Habakuku 1:1-17
1 Ku avanyisa loku muprofeta Habakuku* a nyikiweke kona exivonweni:
2 Yehovha Xikwembu xanga, xana ndzi ta kombela ku pfuniwa ku fikela rini, kambe u nga ndzi pfuni?+
Xana ndzi ta kombela leswaku u ndzi ponisa eka madzolonga ku fikela rini, kambe u nga ndzi ponisi?+
3 Hikwalaho ka yini u ndzi tshika ndzi vona vubihi?
Hikwalaho ka yini u tshika vanhu va tshikileriwa?
Hikwalaho ka yini ndzi vona ku lovisiwa ni madzolonga?
Hikwalaho ka yini ku tele timholovo ni ku lwa?
4 Hikwalaho nawu a wa ha yingisiwi,A ka ha avanyisiwi hi vululami.
Hikuva lowo homboloka u tshikilela lowo lulama;Hi swona swi endlaka vululami byi soholotiwa.+
5 “Langutani exikarhi ka matiko, mi xiyisisa!
Langutani mi hlamala;Hikuva ku ni leswi nga ta endleka emikarhini ya n’winaLeswi mi nga taka mi nga swi tshembi hambiloko mi byeriwa swona.+
6 Hikuva ndzi ta yimisa Vakalidiya,+Tiko ra nsele leri nga ni ximbilwambilwana.
Va ya etindhawini ta le kule swineneKu ya phanga makaya ya vanhu.+
7 Va chavisa, a va tiyiseleleki.
Va tisungulela milawu ya vona naswona a va byi tekeli enhlokweni vuhosi byin’wana.+
8 Tihanci ta vona ti tsutsuma ku tlula tiyingwe,Ti leva ku tlula timhisi nivusiku.+
Tihanci ta vona ta nyimpi ti ni rivilo lerikulu;Tihanci ta vona ti huma ekule swinene.
Ti haha ku fana ni gama leri hatliselaka ku ya dya.+
9 Hinkwavo va ta hi madzolonga.+
Loko hinkwavo va ri karhi va ya emahlweni va fana ni moya wa le vuxeni,+Va khoma mahlonga yo tala ku fana ni loko va olela sava.
10 Va sandza tihosiVa hleka tindhuna.+
Va hleka ndhawu yin’wana ni yin’wana leyi sirhelelekeke;+Va hlengeleta nhulu ya misava kutani va khandziya hi yona va hlula muti.
11 Kutani va hundza va ya emahlweni ku fana ni moya,Kambe va ta va ni nandzu,+Hikuva va vula leswaku matimba lawa va nga na wona ma huma eka xikwembu xa vona.”+
12 Yehovha, xana a wu Xikwembu lexi hanyaka hilaha ku nga heriki?+
Xikwembu xanga, Mukwetsimi wanga, a wu fi.*+
Yehovha, u va hlawurile leswaku va ta avanyisa;Wena Ribye ra mina,+ u va simekile leswaku va ta xupula.+
13 Matihlo ya wena a ma swi koti ku languta leswo biha,Naswona a wu swi koti ku tiyisela leswo homboloka.+
Kambe hikwalaho ka yini u tshika vanhu lava kanganyisaka,+Hikwalaho ka yini u miyela loko munhu wo homboloka a tshikilela loyi a n’wi tlulaka hi vunene?+
14 Hikwalaho ka yini u endla munhu a fana ni tihlampfi ta lwandle,A fana ni swikokovi leswi nga riki na mufumi?
15 Hinkwavo ka vona u* va phasa hi xinjovo.
U va phasa hi rikoka* ra yena,U va hlengeleta endzeni ka nete ya yena yo phasa tihlampfi.
Hi swona leswi endlaka a tsaka swinene.+
16 Hi swona leswi endlaka a endlela rikoka* ra yena magandzeloA tlhela a hisela nete yakwe yo phasa tihlampfi mirhi yo nun’hwela;Hikuva u hanya emafurheni hikwalaho ka tinkoka,Naswona u dya swakudya swo xawula.
17 Xana u ta tshamela ku tata ni ku chulula tinkoka* ta yena?*
Xana u ta ya emahlweni a dlayetela vanhu va matiko hi tihanyi?+
Tinhlamuselo ta le hansi
^ Swi nga endleka ri vula “Ku Angarha.”
^ Kumbexana “a hi nge fi.”
^ Ku nga Vakalidiya lava nga valala.
^ Kumbe “nete.” Ku nga nete yo phasa tihlampfi.
^ Kumbe “nete.” Ku nga nete yo phasa tihlampfi.
^ Kumbe “tinete.” Ku nga tinete to phasa tihlampfi.
^ Kumbexana “u ta tshamela ku humesa banga rakwe.”
