Yobo 19:1-29

  • Yobo a hlamula (1-29)

    • A ala ku tshinyiwa hi vanghana vakwe (1-6)

    • A vula leswaku u fularheriwile (13-19)

    • “Mukutsuri wa mina wa hanya” (25)

19  Yobo a hlamula a ku:   “Xana mi ta ndzi karhata ku fikela rini,+Mi ndzi tlhava hi marito?+   Mi ndzi rhukane ka khume;A swi mi nyumisi ku ndzi tshikilela.+   Loko entiyisweni ndzi endle xihoxo,I xihoxo xa mina.   Loko mi phikelela mi vula leswaku ma antswa ku ndzi tlula,Mi tlhela mi vula leswaku khombo leri ndzi weleke ndzi lo tivangela,   Kutani swi tiveni leswaku ndzi hambukisiwe hi Xikwembu,Naswona xi ndzi phase hi nete ya xona yo hlota.   Vonani! Ndzi tshamela ku rila ndzi ku, ‘Ndzi vavisiwile,’ kambe a ndzi hlamuriwi;+Ndzi tshamela ku kombela ku pfuniwa, kambe a ku na vululami.+   A ndzi koti ku hundza hikuva xi ndzi pfalele ndlela hi khumbi ra maribye;Xi funengete tindlela ta mina hi munyama.+   Xi ndzi hluvule xindzhuti xa minaXi susa harhi enhlokweni ya mina. 10  Xi ndzi tshovelela matlhelo hinkwawo kukondza ndzi nga ha vi kona;Xi tsuvula ntshembo wa mina ku fana ni murhi. 11  Vukarhi bya xona bya ndzi hisa,Naswona xi ndzi teka ndzi ri nala wa xona.+ 12  Masocha ya xona ma ndzi hlasela,Ma dzima mixaxa ma rhendzela tende ra mina. 13  Xi yise vamakwerhu ekule na mina,Ni lava va ndzi tivaka va ndzi fularherile.+ 14  Vanghana* va mina lavakulu a va ha ri kona,Ni lava a ndzi va toloverile va ndzi rivele,+ 15  Vaendzi va mina+ ni malandza ya mina ya xisati va ndzi teka ndzi ri xitaxifamba;Ndzi muluveri ematihlweni ya vona. 16  Ndzi vitana nandza wa mina kambe a nga hlamuli;Ndzi n’wi kombele leswaku a ndzi twela vusiwana. 17  Ku hefemula ka mina ka nyenyetsa eka nsati wa mina,+Naswona ndza nun’hwa eka vamakwerhu. 18  Ni vana va ndzi nyenya;Loko ndzi suka ndzi yima, va sungula ku ndzi sandza. 19  Vanghana va mina lavakulu hinkwavo va ndzi nyenya,+Ni lava a ndzi va rhandza va ndzi jikerile.+ 20  Ndzi lo sala hi marhambu,+Ndzi pone ri ahlamile.* 21  Ndzi kombeni tintswalo, n’wina vanghana va mina, ndzi kombeni tintswalo, Hikuva ndzi khumbiwe hi voko ra Xikwembu.+ 22  Hikwalaho ka yini mi tshamela ku ndzi xanisa ku fana ni Xikwembu,+Mi ndzi hlasela mi nga ndzi wisisi?+ 23  Loko marito ya mina a mo tsariwa ehansi,Loko a mo tsariwa ebukwini! 24  Loko a mo tsariwa eribyeni hi nsimbhi,Ma tshama hilaha ku nga heriki! 25  Hikuva ndza swi tiva leswaku mukutsuri wa mina+ wa hanya;U ta ta hi ku famba ka nkarhi, u ta yima ehenhla ka misava. 26  Endzhaku ka loko nhlonge ya mina yi yevuriwile,Loko ndza ha hanya, ndzi ta vona Xikwembu, 27  Ndzi ta xi vona hi ndzexe,Ndzi ta xi vona hi matihlo ya mina, hayi ya un’wana.+ Kambe ndzi karhatekile swinene. 28  Hikuva mi ri, ‘Hi n’wi xanisa njhani?’+ Onge hiloko xiphiqo xi ri na mina. 29  Chavani banga,+ Hikuva banga ri xupula la endlaka xihoxo;Mi fanele mi swi tiva leswaku ku ni muavanyisi.”+

Tinhlamuselo ta le hansi

Kumbe “Maxaka.”
Hi Xiheveru, “Ndzi pone ndzi ri ni nhlonge ya meno ya mina ntsena.”