Vakorinto Wa Vumbirhi 3:1-18
3 Xana hi fanele hi tlhela hi titivisa eka n’wina? Kumbe xana hi lava mapapila ya xibumabumelo lama yaka eka n’wina kumbe lama humaka eka n’wina, ku fana ni vanhu van’wana?
2 N’wina mi papila ra hina+ leri tsariweke etimbilwini ta hina, leri tivekaka naswona ri hlayiwaka hi vanhu hinkwavo.
3 Hikuva swi le rivaleni leswaku mi papila ra Kreste leri tsariweke hi hina hi nga malandza ya Xikwembu,+ leri nga tsariwangiki hi inki kambe hi moya wa Xikwembu lexi hanyaka, ku nga ri emaribyeni ya swiphepherhele+ kambe etimbilwini.*+
4 Xikwembu xi endle leswaku hi titshemba ha Kreste.
5 Kambe hina hi hexe a ku na ntirho lowu hi fanelekaka ku wu endla, ku ri na sweswo Xikwembu hi xona xi endlaka leswaku hi faneleka ku endla ntirho wun’wana ni wun’wana.+
6 Xi tlhele xi endla leswaku hi faneleka kahle ku va malandza ya ntwanano lowuntshwa,+ ku nga ri ya nawu lowu tsariweke,+ kambe ya moya; hikuva nawu lowu tsariweke wu gweva rifu,+ kambe moya wa hanyisa.+
7 Kutani loko nawu lowu vangaka rifu ni lowu kovotliweke emaribyeni+ wu ve kona hi ku vangama lokukulu, lerova vana va Israyele va tsandzeka ku languta xikandza xa Muxe hikwalaho ka ku vangama ka xona,+ ku nga ku vangama loku a ku ta herisiwa,
8 xana ku tirha ka moya+ a ku nga fanelanga ku va ni ku vangama lokukulu?+
9 Hikuva loko nawu lowu tirhaka ku gweva vanhu rifu+ wu vangama,+ swi le rivaleni leswaku ntirho lowu endlaka leswaku vanhu va va lavo lulama wu vangama swinene!+
10 Kahlekahle, hambi ku ri Nawu lowu nga tshama wu endliwa lowu vangamaka wu tekeriwe ku vangama hikwalaho ka ku vangama loku ku wu tlulaka.+
11 Loko Nawu lowu a wu ta herisiwa wu te hi ku vangama,+ swi le rivaleni leswaku ntwanano lowuntshwa wu vangama ngopfu!+
12 Leswi hi nga ni ntshembo wo tano,+ hi tirhisa ntshunxeko lowukulu wo vulavula,
13 naswona a hi endli leswi Muxe a swi endleke loko a tifunengeta xikandza hi lapi,+ leswaku vana va Israyele va nga honoleli Nawu lowu a wu ta herisiwa.
14 Kambe mianakanyo ya vona a yi tlanyarile.+ Hikuva ku ta fikela namuntlha, lapi rolero a ri susiwi loko ku hlayiwa ntwanano wa khale,+ hikuva ri susiwa hi Kreste ntsena.+
15 Entiyisweni, ku ta fikela namuntlha, loko ku hlayiwa matsalwa ya Muxe,+ lapi ri le timbilwini ta vona.+
16 Kambe loko munhu a hundzukela eka Yehovha,* lapi ra susiwa.+
17 Yehovha* i Moya+ naswona laha moya wa Yehovha* wu nga kona, ku ni ntshunxeko.+
18 Hinkwerhu ka hina hi ni swikandza leswi nga funengetiwangiki, hi fana ni swivoni leswi kombisaka ku vangama ka Yehovha,* ha hundzuriwa leswaku hi fana na yena ni ku kombisa ku vangama kakwe lokukulu, hilaha Yehovha* loyi a nga Moya* a lavaka hakona.+
Tinhlamuselo ta le hansi
^ Hi Xigriki, “emaribyeni lama endliweke hi nyama ku nga timbilu.”
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Kumbexana “hi moya wa Yehovha.”
