Tikronika To Sungula 16:1-43
16 Kutani va nghenisa Areka ya Xikwembu xa ntiyiso va yi veka etendeni leri Davhida a yi endleleke rona;+ hiloko va sungula ku nyikela magandzelo yo hisiwa ni magandzelo yo kombela ku rhula eka Xikwembu xa ntiyiso.+
2 Loko Davhida a heta ku endla magandzelo yo hisiwa+ ni magandzelo yo kombela ku rhula,+ a katekisa vanhu hi vito ra Yehovha.
3 A tlhela a nyika Vaisrayele hinkwavo, wanuna un’wana ni un’wana ni wansati un’wana ni un’wana xinkwa xa xirhendzevutana, khekhe ra mihandzu ya micindzu ni khekhe ra madiriva lama omisiweke.
4 Hiloko a hlawula Valevhi van’wana leswaku va tirha laha Areka ya Yehovha+ a yi ri kona, va xixima,* va khensa ni ku dzunisa Yehovha Xikwembu xa Israyele.
5 Ndhuna ya vona a ku ri Asafa,+ a pfuniwa hi Zakariya; kutani Yeyiyele, Xemiramoto, Yehiyele, Matitiya, Eliyabu, Benaya, Obede-edomu na Yeyiyele+ a va chaya switende ni tiharipa;+ Asafa yena a a chaya swiphambati,+
6 Benaya na Yahaziyele lava a va ri vaprista, vona a va chaya timhalamhala nkarhi ni nkarhi laha areka ya ntwanano wa Xikwembu xa ntiyiso a yi ri kona.
