Tikronika Ta Vumbirhi 4:1-22
4 Kutani a endla altari ya koporo,+ leyi a yi lehe 8,9 wa timitara yi anama 8,9 wa timitara, yi tlakuka 4,5 wa timitara.
2 A vumba thangi*+ lerikulu ra mati hi koporo. A ri vumbiwe ku fana ni mbita, nomu wa rona a wu aname kwalomu ka ntlhanu wa timitara, ri tlakuka kwalomu ka timitara timbirhi, kasi miri wa rona a wu aname kwalomu ka 13 wa timitara.+
3 A ri khavisiwe hi swifaniso swa marhanga+ ehansi ka rona matlhelo hinkwawo, a ku endliwe khume ra wona eka xiphemu lexi ringanaka 44,5 wa tisentimitara* matlhelo hinkwawo ya thangi. Swifaniso leswi swa marhanga a swi ri tilayini timbirhi naswona a swi vumbiwe ni thangi.
4 A ri tlhandlekiwe ehenhla ka swifaniso swa 12 swa tinkuzi,+ tinharhu ti langute en’walungwini, tinharhu ti langute evupeladyambu, tinharhu ti langute edzongeni, tinharhu ti langute evuxeni; thangi* a ri ri ehenhla ka tona naswona micila ya tona a yi langutanile ehansi ka rona.
5 A ri bumbule kwalomu ka nkombo wa tisentimitara;* nomu wa rona a wu fana ni nomu wa xinwelo, ku fana ni xiluva xa khon’wa. A ri chela mati lama nga ringanaka tibati* ta 3 000.
6 A tlhela a endla swo hlambela swa khume, ntlhanu wa swona a swi veka exineneni, leswin’wana swa ntlhanu a swi veka eximatsini.+ A va hlantswela swilo leswi a swi tirhisiwa loko ku endliwa gandzelo ro hisiwa.+ Kambe thangi* ra mati a ri tirhisiwa hi vaprista ku hlantswa.+
7 Kutani a endla swo tlhoma timboni swa khume hi nsuku,+ hilaha a swi laveka hakona+ ivi a swi veka etempeleni, ntlhanu a swi veka exineneni leswin’wana swa ntlhanu a swi veka eximatsini.+
8 A endla ni matafula ya khume, a ma veka etempeleni, ntlhanu exineneni ni ntlhanu eximatsini;+ a endla ni swibya swa nsuku swa 100.
9 A tlhela a endla ni xivava*+ xa vaprista+ ni xivava lexikulu+ ku katsa ni tinyangwa ta xivava a ti nameka koporo.
10 Kutani a veka thangi* etlhelweni ra xinene, hi le dzongavuxa.+
11 Hiramu a tlhela a endla swo olela nkuma, mafoxolo ni mikambana.+
Hiloko a heta ntirho lowu a a wu endlela Hosi Solomoni endlwini ya Xikwembu xa ntiyiso:+
12 tiphuphu timbirhi+ ni swidlodlo swa tona leswi fanaka ni nkambana leswi a swi ri ehenhla ka tiphuphu letimbirhi; tinete+ timbirhi leti a ti funengete swidlodlo swimbirhi leswi a swi fana ni nkambana leswi a swi ri ehenhla ka tiphuphu;
13 swifaniso swa magrenada swa 400+ swa tinete timbirhi, tilayini timbirhi ta magrenada ta nete ha yin’we, to funengeta swidlodlo swimbirhi leswi a swi fana ni nkambana leswi a swi ri ehenhla ka tiphuphu;+
14 swigolonyana* swa khume ni swo hlambela swa khume ehenhla ka swigolonyana;+
15 thangi* ni tinkuzi ta 12 ehansi ka rona;+
16 swo olela nkuma, mafoxolo, tiforoko+ ni swibya swa vona hinkwaswo swa koporo leyi hatimaka leswi Hiramu-abivhu+ a swi endleleke Hosi Solomoni, a swi endlela yindlu ya Yehovha.
17 Hosi yi swi vumbele emugangeni wa Yordani hi foromo ya vumba byo tiya exikarhi ka Sukoti+ na Sereda.
18 Solomoni u endle swibya leswi hinkwaswo swi tele ngopfu; ntiko wa koporo ya kona a wu nga tiveki.+
19 Solomoni a endla swibya hinkwaswo+ swa tempele ya Xikwembu xa ntiyiso: altari ya nsuku;+ matafula+ lawa a ku vekiwa xinkwa xo kwetsima ehenhla ka wona;+
20 swo tlhoma timboni ni timboni ta swona ta nsuku wo tenga,+ leti nga ta lumekiwa emahlweni ka Kamara Ro Kwetsima Ngopfu hi ku landza nawu;
21 swiluva, timboni ni swo khoma ntambhu ya rivoni, swa nsuku wo tenga swinene;
22 swo tima timboni, mikambana, swinwelo ni swo khoma ndzilo swa nsuku wo tenga; ni nyangwa ya yindlu, tinyangwa ta Kamara Ro Kwetsima Ngopfu+ ni tinyangwa ta tempele, hinkwato a ku ri ta nsuku.+
Tinhlamuselo ta le hansi
^ Hi Xiheveru, “Lwandle.”
^ Hi Xiheveru, “xisungunu xin’we.”
^ Hi Xiheveru, “Lwandle.”
^ Hi Xiheveru, “ku anama ka tintiho ta mune.” Vona Xiengetelo B14.
^ Bati a yi ringana na 22 wa tilitara. Vona Xiengetelo B14.
^ Hi Xiheveru, “Lwandle.”
^ Vona Tinhlamuselo.
^ Hi Xiheveru, “Lwandle.”
^ Kumbe “swigolonyana swa mati.”
^ Hi Xiheveru, “Lwandle.”
