Tikronika Ta Vumbirhi 3:1-17

  • Solomoni a sungula ku aka tempele (1-7)

  • Kamara Ro Kwetsima Ngopfu (8-14)

  • Tiphuphu timbirhi ta koporo (15-17)

3  Kutani Solomoni a sungula ku aka yindlu ya Yehovha+ eYerusalema eNtshaveni ya Moriya,+ laha Yehovha a humeleleke kona eka Davhida+ tata wakwe, endhawini leyi Davhida a yi lunghiseleleke exivuyeni xa Orinani+ wa Muyebusi.  U sungule ku aka hi siku ra vumbirhi ra n’hweti ya vumbirhi, hi lembe ra vumune ra ku fuma kakwe.  Masungulo ya yindlu leyi Solomoni a yi akeleke Xikwembu xa ntiyiso a ma lehe kwalomu ka 27 wa timitara,* ma anama 8,9 wa timitara*+ hi ku ya hi mapimelo ya xikhale.*  Rikupakupa* leri nga emahlweni a ri lehe 8,9 wa timitara, ri ringana ni ku anama ka yindlu, a ri tlakuke 120;* endzeni ka rona a ku namekiwe nsuku wo tenga.+  Makhumbi ya le ndzeni ka yindlu leyi yo saseka u ma nameke mapulanga ya yunipa, a tlhela a yi nameka nsuku wa xiyimo xa le henhla+ ivi a yi khavisa hi swifaniso swa mincindzu+ ni tinketana.+  Ku tlula kwalaho, a nameka yindlu hi maribye yo saseka ya risima;+ naswona nsuku+ lowu a wu tirhisa a wu huma eParavhiyami.  U nameke yindlu, timhandzi ta lwangu, tinyangwa ni makhumbi hi nsuku;+ a tlhela a kovotla makerubu emakhumbini.+  Kutani a aka Kamara Ro Kwetsima Ngopfu;+ ku leha ka rona a ku ringana ni ku anama ka yindlu, a ku ri 8,9 wa timitara naswona a ri aname 8,9 wa timitara. U ri nameke hi nsuku lowunene lowu a wu tika 600 wa titalenta.*+  Nsuku wa swipikiri a wu tika 570 wa tigiramu;* naswona u nameke makamara ya le lwangwini hi nsuku. 10  Kutani a endla ni makerubu mambirhi eKamareni Ro Kwetsima Ngopfu, a ma tota nsuku.+ 11  Timpapa hinkwato ta makerubu+ a ti lehe kwalomu ka timitara ta kaye; ripapa ha rin’we ra kerubu a ri lehe kwalomu ka timitara* timbirhi ri tlhela ri khumba khumbi ra yindlu, ripapa lerin’wana a ri lehe kwalomu ka timitara timbirhi naswona makerubu a ma khumbana hi timpapa. 12  Ripapa ra kerubu ra vumbirhi a ri lehe kwalomu ka timitara timbirhi ri tlhela ri khumba khumbi ra yindlu, ripapa lerin’wana a ri lehe kwalomu ka timitara timbirhi naswona a ri khumba ripapa ra kerubu lerin’wana. 13  Timpapa ta makerubu lawa a ti lehe kwalomu ka kaye wa timitara; naswona a ma yime ma languta Kamara Ro Kwetsima. 14  U tlhele a endla khetheni+ leri endliweke hi harhani ya wasi ni ya krimsoni,* voya bya phephulu* ni lapi ro vevuka, a tlhela a endla ni swifaniso swa makerubu eka rona.+ 15  Kutani a endla ni tiphuphu timbirhi+ emahlweni ka yindlu, a ti lehe 15,6 wa timitara* naswona xidlodlo lexi a xi ri ehenhla ka phuphu ha yin’we a xi lehe 2,2 wa timitara.+ 16  A tlhela a endla tinketana to fana ni leto vehela enhan’wini a ti veka ehenhla ka tiphuphu, a endla ni swifaniso swa magrenada swa 100, a swi nameketa etinketanini. 17  A yimisa tiphuphu emahlweni ka tempele, yin’wana a yi ri exineneni* kasi yin’wana a yi ri eximatsini;* leyi nga exineneni a yi thya Yakini,* leyi nga eximatsini a yi thya Bowazi.*

Tinhlamuselo ta le hansi

Hi Xiheveru, “swisungunu swa 60.” Vona Xiengetelo B14.
Hi Xiheveru, “swisungunu swa 20.” Vona Xiengetelo B14.
Xisungunu a xi ringana na 44,5 wa tisentimitara kambe van’wana va vula leswaku “mapimelo ya xikhale” swi vula xisungunu xo leha lexi a xi xingana na 51,8 wa tisentimitara. Vona Xiengetelo B14.
Kumbe “Vhurandi.”
Mapimelo ya kona a ma tiveki.
Talenta a yi tika 34,2 wa tikhilogiramu. Vona Xiengetelo B14.
Hi Xiheveru, “tixikele ta 50.” Xikele a yi tika 11,4 wa tigiramu. Vona Xiengetelo B14.
Hi Xiheveru, “swisungunu swa ntlhanu.” Vona Xiengetelo B14.
Kumbe “yo tshwuka.”
Kumbe “xivunguvungu.”
Hi Xiheveru, “swisungunu swa 35.” Vona Xiengetelo B14.
Kumbe “edzongeni.”
Kumbe “en’walungwini.”
Leswi vulaka “A [ku nga Yehovha] Swi Endle Swi Tiya.”
Swi nga endleka ri vula “Hi Matimba.”