Yobo 41:1-34

  • Xikwembu xi hlamusela Levhiyathani yo hlamarisa (1-34)

41  “Xana u nga phasa Levhiyathani*+ hi xinjovo,Kumbe u bohelela ririmi ra yona hi ntambhu?   Xana u nga nghenisa ntambhu etinhompfini ta yona,Kumbe u nga yi boxa tinhlaya hi ntlhavo?*   Xana yi nga ku xavelela ko tala,Kumbe, xana yi nga vulavula kahle na wena?   Xana yi nga endla ntwanano na wena,Leswaku u yi endla hlonga ra wena hilaha ku nga heriki?   Xana u nga tlanga na yona ku fana niloko u tlanga ni xinyenyana,Kumbe, xana u nga yi tsimba leswaku yi tlanga ni vana va wena va vanhwanyana?   Xana vaxavisi va nga xaviselana yona? Xana va nga pambulelana yona?   Xana u nga tata dzovo ra yona hi miseve yo copa tihlampfi letikulu,+Kumbe, xana u nga tata nhloko ya yona hi matlhari yo tlhava tihlampfi?   Veka voko ra wena ehenhla ka yona;Nyimpi ya kona a wu nge yi rivali naswona a wu nge he engeti!   A wu nge pfuki u yi hlurile. Hi ku yi vona ntsena, u to rhurhumela kunene.* 10  A nga kona la nga ni xivindzi xo yi pfuxa. Kutani i mani loyi a nga tiyelaka mina?+ 11  I mani la nga rhanga a ndzi nyika xo karhi, lerova ndzi boheka ku n’wi hakela?+ Hinkwaswo leswi nga ehansi ka matilo i swa mina.+ 12  Ndzi ta ku byela swo tala hi milenge ni mavoko ya yona,Hi matimba ni miri wa yona lowu vumbekeke kahle. 13  I mani la suseke dzovo ra yona ro tsindziyela? I mani la nga nghenaka etinhlayeni ta yona leti pfulekeke? 14  I mani la nga pfulaka nomu wa yona? Matino ya yona ma chavisa matlhelo hinkwawo. 15  Nhlana wa yona wu ni tilayini ta mahakatimba,Lama pfalekeke swi tiya. 16  Ma hlangane kahle,Lerova ni moya a wu koti ku nghena exikarhi ka wona. 17  Ma namarhelanile;Ma khomananile naswona a ma nge hambaniseki. 18  Loko yi entshemula ku humelela ku vonakala,Matihlo ya yona ma tshwukile ku fana ni vurhonga. 19  Enon’wini wa yona ku pfurha malangavi;Ku baleka ni tinhlahle ta ndzilo. 20  Tinhompfu ta yona ti huma musi,Ku fana ni xitiko lexi lumekiweke hi mahlanga. 21  Moya wa yona loko yi hefemula wu lumeka makala,Ku huma malangavi enon’wini wa yona. 22  Nhamu ya yona yi ni matimba swinene,Hinkwavo lava hlanganaka na yona va chava. 23  Tinyama ta yona ti namarhelanile;Ku fana ni tipuleti ta nsimbhi leti khomaneke. 24  Mbilu ya yona yi tiye ku fana ni ribye,Yi tiye ku fana ni ribye ro silela eka rona. 25  Loko yi yima, hambi lava nga ni matimba va chava;Ku mpfhumpfha ka yona ku vanga ku pfilunganyeka. 26  A yi nge hluriwi hi banga;Hambi ku ri tlhari kumbe nseve.+ 27  Eka yona nsimbhi yo fana ni byanyi,Koporo yi fana ni mhandzi yo bola. 28  A yi wu chavi nseve;Maribye ya xipelupelu mo fana ni mahlanga eka yona. 29  Xigombo* xo fana ni rihlanga rinene eka yona,Loko yi twa ku ketlaketla ka tlhari yo hleka. 30  Khwiri ra yona ri fana ni swirhengele;Yi famba ehenhla ka ndzhope ku fana ni xileyi.+ 31  Yi endla xidziva xa mati xi vila ku fana ni mbita;Yi pfindlusa lwandle ku fana ni mbita ya mafurha. 32  Yi endla khuvi loko yi ri karhi yi famba endzeni ka mati. Munhu a nga vona onge mati ma ni misisi yo basa. 33  Ku hava xo fana na yona emisaveni,Xivumbiwa lexi endliweke leswaku xi nga chavi nchumu. 34  Yi honolela swiharhi hinkwaswo leswi nga ni manyunyu. I hosi ya swivandzana hinkwaswo leswikulu.”

Tinhlamuselo ta le hansi

Swi nga endleka ku ri ngwenya.
Hi Xiheveru, “mutwa.”
Kumbe “yi ta ku tlatlalata.”
Kumbe “Xigiya; Muchizo.”