Tihosi To Sungula 7:1-51

  • Yindlu ya vuhosi ya Solomoni (1-12)

  • Hiramu a pfuna Solomoni (13-47)

    • Tiphuphu timbirhi ta koporo (15-22)

    • Thangi lerikulu ra mati ra koporo (23-26)

    • Swigolonyana ni swo hlambela swa koporo swa khume (27-39)

  • Swingolongondzwana swa nsuku swi hetiwa (48-51)

7  Solomoni swi n’wi tekele malembe ya 13 ku aka+ ni ku heta yindlu yakwe.*+  Hiloko a aka Yindlu ya Khwati ra Lebanoni+ leyi a yi lehe kwalomu ka 45 wa timitara,* yi anama kwalomu ka 22 wa timitara, yi tlakuka kwalomu ka 13 wa timitara, a yi aka ehenhla ka tilayini ta mune ta timhandzi ta mukedari; timhandzi leti a ti tlhandlekiwe mapulanga ya mukedari.+  A yi akiwe hi mapulanga ya mukedari ehenhla, lawa a ma tshame ehenhla ka timhandzi ta mukedari; mapulanga lawa a ma ri 45, kasi eka layini yin’we ya makamara a ma ri 15.  A ku ri ni mafasitere manharhu lama landzelanaka, kasi a swi ri tano ni le ka tlhelo lerin’wana.  Tinyangwa hinkwato a ti ri ni tifureme ta mavanti leti nga xikwere,* ni mafasitere ya kona lawa a ma langutanile a ma endliwe tano.  U ake ni Holo ya Tiphuphu leyi a yi lehe kwalomu ka 22 wa timitara, yi anama kwalomu ka 13 wa timitara naswona a ku ri ni rikupakupa* emahlweni ka yona leri a ri akiwe hi tiphuphu ri tlhela ri fuleriwa.  U ake ni Holo ya Xiluvelo+ ku nga Holo ya Vuavanyisi+ leyi a a ta tenga milandzu eka yona, endzeni a va yi nameke mapulanga ya mukedari ku suka ehansi ku ya fika ehenhla.  Yindlu* yakwe leyi a a ta tshama eka yona, leyi nga eka xivava*+ lexin’wana, a yi ri ekulenyana ni Holo, naswona a yi akiwe hi ndlela leyi fanaka ni holo. U tlhele a aka yindlu leyi fanaka ni Holo leyi, a yi akela nsati wakwe loyi a a ri n’wana wa Faro.+  Hinkwayo miako leyi a yi akiwe hi maribye yo durha+ lama tsemiweke kahle, ma tlhela ma sasekisiwa endzeni ni le handle leswaku ma rhetela hi ku tirhisa tisaha ta maribye, ku suka emasungulweni ku ya fika ehenhla ni le handle ku ya fika exivaveni lexikulu.+ 10  Masungulo ya yindlu leyi ma akiwe hi maribye lamakulu swinene yo durha; man’wana ya wona a ma lehe 4,5 wa timitara, kasi man’wana a ma lehe 3,6 wa timitara. 11  Ehenhla ka maribye lawa a ku ri ni man’wana yo durha lama tsemiweke kahle hi ku landza mpimo wa kona, ku katsa ni timhandzi ta mukedari. 12  Xivava lexikulu a xi akiwe hi maribye lama tsemiweke kahle ma va tilayini tinharhu ni layini ya timhandzi ta mukedari, ku fana ni xivava+ lexi a xi ri ekusuhi ni tempele ya Yehovha ni rikupakupa* ra yona.+ 13  Hosi Solomoni a rhumela vanhu va ya vitana Hiramu+ eTiri. 14  A a ri n’wana wa wansati loyi a nga noni loyi a humaka eka nyimba ya Neftali, tata wakwe a a huma eTiri naswona a a tirha ku endla swilo hi koporo;+ a a ri ni vuswikoti lebyikulu, ku twisisa+ ni ntokoto entirhweni wo endla swilo swo hambanahambana hi koporo. Hiloko a fika eka Hosi Solomoni, a sungula ku endla ntirho hinkwawo lowu a averiweke wona. 15  A endla tiphuphu timbirhi ta koporo;+ phuphu ha yin’we a yi tlakuke nhungu wa timitara, yi anama ntlhanu wa timitara.+ 16  A endla ni swidlodlo swimbirhi hi koporo a swi veka ehenhla ka tiphuphu ta koporo. Xidlodlo ha xin’we a xi lehe 2,2 wa timitara. 17  Xidlodlo lexi a xi ri ehenhla ka phuphu ha yin’we a xi khavisiwe hi nete leyi nga ni tinketani letitsongo leti sohasohiweke;+ xidlodlo ha xin’we a xi ri ni tinete ta nkombo. 18  A tlhela a endla tilayini timbirhi ta swifaniso swa magrenada ematlhelo ka nete ha yin’we leswaku a khavisa swidlodlo leswi a swi ri ehenhla ka tiphuphu; u endle tano ni le ka tiphuphu ha timbirhi. 19  Swidlodlo leswi a swi ri ehenhla ka tiphuphu ta rikupakupa a swi endliwe swi fana ni xiluva xa khon’wa naswona a swi lehe 1,8 wa timitara. 20  Swidlodlo leswi a swi ri ehenhla ka tiphuphu timbirhi eka ndhawu ya xirhendzevutana leyi khomaneke ni tinete; naswona a swi khavisiwe hi magrenada ya 200 lama landzelanaka.+ 21  A yimisa tiphuphu ta rikupakupa ra tempele.*+ U rhange hi ku yimisa phuphu ya le xineneni,* a yi thya vito ra Yakini,* kutani a yimisa phuphu ya le ximatsini,* a yi thya vito ra Bowazi.*+ 22  Swidlodlo leswi a swi ri ehenhla ka tiphuphu a swi endliwe swi fana ni xiluva xa khon’wa. Kavaloko ntirho wa ku yimisiwa ka tiphuphu wu va wu herile. 23  Hiloko a vumba thangi* lerikulu ra mati hi koporo.+ A ri vumbiwe ku fana ni mbita, nomu wa rona a wu aname kwalomu ka ntlhanu wa timitara, ri tlakuka kwalomu ka timitara timbirhi, kasi miri wa rona a wu aname kwalomu ka 13 wa timitara.*+ 24  A ri khavisiwe hi swifaniso swa marhanga+ ehansinyana ka nomu wa rona matlhelo hinkwawo, a ku endliwe khume ra wona eka xiphemu lexi ringanaka 44,5 wa tisentimitara matlhelo hinkwawo ya thangi, ku ri tilayini timbirhi ta swifaniso swa marhanga lama vumbiweke ni thangi. 