho wa nkarhi hinkwawo. Ndzi tlhele ndzi sungula ku hlaya Bibele ndzimana hi ndzimana hilaha a ndzi ehleketa leswaku swichudeni swa Giliyadi swi endla hakona.

 Xa nkoka ngopfu hileswi a ndzi tshama ndzi khomekile hi ntirho wo chumayela. Ndzi pfune vanhu vo hlayanyana lava hi ku famba ka nkarhi va tinyiketeleke eka Yehovha. Un’wana wa vona a ku ri Antonia, wansati la kuleke wa mukhatoliki loyi a a dzike eka swa tipolitiki. Endzhaku ka loko ndzi n’wi kume ro sungula eka ntirho wo chumayela hi yindlu ni yindlu, ndzi tlhelerile endzhaku ka masiku ma nga ri mangani ndzi ri na kokwana naswona hi sungule dyondzo ya Bibele. Hi ku famba ka nkarhi Antonia u te, “Ndzi hlamarile loko ndzi hlangana ni muntshwa loyi a a tiyimisele ku bula hi timhaka ta Bibele, sweswo hi swona swi endleke leswaku ndzi dyondza Bibele na wena.” U endle nhluvuko ni ku tshika swilo swo tala naswona u khuvuriwe a ri ni malembe ya 73.

Ndzi Endla Hinkwaswo Leswi Ndzi Nga Swi Kotaka

 Loko se ndzi kule ku ringanela, ndzi ye eka vakulu ndzi ya va vutisa leswaku i yini leswi ndzi faneleke ndzi swi endla leswaku ndzi va murhumiwa. Swi ndzi hlamarisile loko vakulu va ndzi byela leswaku vahuweleri va le Argentina a va nga pfumeleriwi ku tata fomo ya ku ya eXikolweni xa Giliyadi. c A ndzi hele matimba kambe xihinga lexi a xi ndzi sivelanga ku tiyimisela ku tirha tanihi phayona ni ku nyika Yehovha leswi nga ematimbeni ya mina.

 Hi 1991 ndzi bumabumeriwile leswaku ndzi va nkulu evandlheni. Endzhaku ka malembe mambirhi loko ndzi ri ni malembe ya 26, ndzi ye eXikolweni xa Ndzetelo wa Vutirheli (MTS) lexi sweswi xi tivekaka tanihi Xikolo xa Vachumayeri va Mfumo. Endzhaku ko thwasa, ndzi vuyele evandlheni ra hina eRafaela.

 Leswi ndzi nga voniki kahle, a swi ndzi tikela ku hetisisa byin’wana bya vutihlamuleri bya mina evandlheni. Tanihi nkulu, mikarhi yin’wana a ndzi pfa ndzi averiwa ku fambisa dyondzo ya swivutiso ni tinhlamulo etidyondzweni. A swi ndzi tikela ku vona lava tshameke eka layini yo sungula eHolweni, a ku ri tlakula vaxurhe ku vona lava tlakuseke mavoko. A ndzi ta sungula hi ku languta un’wana ni un’wana leswaku u tshame kwihi kambe loko un’wana o suka laha a tshame kona a ndzi ta n’wi vitana hi vito leri a ri nga ri ra yena. Sweswi ndzi kombela makwerhu a ndzi byela mavito ya lava tlakuseke mavoko.

 Hi 1998 ndzi tekane na phayona leri hisekaka ku nga Vanina naswona a hi lava ku fikelela leswi fanaka entirhweni wa Yehovha. Hi tirhe hi matimba leswaku hi ti endla hi kumeka eka swiavelo swo hambanahambana. Swin’wana swa leswi a hi lava ku swi fikelela a hi kotanga ku swi fikelela hileswi a ndzi nga voni kahle hambiswiritano, hi endle leswi hi nga swi kotaka.

 Mina na Vanina hi ehlekete hi ku tirha laha ku nga ni xilaveko lexikulu eBolivia tanihi maphayona ya nkarhi hinkwawo kutani hi nambe hi endla malunghiselelo yo rhurhela kona. Hambiswiritano, loko ku sale mavhiki manharhu leswaku hi rhurha hi kume xirhambo lexi a hi nga xi langutelanga xa leswaku hi ya tirha erhavini ra le Argentina. A ndzi ri ni malembe yo hlayanyana ndzi ri karhi ndzi pfuneta eka Ndzawulo ya swa Nawu, a hi tsakile swinene loko hi kota ku tirhela Yehovha eBethele nkarhi hinkwawo.

