Vaavanyisi 20:1-48
-
Ku lwa ni nyimba ya Benjamini (1-48)
20 Kutani Vaisrayele hinkwavo va huma ku sukela eDani+ ku fikela eBera-xeba ni ku sukela etikweni ra Giliyadi,+ va hlengeletana emahlweni ka Yehovha eMizpa.+
2 Hiloko tindhuna ta vanhu ni tinyimba hinkwato ta Israyele va yima enhlengeletanweni ya vanhu va Xikwembu, masocha ya 400 000 lama fambaka hi milenge ma hlome hi mabanga.+
3 Hiloko va ka Benjamini va twa leswaku vavanuna va Israyele va ye eMizpa.
Kutani vavanuna va Israyele va ku: “Hi byele leswaku nchumu lowu wo biha wu endlekise ku yini?”+
4 Hiloko wanuna wa Mulevhi,+ loyi a dlayeriweke nsati a va hlamula a ku: “Ndzi ye emutini wa Gibiya+ laha ku tshamaka va ka Benjamini, leswaku mina ni nsati wa mina lontsongo hi etlela kona.
5 Kutani vaaki* va le Gibiya va ndzi hlasela, va fika va rhendzela yindlu leyi a ndzi ri eka yona nivusiku. A va lava ku dlaya mina kambe va pfinye nsati wa mina lontsongo kutani a fa.+
6 Hiloko ndzi teka ntsumbu wa nsati wa mina lontsongo ndzi wu tsemelela, ndzi rhumela swirho swa wona etikweni hinkwaro leri nga ndzhaka ya Vaisrayele,+ hikuva va endle nchumu lowu khomisaka tingana eIsrayele.
7 Sweswi n’wina Vaisrayele vulani leswi faneleke swi endliwa hi mhaka leyi.”+
8 Kutani vanhu hinkwavo va yima hi rito rin’we, va ku: “A ku na loyi a nga ta ya etendeni rakwe kumbe a tlhelela endlwini yakwe.
9 Sweswi a hi endleni leswi eka muti wa Gibiya: A hi hlawuleni vavanuna hi vuhlolotwana*+ lava nga ta lwa na wona.
10 Hi ta teka vavanuna va khume eka vavanuna va 100 eka tinyimba hinkwato ta Israyele, vavanuna va 100 eka va 1 000 ni vavanuna va 1 000 eka va 10 000, leswaku va hlengeleta swakudya swa masocha, lama nga ta lwa ni muti wa Gibiya lowu ku tshamaka ndyangu wa ka Benjamini, hikwalaho ka nchumu lowu khomisaka tingana lowu va wu endleke eIsrayele.”
11 Hiloko vavanuna hinkwavo va Vaisrayele va hlengeletana leswaku va ya lwa ni muti wolowo.
12 Kutani tinyimba ta Israyele ti rhuma vavanuna eka vavanuna va tinyimba hinkwato ta Benjamini, va fika va ku: “Hikwalaho ka yini ku endleke nchumu lowu wo biha exikarhi ka n’wina?
13 Sweswi humesani vavanuna volavo vo homboloka eGibiya+ hi ta va dlaya, leswaku hi herisa vubihi eIsrayele.”+ Kambe vanhu va ka Benjamini va ala ku endla leswi vamakwavo va Vaisrayele va va byeleke swona.
14 Kutani va ka Benjamini va hlengeletana va huma emitini va ya eGibiya leswaku va ya lwa ni vavanuna va Vaisrayele.
15 Hi siku rero va ka Benjamini va hlengeleta vavanuna va 26 000 lava hlomeke hi mabanga va huma emitini ya vona, ku nga hlayiwi tinhenha ta 700 ta le Gibiya.
16 Exikarhi ka masocha lawa a ku ri ni tinhenha ta 700 leti tirhisaka voko ra ximatsi. Tinhenha leti a ti kota ku hoxa ribye hi xipelupelu ti nga hupi hambi ku ri nsisi.
17 Vavanuna va Vaisrayele va hlengelete vavanuna va 400 000 lava hlomeke hi mabanga,+ ku nga hlayiwi va ka Benjamini naswona a va ri tinhenha leti nga ni ntokoto.
18 Vaisrayele va ya eBethele va ya vutisa Xikwembu+ va ku: “I vamani lava faneleke va hi rhangela loko hi ya lwa ni va ka Benjamini?” Yehovha a ku: “A ku rhange va ka Yuda.”
19 Endzhaku ka sweswo Vaisrayele va pfuka nimixo va ya dzima matende ya vona ekusuhi ni le Gibiya leswaku va ta wu hlasela.
20 Vavanuna va Israyele va huma leswaku va ya lwa ni va ka Benjamini; va lunghekela ku lwa na vona eGibiya.
21 Kutani vanhu va ka Benjamini va huma eGibiya, va dlaya vavanuna va 22 000 va Israyele hi siku rero.
22 Hambiswiritano, masocha ya Vaisrayele a ma ri ni xivindzi, kutani ma tlhela ma lunghekela ku ya lwa endhawini leyi ma lweke eka yona hi siku ro sungula.
23 Hiloko Vaisrayele va ya eBethele va fika va rila emahlweni ka Yehovha ku fikela nimadyambu kutani va vutisa Yehovha va ku: “Xana hi fanele hi tlhela hi ya lwa ni va ka Benjamini lava nga vamakwerhu?”+ Yehovha a ku: “Fambani mi ya lwa na vona.”
24 Kutani Vaisrayele va tshinelela va ka Benjamini hi siku ra vumbirhi.
25 Va ka Benjamini na vona va huma eGibiya leswaku va ya hlangana na vona hi siku ra vumbirhi, va tlhela va dlaya Vaisrayele va 18 000+ lava hlomeke hi mabanga.
