Tipisalema 105:1-45
-
Ku tshembeka ka Yehovha eka vanhu vakwe
105 Khensani Yehovha+ mi dzunisa vito rakwe,Byelani vanhu mitirho yakwe.+
2 N’wi yimbeleleleni, n’wi yimbeleleni mi n’wi dzunisa hi tinsimu,Anakanyisisani* hi mitirho yakwe hinkwayo yo hlamarisa.+
3 Tibumeni hi vito rakwe ro kwetsima.+
Timbilu ta lava lavaka Yehovha a ti tsake.+
4 Lavisisani Yehovha+ ni matimba yakwe.
N’wi lavisiseni nkarhi hinkwawo.
5 Tsundzukani mitirho yakwe yo hlamarisa leyi a yi endleke,Masingita yakwe ni ndlela leyi a avanyiseke ha yona,+
6 N’wina vana* va Abrahama nandza wakwe,+N’wina vana va Yakobo, vahlawuriwa vakwe.+
7 I Yehovha Xikwembu xa hina.+
U avanyisa misava hinkwayo.+
8 U tsundzuka ntwanano wakwe hilaha ku nga heriki,+Xitshembiso lexi a xi endleke* eka xitukulwana xa vugidi,+
9 Ntwanano lowu a wu endleke na Abrahama,+Ni xihlambanyo lexi a xi endleke eka Isaka,+
10 Lexi a xi endleke xi va nawu eka Yakobo,Xi va ntwanano lowu nga heriki eka Israyele,
11 A ku, “Ndzi ta ku nyika tiko ra Kanana,+Ri va ndzhaka ya wena.”+
12 Va kume xitshembiso lexi va nga si tala,+Ina, a va ha ri vatsongo swinene naswona a va ri valuveri etikweni.+
13 A va yingayinga ni matiko,Va suka eka mfumo wun’wana va ya eka vanhu van’wana.+
14 A nga pfumelelanga munhu leswaku a va tshikilela,+Kambe u tshinye tihosi hikwalaho ka vona,+
15 A ku, “Mi nga tshuki mi khumba vahlawuriwa va mina,Naswona mi nga endli nchumu xo biha eka vaprofeta va mina.”+
16 U endle leswaku ku va ni ndlala etikweni;+U endle leswaku va nga ha xi kumi xinkwa.
17 U rhumele munhu leswaku a va rhangelaLoyi a xavisiweke a va hlonga, ku nga Yosefa.+
18 Va bohe milenge yakwe hi tinketana,+Nhamu yakwe va yi bohe hi tinsimbhi;
19 Kukondza ku fika nkarhi lowu leswi a swi vuleke swi endlekaka,+Rito ra Yehovha hi rona ri n’wi lulamiseke.
20 Hosi yi rhumele rito leswaku a tshunxiwa,+Mufumi wa vanhu u n’wi tshunxile.
21 Yi n’wi endle ndhuna ya yindlu ya yona,A fuma swilo swa yona hinkwaswo,+
22 Leswaku a lawula tihosana ta yonaNi ku dyondzisa vakulukumba va yona vutlhari.+
23 Hiloko Israyele a ya eEgipta,+Yakobo a va muluveri etikweni ra Hamu.
24 Xikwembu xi endla leswaku vanhu va xona va tswalana va tala swinene;+Xi va endla va va ni matimba ku tlula valala va vona,+
25 Xi va tshika va venga vanhu va xona,Va bohela malandza ya xona makungu yo biha.+
26 Xi rhumela Muxe nandza wa xona,+Na Aroni+ loyi xi n’wi hlawuleke.
27 Va va endlela swikombiso swa xona,Masingita ya xona etikweni ra Hamu.+
28 Xi rhumela munyama kutani tiko ri va ni xinyami;+Va yingise marito ya xona.
29 Xi hundzula mati ya vona ma va ngati,Xi dlaya tihlampfi ta vona.+
30 Tiko ra vona ri tala hi machela,+Ma nghena ni le makamareni ya le vuhosini.
31 Xi lerisa mabawa leswaku ma nghena etikweniNi tinsuna* leswaku ti nghena etindhawini ta vona hinkwato.+
32 Xi hundzula mpfula ya vona yi va xihangu,Xi rhumela rihati* etikweni ra vona.+
33 Xi dlaya mirhi ya vona ya madiriva ni ya makuwaXi tshovelela mirhi etikweni ra vona.
34 Xi lerisa tinjiya leswaku ti hlasela tiko,Swinjiyana swa ntsandzavahlayi.+
35 Ti dya swimilana hinkwaswo etikweni,Ti tlhela ti dya leswi byariweke emasin’wini.
36 Hiloko xi dlayetela mativula hinkwawo etikweni ra vona,+Masungulo ya matimba ya vona ya ku veleka.
37 Xi humesa vanhu va xona va ri ni silivhere ni nsuku;+Naswona a nga kona eka vanhu va xona la heleke matimba.
38 Vaegipta va tsakile loko va famba,Hikuva a va chava Vaisrayele.+
39 Xi andlala papa leswaku ri va sirhelela,+Ni ndzilo wu va voningela nivusiku.+
40 Va komberile, kutani xi va tisela tin’hwari;*+A xi hamba xi va nyika xinkwa lexi humaka etilweni.+
41 Xi pfule ribye, ku huma mati;+Ma khuluka emananga ku fana ni nambu.+
42 Hikuva xi tsundzuke xitshembiso xo kwetsima lexi xi xi tshembiseke Abrahama nandza wa xona.+
43 Kutani xi humesa vanhu va xona hi ntsako,+Vahlawuriwa va xona hi mikulungwana.
44 Xi va nyika tindhawu ta vanhu va matiko;+Va kuma leswi vanhu van’wana va swi tirheleke hi matimba,+
45 Leswaku va ta yingisa swileriso swa xona+Ni milawu ya xona.
Dzunisani Yehovha!*
Tinhlamuselo ta le hansi
^ Kumbexana “Vulavulani.”
^ Hi Xiheveru, “mbewu.”
^ Hi Xiheveru, “Rito leri xi ri leriseke.”
^ Lowu a ku ri muxaka wa switsotswana leswitsongo leswi yelanaka ni tinsuna leswi a swi tolovelekile eEgipta.
^ Kumbe “malangavi ya ndzilo.”
^ Kumbe “switsatsatsa.”
^ Kumbe “Haleluya,” leswi vulaka “Dzunisani Yah.” Yah i nkomiso wa vito leri nge Yehovha.