Ndzi Dyondza Ku Titsongahata

 Ku sukela hi 2001, mina na Vanina hi tirhe ehofisi ya rhavi ra le Argentina laha hi tokoteke mikateko yo tala. Hambiswiritano hi 2014, tihlo ra mina ra xinene ri ye emahlweni ri vaviseka, leswi a swi ta endla leswaku ndzi nga ha voni hi ku helela. A ndzi titwa ndzi nga pfuni nchumu, a ndzi swi tiva leswaku emasikwini lawa yo hetelela Yehovha u sirhelela vuxaka bya hina na yena kambe a ndzi lava a sirhelela rihanyo ra mina. A ndzi nga swi xiyi leswaku se a ndzi tiehleketelela ngopfu. Entiyisweni, Yehovha u lunghise langutelo ra mina, njhani?

 Ndzi sungule ku yingisela rungula leri rhekhodiweke ra buku ya Bibele ya Yobo. Xikombiso xakwe xi ndzi pfune ndzi vona leswaku a ndzi ehleketisisa ngopfu hi xiyimo xa mina. (Yobo 30:20, 26) Hambileswi a ndzi nga ha ta vona, rihanyo ra mina a ku nga ri rona ra nkoka ngopfu. A ndzi fanele ndzi dzika eka leswi nga swa nkoka ngopfu. (Yobo 35:9, 10) I yini leswi ndzi pfuneke ku cinca langutelo ra mina?

 Makwerhu un’wana loyi a nga voniki u ndzi rhambe leswaku hi ya eka xichudeni xakwe xa Bibele. Loko ndzi ri karhi ndzi vona makwerhu a fambisa dyondzo, ndzi xiye leswaku hambiloko ndzo fa matihlo ndzi nga swi kota ku tirhela Xikwembu lexi ndzi xi rhandzaka. Sweswo hi swona leswi a swi ri swa nkoka eka mina. Endzhaku ka masiku ma nga ri mangani, mulanguteri wa muganga u vulavule na mina ni ku ndzi hlayela Pisalema 112:7, 8. U ndzi pfune ndzi vona leswaku loko ndzo tshemba Yehovha hi ku helela, a nge pfuki a ndzi lahlele mavoko hambiloko ndzi nga ha voni.

 Ndzi endliwe vuhandzuri eka tihlo ra mina ra xinene naswona ndzi kote ku hlakarhela kahle. Endzhaku ka loko ndzi endliwe vuhandzuri, ndzi ye emahlweni ndzi tirha erhavini naswona endzhaku ka lembe ndzi sungule ku tirha eka Ndzawulo ya swa Nawu ya ntsindza wa misava hinkwayo. Loko ndzi ri karhi ndzi pfuneta emarhavini yo hambanahambana emisaveni hinkwayo hi swa nawu, hi ku phindaphinda ndzi vone ndlela leyi Yehovha a va pfunaka hayona vanhu vakwe.—Yobo 42:2.

 Yehovha u ndzi dyondzise mhaka ya risima swinene hi ku titsongahata ku nga leswaku swiphiqo leswi ndzi langutanaka na swona a hi swa nkoka ngopfu. Ndzi tlhele ndzi dyondza leswaku a nge pfuki a va tshikile vanghana vakwe.—Pisalema 9:10.

Ndzi Swi Vonile Leswaku Yehovha Hi Lonene

 Yehovha u tshame a ri wa nkoka evuton’wini bya mina ku sukela loko ndza ha ri ntsongo. Ndza n’wi khensa mhani hileswi a ndzi dyondziseke ku rhandza Yehovha ni ku tivekela leswi ndzi lavaka ku swi fikelela entirhweni wakwe. Yehovha u ndzi pfunile leswaku ndzi nga tshiki hambiloko swin’wana ndzi nga koti ku swi fikelela, u ndzi seketerile leswaku ndzi nga teki tlhelo loko ndzi ri exikolweni naswona u ndzi pfunile ndzi cinca ndlela leyi a ndzi ehleketa hayona loko ndzi dzika ngopfu eka swiphiqo leswi a ndzi ri na swona.

 Se ku hundze malembe ya 50, mina ni munghana wa mina Alejandro hi langute xibakabaka ivi hi bula hi leswi hi navelaka ku swi fikelela. Hi vusiku byebyo ndzi vone ku saseka ka tinyeleti kambe ndzi vone swo tala swo tlula sweswo leswi Yehovha a swi endleke. Hambileswi ndzi nga voniki kahle, ndzi nga vula ndzi nga ti pfinyingi leswaku ndzi ‘vone vunene bya’ Xikwembu lexi ndzi xi rhandzaka.—Pisalema 27:4.