Yobo 16:1-22
16 Yobo a hlamula a ku:
2 “Se ndzi swi twe ko tala swilo swo fana ni leswi.
Hinkwenu ka n’wina mi vachaveleri lava karhataka!+
3 Xana ma hela marito lama nga pfuniki nchumu?
U karhatiwa hi yini leswi u hlamulaka hi ndlela leyi?
4 Na mina ndzi nga vulavula ku fana na n’wina.
Loko a mo va eka xiyimo xa mina,A ndzi ta swi kota ku mi xopaxopa,Ndzi tlhela ndzi mi hlakahlela ni nhloko.+
5 Ku ri na sweswo, a ndzi ta mi tiyisa hi marito ya mina,A ndzi ta mi khongotela hi nomu wa mina.+
6 Loko ndzi vulavula, switlhavi swa mina a swi antswi,+Ni loko ndzi miyela, swa ha tifanela.
7 Kambe sweswi xi ndzi hete matimba;+Xi lovise ndyangu wa mina hinkwawo.
8 Xi tlhela xi ndzi khoma naswona sweswo swi le rivaleni eka vanhu,Lerova ku ondza ka mina ku endla ndzi vonaka onge ndzi ni nandzu.
9 Ku hlundzuka ka xona ku ndzi handzulerile, naswona xa ndzi venga.+
Xi luma ni matino loko xi ndzi vona.
Nala wa mina u ndzi tlhava hi matihlo yakwe.+
10 Va ndzi ahlamisele milomu,+Naswona va ndzi makale marhama va ri karhi va ndzi hleka;Va hlengeletane va tele leswaku va ta lwa na mina.+
11 Xikwembu xi ndzi nyiketa eka vafana,Xi ndzi lahlele eka lavo homboloka.+
12 A ndzi nga karhateki, kambe xi ndzi tlatlalatile;+Xi ndzi khome hi nhamu xi ndzi pfotlosa;Kutani xi ndzi copa hi miseve.
13 Vacopi va xona va ndzi rhendzerile;+Xi tlhava tinso ta mina,+ xi nga ndzi tweli vusiwana;Xi chulula nyongwa ya mina ehansi.
14 Xi ndzi boxetela ku fana ni khumbi;Xi ndzi mpfhumpfhela ku fana ni nhenha.
15 Ndzi tirhungele xiambalo* xo khwaxa leswaku ndzi xi ambala,+Ndzi celele xindzhuti* xa mina ehansi.+
16 Xikandza xa mina xi tshwukile hi ku rila,+Naswona ku ni ndzhuti lowukulu ehenhla ka tinxiyi ta mina,
17 Hambileswi ndzi nga vavisangiki munhu
Naswona xikhongelo xa mina xi baseke.
18 U nga yi funengeti ngati ya mina, wena misava!+
Naswona ku nga vi na ndhawu leyi ndzi nga rilelaka eka yona!
19 Nisweswi mbhoni ya mina yi le tilweni;Loyi a nga ta ndzi yimelela u le henhla.
20 Vanghana va mina va ndzi hleka+Loko ndzi ri karhi ndzi rilela Xikwembu.+
21 A ku ve ni munhu la nga ta avanyisa exikarhi ka munhu ni Xikwembu,Hilaha munhu a a ta endla hakona exikarhi ka vanhu vambirhi.+
22 Hikuva malembe lama saleke i matsongo,Naswona ndzi ta famba ndzi nga ha vuyi.+