26 Hiloko vavanuna hinkwavo va Israyele va ya eBethele. Va fika va rila kutani va tshama emahlweni ka Yehovha+ naswona hi siku rero va titsone swakudya+ ku fikela nimadyambu, va tlhela va endla magandzelo yo hisiwa+ ni magandzelo ya ku kombela ku rhula+ emahlweni ka Yehovha.
27 Endzhaku ka sweswo vavanuna va Israyele va vutisa Yehovha,+ hikuva areka ya ntwanano ya Xikwembu xa ntiyiso a yi ri kwalaho emasikwini wolawo.
28 Finiyasi,+ n’wana wa Eliyazara n’wana wa Aroni a a ri karhi a tirha* eka yona emasikwini wolawo. Vavanuna va Vaisrayele va vutisa va ku: “Xana hi fanele hi tlhela hi ya lwa ni va ka Benjamini lava nga vamakwerhu kumbe hi fanele hi tshika?”+ Yehovha a va hlamula a ku: “Fambani mi ya lwa na vona hikuva mundzuku ndzi ta va nyiketa eka n’wina.”
29 Hiloko Vaisrayele va veka vavanuna leswaku va tumbela+ ematlhelweni hinkwawo ya Gibiya.
30 Hi siku ra vunharhu Vaisrayele va famba va ya lwa ni va ka Benjamini, va lunghekela ku lwa ni muti wa Gibiya, ku fana ni le mikarhini leyin’wana.+
31 Loko va ka Benjamini va huma leswaku va ya hlangana na vona, va va humesela ekule ni muti.+ Kutani ku fana ni le mikarhini leyin’wana, va sungula ku hlasela ni ku dlaya vavanuna va Vaisrayele emagondzweni lamakulu, laha rin’wana ra kona a ri ya eBethele kasi rin’wana a ri ya eGibiya, va dlaya vavanuna va kwalomu ka 30 va Israyele.+
32 Hiloko va ka Benjamini va ku: “Ha va hlula ku fana ni le ku sunguleni.”+ Kambe Vaisrayele va ku: “Hi ta baleka hi va humesa emutini va ta emagondzweni lamakulu.”
33 Kutani vavanuna hinkwavo va Vaisrayele va huma etindhawini leti a va ri eka tona va lunghekela ku lwa eBali-tamara, kutani vavanuna lavan’wana va Vaisrayele lava a va tumberile va huma etindhawini ta vona ekusuhi ni le Gibiya.
34 Tinhenha ta 10 000 ta Vaisrayele ti ya eGibiya naswona nyimpi a yi hisa. Kambe va ka Benjamini a va nga swi tivi leswaku khombo ri le kusuhi ni ku va wela.
35 Yehovha a hlula va ka Benjamini+ emahlweni ka Vaisrayele naswona hi siku rero Vaisrayele va dlaya vavanuna va 25 100 va ka Benjamini, lava a va hlome hi mabanga.+
36 Hambiswiritano, va ka Benjamini+ a va ehleketa leswaku vavanuna va Vaisrayele va ta hluriwa loko va va balekela, kambe a va va balekela hi leswi a va tshemba vavanuna lava a va tumbelele vaaki va le Gibiya.+
37 Vavanuna va Vaisrayele lava a va tumberile va hatla va nghena emutini wa Gibiya. Hiloko va rhendzeleka na wona va dlaya vanhu hinkwavo hi banga.
38 Vavanuna va Vaisrayele a va twanane ni vavanuna lava tumbeleke leswaku va va endlela xikombiso hi musi lowu tuvikaka emutini.
39 Loko Vaisrayele va baleka enyimpini, vavanuna va ka Benjamini va hlasele va tlhela va dlaya vavanuna va kwalomu ka 30 va Vaisrayele,+ kutani va ku: “Swi le rivaleni leswaku ha va hlula ku fana ni le nyimpini leyin’wana.”+
40 Kutani ku sungula ku tuvika musi lowukulu emutini hilaha va twananeke hakona. Loko vavanuna va ka Benjamini va hundzuluka, va vona muti hinkwawo wu ri karhi wu tshwa.
41 Hiloko vavanuna va Vaisrayele va hundzuluka va sungula ku hlasela, kutani vavanuna va Benjamini va sungula ku chava hikuva a va swi vona leswaku khombo se a ri va fikerile.
42 Kutani va balekela vavanuna va Vaisrayele va ya emananga kambe va va hlongorisa; hiloko vavanuna lava humaka emitini ya le kusuhi va va pfuna ku va dlaya.
43 Va rhendzela va ka Benjamini va nga tshiki ku va hlongorisa. Va va hlula emahlweni ka muti wa Gibiya hi le tlhelo ra le vuxeni.
44 Eku heteleleni ku dlayiwa tinhenha ta 18 000 ta ka Benjamini.+
45 Hiloko vavanuna va ka Benjamini va baleka va ya emananga eribyeni ra Rimoni,+ kutani Vaisrayele va dlaya vavanuna va 5 000 emagondzweni lamakulu, va ya emahlweni va va hlongorisa ku ya fika eGidomo; hiloko va tlhela va dlaya vavanuna van’wana va 2 000.
46 Hinkwavo lava dlayiweke siku rero eka va ka Benjamini a ku ri tinhenha ta 25 000 leti hlomeke hi mabanga.+
47 Kambe vavanuna va 600 va balekela emananga eribyeni ra Rimoni, va tshama kwalaho tin’hweti ta mune.
48 Hiloko vavanuna va Vaisrayele va tlhela va hlasela va ka Benjamini hi banga ku katsa ni swilo hinkwaswo leswi saleke, ku sukela eka munhu ku ya eka xifuwo. Kutani va hisa miti hinkwayo leyi a va hundza hi le ka yona.