25  A ri tlhandlekiwe ehenhla ka swifaniso swa 12 swa tinkuzi,+ tinharhu ti langute en’walungwini, tinharhu ti langute evupeladyambu, tinharhu ti langute edzongeni, tinharhu ti langute evuxeni; thangi a ri ri ehenhla ka tona naswona micila ya tona a yi langutanile ehansi ka rona. 26  A ri bumbule kwalomu ka nkombo wa tisentimitara;* nomu wa rona a wu fana ni nomu wa xinwelo, ku fana ni xiluva xa khon’wa. A ri chela mati lama nga ringanaka tibati* ta 2 000. 27  Kutani a endla swigolonyana*+ swa khume hi koporo. Xigolonyana ha xin’we a xi lehe 1,8 wa timitara, xi anama 1,8 wa timitara, xi tlakuka 1,3 wa timitara. 28  Swigolonyana a swi endliwe hi ndlela leyi: Hala matlhelo a swi ri ni swisirhelelo swa koporo leswi a swi nghenisiwe exikarhi ka tifureme ta mavanti ta koporo. 29  A ku kovotliwe swifaniso swa tinghala,+ tinkuzi ni makerubu+ ematlhelo ya swisirhelelo leswi, u endle leswi fanaka eka tifureme. U tlhele a sasekisa hi tiharhi leti nembelelaka* ehenhla ni le hansi ka tinghala ni tinkuzi. 30  Xigolonyana ha xin’we a xi ri ni mavhilwa ya mune ya koporo ni tiansi ta koporo, swisirhelelo swa xona a swi kota ni ku xi tshega. A ku ri ni swo tshega etshakwini ra xo hlambela leswi a swi sasekisiwe hi tiharhi leti nembelelaka.* 31  A xi pfulekile ehenhla, xi lehe kwalomu ka 45 wa tisentimitara; nomu wa xona a wu ri wa xirhendzevutana, kasi xo xi tshega xa xona a xi ri kwalomu ka 67 wa tisentimitara, a ku ri ni swifaniso leswi kovotliweke enon’wini wa xona. Hala matlhelo a xi ri xikwere ku nga ri xirhendzevutana. 32  Ehansi ka xona a ku ri ni mavhilwa ya mune naswona leswi ma tshegaka a swi khomane ni xigolonyana, vhilwa ha rin’we a ri tlakuke kwalomu ka 67 wa tisentimitara. 33  Mavhilwa ya xona a ma fana ni mavhilwa ya kalichi. Leswi ma tshegaka, tifureme ta vhilwa, swipoko ni swiyenge leswi nga exikarhi ka wona, hinkwaswo a swi endliwe hi koporo. 34  A ku ri ni swo tshega swa mune etinhleni ta mune ta xigolonyana ha xin’we; swo tshega swa kona a swi vumbiwe ni xigolonyana. 35  Ehenhla ka xigolonyana a ku ri ni sindza leri tlakukeke kwalomu ka 22 wa tisentimitara, kasi swiyenge swa rona hinkwaswo a swi vumbiwe swi hlangana ni xigolonyana. 36  U kovotle swifaniso swa makerubu, tinghala ni mirhi ya micindzu hi ku ya hi ndhawu leyi nga kona eka sindza ha rin’we, ni tiharhi leti nembelelaka* matlhelo hinkwawo.+ 37  Swigolonyana swa khume a a swi endle hi yona ndlela leyi;+ a swi fana hinkwaswo ka swona+ hi xivumbeko ni hi mpimo wa swona. 38  U endle swo hlambela swa khume swa koporo;+ xo hlambela ha xin’we a xi kota ku chela mati lama nga ringanaka tibati ta 40. Xo hlambela ha xin’we a xi aname 1,8 wa timitara. Xigolonyana ha xin’we eka leswa khume a xi ri ni xo hlambela xin’we. 39  Hiloko a veka swigolonyana swa ntlhanu etlhelweni ra xinene ra tempele ni swa ntlhanu etlhelweni ra ximatsi ra tempele, kutani a veka thangi etlhelweni ra xinene ra tempele, hi le dzongavuxa.+ 40  Hiramu+ a tlhela a endla swo hlambela swin’wana, mafoxolo+ ni mikambana.+ Hiloko a heta ntirho hinkwawo lowu a wu endlela Hosi Solomoni endlwini ya Yehovha:+ 41  tiphuphu timbirhi+ ni swidlodlo swa tona leswi fanaka ni nkambana leswi a swi ri ehenhla ka tiphuphu letimbirhi; tinete timbirhi+ a ti funengete swidlodlo swimbirhi leswi a swi fana ni nkambana leswi a swi ri ehenhla ka tiphuphu; 42  swifaniso swa magrenada swa 400+ swa tinete timbirhi, tilayini timbirhi ta magrenada ta nete ha yin’we, to funengeta swidlodlo swimbirhi leswi a swi fana ni nkambana leswi a swi ri ehenhla ka tiphuphu timbirhi; 43  swigolonyana swa khume+ ni swo hlambela swa khume+ ehenhla ka swigolonyana; 44  thangi*+ ra koporo ni tinkuzi ta 12 ehansi ka rona; 45  swo olela nkuma, mafoxolo, mikambana ni swibya hinkwaswo swa koporo leyi hatimaka leswi Hiramu a swi endleleke Hosi Solomoni, a swi endlela yindlu ya Yehovha. 46  Hosi yi swi vumbe emugangeni wa Yordani hi foromo ya vumba, exikarhi ka Sukoti na Saretana. 47  Solomoni a nga pimanga ntiko wa swibya leswi hinkwaswo hikuva a swi tele ngopfu. Ntiko wa koporo ya kona a wu nga tiveki.+ 48  Solomoni a endla swibya hinkwaswo swa tempele ya Yehovha: altari+ ya nsuku; tafula ra nsuku+ ro veka xinkwa xo kwetsima; 49  swo tlhoma timboni+ swa nsuku wo tenga, ntlhanu wa swona etlhelweni ra xinene ni ntlhanu wa swona etlhelweni ra ximatsi emahlweni ka Kamara Ro Kwetsima Ngopfu; swiluva,+ timboni ni swo khoma ntambhu ya rivoni swa nsuku;+ 50  swo hlambela, swo tima timboni,+ mikambana, swinwelo+ ni swo khoma ndzilo+ swa nsuku wo tenga; timeremere* ta tinyangwa ta Kamara Ro Kwetsima Ngopfu+ ni ta tinyangwa ta tempele,+ hinkwato a ku ri ta nsuku. 51  Hiloko Hosi Solomoni a heta ntirho hinkwawo lowu a a fanele a wu endla endlwini ya Yehovha. Kutani Solomoni a nghenisa swilo leswi nyikeriweke hi Davhida tata wakwe,+ a veka silivhere, nsuku ni swibya swin’wana laha ku hlayisiwaka swilo swa nkoka endlwini ya Yehovha.+

