Samuwele Wo Sungula 4:1-22
4 Kutani rito ra Samuwele ri fika eka Vaisrayele hinkwavo.
Endzhaku ka sweswo Vaisrayele va huma va ya lwa ni Vafilista; va fika va dzima mixaxa ekusuhi na Ebenezere kasi Vafilista vona va dzima mixaxa eAfeke.
2 Vafilista va hloma va ya lwa ni Vaisrayele, kambe nyimpi a yi fambanga kahle lerova Vaisrayele va hluriwa hi Vafilista lava dlayeke vavanuna va kwalomu ka 4 000 laha a va lwela kona.
3 Loko vanhu va tlhelela emixaxeni, vakulukumba va Israyele va ku: “Hikwalaho ka yini Yehovha a hi tshike hi hluriwa* hi Vafilista namuntlha?+ A hi landzeni areka ya ntwanano wa Yehovha eXilo,+ leswaku yi ta va na hina, yi ta hi ponisa evokweni ra valala va hina.”
4 Hiloko ku rhumeriwa vanhu va ya eXilo, va vuya ni areka ya ntwanano wa Yehovha wa mavuthu loyi a tshamaka exiluvelweni xakwe ehenhla* ka makerubu.+ Vana vambirhi va Eli, Hofini na Finiyasi+ a va ri kwalaho ni areka ya ntwanano wa Xikwembu xa ntiyiso.
5 Xikan’wekan’we loko areka ya ntwanano wa Yehovha yi fika enxaxeni, Vaisrayele hinkwavo va ba huwa leyikulu lerova misava yi tsekatseka.
6 Loko Vafilista va twa huwa yoleyo, va ku: “Hikwalaho ka yini ku ri ni huwa leyikulu swonghasi enxaxeni wa Vaheveru?” Eku heteleleni va swi twa leswaku Areka ya Yehovha yi tisiwe enxaxeni.
7 Vafilista va sungula ku chava, hikuva a va ku: “Xikwembu xi te enxaxeni!”+ Hiloko va ku: “Khombo eka hina, hikuva nchumu wo fana ni lowu a wu si tshama wu humelela!
8 Khombo eka hina! I mani la nga ta hi ponisa evokweni ra Xikwembu lexi lexikulu? Lexi i Xikwembu lexi nga ba Egipta hi makhombo yo hambanahambana emananga.+
9 Vanani ni xivindzi mi tikomba leswaku mi vavanuna n’wina Vafilista, leswaku mi nga tirheli Vaheveru hilaha va mi tirheleke hakona.+ Tikombiseni mi ri vavanuna, mi lwa!”
10 Hiloko Vafilista va lwa, kutani Vaisrayele va hluriwa+ un’wana ni un’wana a balekela etendeni rakwe. Ku dlayiwe vanhu vo tala swinene; eka Vaisrayele ku dlayiwe masocha ya 30 000 lawa a ma famba hi milenge.
11 Ku tlula kwalaho, Areka ya Xikwembu yi tekiwa naswona vana vambirhi va Eli, Hofini na Finiyasi va fa.+
12 Munhu un’wana wa ka Benjamini a tsutsuma a suka enyimpini a ya fika eXilo hi siku rero, swiambalo swakwe a swi handzukile naswona a a ri ni ritshuri enhlokweni.+
13 Loko a fika, Eli a a tshame exitulwini etlhelo ka ndlela a langutile, hikuva mbilu yakwe a yi rhurhumela hikwalaho ka Areka ya Xikwembu xa ntiyiso.+ Wanuna loyi a nghena emutini a fika a vika leswi endlekeke, hiloko muti hinkwawo wu sungula ku ba mukhosi.
14 Loko Eli a twa mpfumawulo wa mukhosi, a vutisa a ku: “Xana mpfumawulo lowu wa xirilo wu vula yini?” Hiloko wanuna yoloye a ta hi ku hatlisa a fika a vikela Eli leswi endlekeke.
15 (Hi nkarhi wolowo Eli a a ri ni malembe ya 98, matihlo yakwe a ma nga ha tshukatshuki naswona a a nga ha voni.)+
16 Wanuna loyi a byela Eli a ku: “Hi mina loyi a humaka enyimpini! Ndzi baleke enyimpini namuntlha.” Hiloko Eli a n’wi vutisa a ku: “Ku endleke yini n’wananga?”
17 Kutani loyi a tisaka mahungu a ku: “Vaisrayele va balekile emahlweni ka Vafilista, vanhu va hluriwile swinene;+ ni vana va wena vambirhi, Hofini na Finiyasi va file+ naswona Areka ya Xikwembu xa ntiyiso yi tekiwile.”+
18 Loko a boxa Areka ya Xikwembu xa ntiyiso, Eli a wa hi xikosi exitulwini xakwe etlhelo ka gede ya muti, nhamu yakwe yi tshoveka a fa, hikuva a a dyuharile a tlhela a nyuhela. U avanyise Vaisrayele malembe ya 40.
19 N’wingi wakwe, nsati wa Finiyasi a a tikile naswona a a ri kusuhi ni ku veleka. Loko a twa leswaku Areka ya Xikwembu xa ntiyiso yi tekiwile ni leswaku tata wa nuna wakwe ni nuna wakwe va file, a sungula ku va ni switlhavi swa ku veleka hiloko a veleka swi nga languteriwanga.
20 Loko a ri karhi a hlala, vavasati lava a va yime ekusuhi na yena, va ku: “U nga chavi, hikuva u tswale n’wana wa jaha.” A nga va hlamulanga naswona a nga swi tekelanga enhlokweni leswi a va swi vula.
21 Kambe a thya n’wana vito ra Ikhabodi,*+ a ku: “Ku vangama ku fambile eIsrayele ku ya etikweni rin’wana,”+ a a vulavula hi ku tekiwa ka Areka ya Xikwembu xa ntiyiso ni leswi humeleleke tata wa nuna wakwe ni nuna wakwe.+
22 U te: “Ku vangama ku fambile eIsrayele ku ya etikweni rin’wana, hikuva Areka ya Xikwembu xa ntiyiso yi tekiwile.”+
Tinhlamuselo ta le hansi
^ Hi Xiheveru, “Hikwalaho ka yini Yehovha a hi hlurile?”
^ Kumbexana “exikarhi.”
^ Leswi vulaka “Ku Vangama Ku Kwihi?”