7 A ku ri hi rona siku rero loko Davhida a qambha risimu ro khensa Yehovha a tirhisa Asafa+ ni vamakwavo:
8 “Khensani Yehovha+ mi dzunisa vito rakwe,Byelani vanhu mitirho yakwe!+
9 N’wi yimbeleleleni, mi n’wi dzunisa* hi tinsimu,+Anakanyisisani* hi mitirho yakwe hinkwayo yo hlamarisa.+
10 Tibumeni hi vito rakwe ro kwetsima,+
Timbilu ta lava lavaka Yehovha a ti tsake.+
11 Lavisisani Yehovha+ ni matimba yakwe.
N’wi lavisiseni nkarhi hinkwawo.+
12 Tsundzukani mitirho yakwe yo hlamarisa leyi a yi endleke,+Masingita yakwe ni ndlela leyi a avanyiseke ha yona,
13 N’wina vana* va Israyele nandza wakwe,+N’wina vana va Yakobo, vahlawuriwa vakwe.+
14 I Yehovha Xikwembu xa hina.+
U avanyisa misava hinkwayo.+
15 Tsundzukani ntwanano wakwe hilaha ku nga heriki,Xitshembiso lexi a xi endleke* eka xitukulwana xa vugidi,+
16 Ntwanano lowu a wu endleke na Abrahama,+Ni xihlambanyo lexi a xi endleke eka Isaka,+
17 Lexi a xi endleke xi va nawu eka Yakobo,+Xi va ntwanano lowu nga heriki eka Israyele,
18 A ku, ‘Ndzi ta ku nyika tiko ra Kanana,+Ri va ndzhaka ya wena.’+
19 Mi kume xitshembiso lexi loko mi nga si tala,Ina, a ma ha ri vatsongo swinene naswona a mi ri valuveri etikweni.+
20 A va yingayinga ni matiko,Va suka eka mfumo wun’wana va ya eka vanhu van’wana.+
21 A nga pfumelelanga munhu leswaku a va tshikilela,+Kambe u tshinye tihosi hikwalaho ka vona,+
22 A ku, ‘Mi nga tshuki mi khumba vahlawuriwa va mina,Naswona mi nga endli nchumu xo biha eka vaprofeta va mina.’+
23 Misava hinkwayo a yi yimbelelele Yehovha!
Twarisani ku ponisa kakwe siku ni siku!+
24 Twarisani vukulu byakwe exikarhi ka matiko,Mitirho yakwe yo hlamarisa eka vanhu hinkwavo.
25 Hikuva Yehovha i nkulu naswona u faneriwa hi ku dzunisiwa.
A xi kona xikwembu lexi hlamarisaka ku fana na yena.+
26 Swikwembu leswin’wana hinkwaswo swa matiko a swi pfuni nchumu,+Kambe Yehovha hi yena loyi a endleke matilo.+
27 U ni xindzhuti naswona wa xiximeka;+Laha a tshamaka kona ku ni matimba ni ntsako.+
28 Xiximani Yehovha n’wina mindyangu ya vanhu,Xiximani Yehovha hikwalaho ka ku vangama ni matimba yakwe.+
29 Dzunisani Yehovha hikwalaho ka vito rakwe leri vangamaka;+Tanani ni nyiko emahlweni ka yena.+
Khinsamelani* Yehovha mi ambale swiambalo swa n’wina swo kwetsima.+
30 Misava hinkwayo a yi rhurhumele emahlweni ka yena!
Misava yi simekiwe yi tiya; a yi nge tsekatsekisiwi.+
31 Matilo a ma tsake, misava a yi khane;+Byelani matiko mi ku: ‘Yehovha i Hosi!’+
32 Lwandle ni hinkwaswo leswi nga eka rona a swi pfume;Nhova ni hinkwaswo leswi nga eka yona a swi tsake.
33 Hi nkarhi lowu fanaka mirhi hinkwayo leyi nga ekhwatini a yi huwelele hi ku tsaka emahlweni ka Yehovha,Hikuva u tela* ku ta avanyisa misava.
34 Khensani Yehovha hikuva hi lonene;+Rirhandzu rakwe lerikulu a ri heli.+
35 Vulani mi ku, ‘Hi ponise, wena Xikwembu xa ku ponisiwa ka hina,+Hi hlengelete u hi ponisa eka vamatiko,Leswaku hi ta khensa vito ra wena ro kwetsima,+Hi ku dzunisa hi ntsako.+
36 A ku dzunisiwe Yehovha Xikwembu xa IsrayeleHilaha ku nga heriki.’”
Vanhu hinkwavo va ku, “Amen,”* va dzunisa Yehovha.
37 Hiloko Davhida a siya Asafa+ ni vamakwavo laha areka ya ntwanano wa Yehovha a yi ri kona, leswaku va ta tirha emahlweni ka Areka+ va endla mitirho leyi faneleke yi endliwa siku ni siku.+
38 Obede-edomu ni vamakwavo lava a va ri 68 na Obede-edomu n’wana wa Yedutani na Hosa a va ri varindzi va tigede;
39 naswona muprista Sadoki+ ni vapristakulobye a va ri emahlweni ka tabernakela ya Yehovha endhawini leyi tlakukeke eGibiyoni+
40 leswaku va nyikela magandzelo yo hisiwa eka Yehovha nkarhi ni nkarhi ealtarini ya gandzelo ro hisiwa ni mixo ni nimadyambu ni ku endla hinkwaswo leswi tsariweke eNawini wa Yehovha lowu a wu leriseke Vaisrayele.+
41 A va ri na Hemani na Yedutani+ ni van’wana lava hlawuriweke va tlhela va boxiwa hi mavito leswaku va khensa Yehovha,+ hikuva “rirhandzu rakwe lerikulu a ri heli”;+
42 kasi vona a va ri na Hemani+ na Yedutani, leswaku va ta chaya timhalamhala, swiphambati ni swichayachayana leswi a swi tirhisiwa ku dzunisa Xikwembu xa ntiyiso; vana va Yedutani+ a va ri enyangweni.
43 Hiloko vanhu hinkwavo va muka, Davhida na yena a muka a ya katekisa muti wakwe.
Tinhlamuselo ta le hansi
^ Hi Xiheveru, “tsundzuka.”
^ Kumbe “n’wi tlangeleni vuyimbeleri.”
^ Kumbexana “Vulavulani.”
^ Hi Xiheveru, “mbewu.”
^ Hi Xiheveru, “Rito leri xi ri leriseke.”
^ Kumbe “Gandzelani.”
^ Kumbe “u tele.”
^ Kumbe “A swi ve tano.”
