Tipisalema 106:1-48
106 Dzunisani Yehovha!*
Khensani Yehovha, hikuva hi lonene;+Rirhandzu rakwe lerikulu a ri heli.+
2 I mani la nga yi hlamuselaka hi ku helela mitirho ya Yehovha ya matimba,Kumbe la nga vulavulaka hi swiendlo swakwe hinkwaswo swo hlamarisa?+
3 Va tsaka lava hanyaka hi vululami,Lava endlaka leswo lulama mikarhi hinkwayo.+
4 Yehovha Xikwembu xanga, ndzi tsundzuke loko u komba vanhu va wena musa.+
Ndzi khathalele u ndzi ponisa,
5 Leswaku ndzi ta tiphina hi vunene lebyi u byi kombaka vahlawuriwa va wena,+Leswaku ndzi ta tsaka ni tiko ra wena,Leswaku ndzi ta tibuma ha wena ndzi ku dzunisa ndzi ri ni ndzhaka ya wena.
6 Hi dyohile ku fana ni vakokwa wa hina;+Hi onhile; hi endle swo homboloka.+
7 Vakokwa wa hina a va nga ri na mhaka* ni mitirho ya wena yo hlamarisa eEgipta.
A va ri tsundzukanga rirhandzu ra wena ro hlamarisa,Kambe va ku xandzukerile elwandle, eLwandle ro Tshwuka.+
8 Kambe u va ponisile hikwalaho ka vito rakwe,+Leswaku a twarisa matimba yakwe.+
9 U tshinye Lwandle ro Tshwuka, kutani ri oma;U va fambisa exikarhi ka rona onge hiloko va famba emananga;+
10 U va ponise eka valala va vona+
A va kutsula evokweni ra nala.+
11 Mati ma funengete valala va vona;A ku ponanga* ni un’we.+
12 Hiloko va tshemba leswi a va tshembiseke swona;+Va sungula ku yimbelela swidzuniso swakwe.+
13 Kambe va hatle va rivala leswi a swi endleke;+A va n’wi yimelanga leswaku a va kongomisa.
14 Va ve ni makwanga emananga;+Va ringe Xikwembu emananga.+
15 Hiloko xi va nyika leswi va swi kombeleke,Kambe endzhaku ka sweswo xi va ba hi vuvabyi lebyi nga va hlakata ivi va fa.+
16 Va sungule ku vondzoka Muxe enxaxeni,Na Aroni+ mukwetsimi wa Yehovha.+
17 Kutani misava yi pfuleka yi mita Dathani,Yi funengeta lava a va ri na Abirama.+
18 Van’wana exikarhi ka vona va herisiwe hi ndzilo;Langavi ri lovise lavo homboloka.+
19 Va endle xifaniso xa rhole eHorebeVa khinsamela xifaniso xa nsimbhi;+
20 Va sungula ku gandzela xifaniso xa nkuzi leyi dyaka byanyi+
Ku ri ni ku dzunisa mina.
21 Va rivale Xikwembu+ Muponisi wa vona,Lexi va endleleke swilo swo hlamarisa eEgipta,+
22 Mitirho yo hlamarisa etikweni ra Hamu,+Swihlamariso eLwandle ro Tshwuka.+
23 A ku sele katsongo a va lovisile,Kambe Muxe muhlawuriwa wakwe, u va kombelele ku rivaleriwaLeswaku a nga va hlundzukeli a va lovisa.+
24 Kutani va nyenye tiko lerinene;+A va nga ri na ripfumelo eka leswi a va tshembiseke swona.+
25 A va tshamela ku gungula ematendeni ya vona;+A va n’wi yingisanga Yehovha.+
26 Hiloko a tlakusa voko a hlambanya mayelana na vonaLeswaku u ta va lovisa emananga;+
27 U lovise vatukulu va vona exikarhi ka vanhu va matiko,Naswona u va hangalase exikarhi ka matiko.+
28 Kutani va sungula ku gandzela Bali wa le Peyori+
Va tlhela va dya magandzelo lama endleriweke vafi.*
29 Va N’wi khunguvanyisile hi swiendlo swa vona,+Kutani va biwa hi ntungu.+
30 Kambe endzhaku ka loko Finiyasi a nghenelerile,Ntungu wu yimisiwile.+
31 Kutani a vuriwa lowo lulama hikwalaho ka sweswoEka switukulwana hinkwaswo hilaha ku nga heriki.+
32 Va N’wi khunguvanyisile ematini ya Meriba,*Naswona Muxe swi n’wi fambele ximatsi hikwalaho ka vona.+
33 Va n’wi hlundzukisileLerova a va holovela.+
34 A va va lovisanga vanhu va matiko,+Hilaha Yehovha a va leriseke hakona.+
35 Kambe va tshame ni vanhu va matiko+Kutani va tekelela* mahanyelo ya vona.+
36 A va tshamela ku gandzela swifaniso swa vona,+Kutani swi va ntlhamu eka vona.+
37 A va endla magandzelo hi vana va vona va majahaNi va vanhwanyana va endlela madimona.+
38 A va tshamela ku halata ngati leyi nga riki na nandzu,+Ngati ya vana va vona va majaha ni va vanhwanyana,Lava a va endlela swikwembu swa le Kanana+ magandzelo hi vona;Kutani tiko ri nyama hikwalaho ka ku halatiwa ka ngati.
39 Swiendlo swa vona swi endle leswaku va nyama;A va nga tshembekanga eka Xikwembu.*+
40 Hiloko vukarhi bya Yehovha byi pfurhela vanhu vakwe,Kutani a nyenya ndzhaka yakwe.
41 A va tshika va hlaseriwa hi matiko hi ku phindhaphindha,+Leswaku va fumiwa hi valala va vona.+
42 Valala va vona va va tshikilela,Va va khoma hi voko ra nsimbhi.
43 U va ponise ko tala,+Kambe a va tlhela va n’wi xandzukela va nga n’wi yingisi,+Kutani va khomisiwe tingana hikwalaho ka milandzu ya vona.+
44 Kambe a a ma vona maxangu ya vona+A twa ni xirilo xa vona.+
45 A a wu tsundzuka ntwanano lowu a wu endleke na vona,A va twela vusiwana* hikuva a a va rhandza.+
46 A endla leswaku hinkwavo lava va va endleke mahlonga+Va va twela vusiwana.
47 Hi ponise, Yehovha Xikwembu xa hina,+Hi hlengelete eka vamatiko+Leswaku hi ta khensa vito ra wena ro kwetsima,Hi ku dzunisa hi ntsako.+
48 A ku dzunisiwe Yehovha Xikwembu xa IsrayeleHilaha ku nga heriki.+
Vanhu hinkwavo a va vule va ku, “Amen!”*
Dzunisani Yehovha!*
Tinhlamuselo ta le hansi
^ Kumbe “Haleluya,” leswi vulaka “Dzunisani Yah.” Yah i nkomiso wa vito leri nge Yehovha.
^ Kumbe “a va nga yi twisisi.”
^ Kumbe “salanga.”
^ Ku nga magandzelo lama endleriwaka vafi kumbe swikwembu leswi nga hanyiki.
^ Leswi vulaka “Ku Holova.”
^ Kumbe “dyondza.”
^ Hi Xiheveru, “Va endle vunghwavava hi ku gandzela swikwembu.”
^ Kumbe “A a tisola.”
^ Kumbe “A swi ve tano.”
^ Kumbe “Haleluya,” leswi vulaka “Dzunisani Yah.” Yah i nkomiso wa vito leri nge Yehovha.