Tinhlamuselo ta le hansi

Kumbe “yindlu ya vuhosi.”
Hi Xiheveru, “swisungunu swa 100.” Xisungunu a xi ringana na 44,5 wa tisentimitara. Vona Xiengetelo B14.
Ku nga nchumu lowu nga ni matlhelo ya mune lama ringanaka.
Kumbe “vhurandi.”
Kumbe “Yindlu ya vuhosi.”
Kumbe “vhurandi.”
Laha ku vulavuriwa hi Kamara Ro Kwetsima.
Kumbe “dzongeni.”
Leswi vulaka leswaku “Onge A [ku nga Yehovha] Nga Yi Tiyisa.”
Kumbe “n’walungwini.”
Swi nga endleka ri vula “Hi Matimba.”
Hi Xiheveru, “Lwandle.”
Hi Xiheveru, “swisungunu swa 30.”
Hi Xiheveru, “ku anama ka tintiho ta mune.” Vona Xiengetelo B14.
Bati a yi ringana na 22 wa tilitara. Vona Xiengetelo B14.
Kumbe “swigolonyana swa mati.”
Kumbe “ncikinyaka.”
Kumbe “ncikinyaka.”
Kumbe “ncikinyaka.”
Hi Xiheveru, “Lwandle.”
Ku nga xinsimbana lexi hlanganisaka rivanti ni fureme.