Samuwele Wo Sungula 28:1-25
-
Sawulo a ya eka wansati loyi a nga ni swikwembu eEni-dori (1-25)
28 Emasikwini wolawo, Vafilista va hlengeleta masocha ya vona ku ya lwa ni Vaisrayele.+ Kutani Akixi a ku eka Davhida: “Ndza tshemba leswaku wena ni vanhu va wena mi ta famba na mina enyimpini.”+
2 Davhida a hlamula Akixi a ku: “U swi tiva kahle leswi nandza wa wena a nga ta swi endla.” Akixi a ku: “Hi yona mhaka ndzi nga ta ku endla murindzi wa mina wa masiku hinkwawo.”*+
3 Sweswi Samuwele se a a file, kutani tiko hinkwaro ra Israyele a ri n’wi ririle ri tlhela ri n’wi lahla eRhama, emutini wakwe.+ Naswona Sawulo a a hlongole lava nga ni swikwembu ni vangoma etikweni.+
4 Vafilista va hlengeletanile kutani va ya dzima mixaxa eXunemi.+ Kutani Sawulo a hlengeleta masocha ya Vaisrayele hinkwawo, va ya dzima mixaxa eGilbowa.+
5 Loko Sawulo a vona nxaxa wa Vafilista, a sungula ku chava, mbilu yakwe yi rhurhumela ngopfu.+
6 Hambiloko Sawulo a vutisa Yehovha,+ Yehovha a a nga ha n’wi hlamuli, hambi ku ri hi milorho kumbe hi Urimi+ kumbe hi vaprofeta.
7 Sawulo a byela malandza yakwe a ku: “Ndzi laveleni wansati la nga mungoma+ leswaku ndzi ya eka yena ndzi ya hlahluva.” Malandza yakwe ma ku: “Ku ni wansati la nga ni swikwembu eEni-dori.”+
8 Kutani Sawulo a ambala swiambalo swin’wana leswaku va nga n’wi tivi, a ya eka wansati yoloye nivusiku a ri ni vavanuna vambirhi. A fika a byela wansati a ku: “Ndzi kombela u hlahluva+ u ndzi vitanela loyi ndzi nga ta ku byela yena.”
9 Kambe wansati loyi a ku eka yena: “U fanele u swi tiva leswi Sawulo a swi endleke, ndlela leyi a hlongoleke vanhu lava nga ni swikwembu ni vangoma etikweni.+ Kutani, hikwalaho ka yini u lava ku ndzi kanganyisa leswaku ndzi ta dlayiwa?”+
10 Hiloko Sawulo a hlambanya hi Yehovha a ku: “Ndza hlambanya hi Yehovha Xikwembu lexi hanyaka leswaku a wu nge voniwi nandzu emhakeni leyi!”
11 Hiloko wansati loyi a ku: “U lava ndzi ku humesela mani?” A ku: “Ndzi humesele Samuwele.”
12 Loko wansati loyi a vona “Samuwele,”*+ a kalakala a ku eka Sawulo: “Hikwalaho ka yini u ndzi kanganyisile? Hi wena Sawulo!”
13 Hosi yi ku eka yena: “U nga chavi, kambe u vona yini?” Wansati loyi a hlamula Sawulo a ku: “Ndzi vona un’wana loyi a fanaka ni xikwembu a huma emisaveni.”
14 Xikan’wekan’we Sawulo a n’wi vutisa a ku: “U njhani?” wansati a ku: “I mukhalabye la tlhandlukaka, u ambale xiambalo xo pfumala mavoko.”+ Kutani Sawulo a swi xiya leswaku a ku ri “Samuwele,” hiloko a khinsama a khumba ehansi hi mombo.
15 Kutani “Samuwele” a ku eka Sawulo: “Hikwalaho ka yini u ndzi karhata hi ku lava leswaku ndzi tlhandlukisiwa?” Sawulo a ku: “Ndzi le maxangwini lamakulu. Vafilista va le ku lweni na mina naswona Xikwembu xi ndzi fularherile, a xa ha ndzi hlamuli, hambi ku ri hi vaprofeta kumbe hi milorho;+ hi yona mhaka ndzi nga ku vitana leswaku u ta ndzi byela leswi ndzi faneleke ndzi swi endla.”+
16 “Samuwele” a ku: “Hikwalaho ka yini u vutisa mina sweswi Yehovha a ku fularheleke+ naswona a nga nala wa wena?
17 Yehovha u ta tiendlela leswi a swi vuleke hi nomu wa mina: Yehovha u ta handzula mfumo emavokweni ya wena a wu nyika munhukuloni Davhida.+
18 Hikwalaho ka leswi u nga yingisangiki rito ra Yehovha naswona u nga ku hetisisangiki ku hlundzuka kakwe lokukulu eka Vaamaleke,+ hi yona mhaka Yehovha a ku endlaka leswi namuntlha.
19 Yehovha u ta tlhela a nyiketa Israyele na wena evokweni ra Vafilista,+ kutani mundzuku wena+ ni vana va wena+ mi ta va na mina. Yehovha u ta tlhela a nyiketa masocha ya Vaisrayele emavokweni ya Vafilista.”+
20 Hiloko Sawulo a wela ehansi, a sungula ku chava swinene hikwalaho ka marito ya “Samuwele.” A a nga ha ri na matimba hikuva a a nga dyanga nchumu siku rero hinkwaro ni vusiku bya kona.
21 Loko wansati a ta eka Sawulo kutani a vona leswaku a a karhatekile swinene, a ku eka yena: “Mina nandza wa wena ndzi yingise leswi u ndzi byeleke swona naswona ndzi veke vutomi bya mina ekhombyeni+ ndzi endla leswi u ndzi kombeleke swona.
22 Sweswi, ndza ku kombela leswaku u ndzi yingisa mina nandza wa wena. Ndzi pfumelele ndzi ku nyika xinkwa u dya leswaku u ta kuma matimba yo famba loko u muka.”
23 Kambe a ala, a ku: “A ndzi nge dyi.” Hambiswiritano, malandza yakwe swin’we ni wansati loyi, va ya emahlweni va n’wi sindzisa. Eku heteleleni a pfumela, a pfuka a tshama esangwini.
24 Wansati loyi a a ri ni rhole ro nona ekaya kakwe, hiloko a hatlisa a ri tlhava, a teka mapa a pfuva mbila a baka xinkwa lexi nga riki na comela.
25 Kutani a swi nyika Sawulo ni malandza yakwe, va dya. Endzhaku ka sweswo va suka va famba vusiku byebyo.+
Tinhlamuselo ta le hansi
^ Hi Xiheveru, “musirheleri wa nhloko ya mina masiku hinkwawo.”
^ Kumbe “munhu loyi a fanaka na Samuwele.”
