Yohane 13:1-38
13 Kutani, hikuva a a swi tiva emahlweni ka nkhuvo wa paseka leswaku a wu fikile+ nkarhi wa yena wa leswaku a suka emisaveni leyi a ya eka Tatana,+ Yesu u va rhandzile vanhu vakwe lava a va ri emisaveni,+ u va rhandze ku fikela emakumu.
2 Kutani, loko xilalelo xi ri karhi xi ya emahlweni, loko Diyavulosi ana se a swi nghenisile embilwini ya Yudasi Iskariyota,+ n’wana wa Simoni, leswaku a n’wi xenga,+
3 yena, hi ku tiva leswaku Tatana u veke swilo hinkwaswo emavokweni+ yakwe ni leswaku u te a huma eka Xikwembu naswona a a ya eka Xikwembu,+
4 a suka a yima exilalelweni ivi a vekela etlhelo tinguvu takwe ta le handle. Kutani a teka thawula a tikhama.+
5 Endzhaku ka sweswo a chela mati exibyeni kutani a sungula ku hlambisa milenge+ ya vadyondzisiwa ni ku yi sula hi thawula leri a a tikhame hi rona.
6 Hiloko a ta eka Simoni Petro. Yena a ku eka yena: “Hosi, xana u ndzi hlambisa milenge?”+
7 Yesu a n’wi hlamula a ku: “Leswi ndzi swi endlaka a wu swi twisisi sweswi, kambe u ta swi twisisa endzhaku ka swilo leswi.”+
8 Petro a ku eka yena: “Kunene a wu nge yi hlambisi milenge ya mina.” Yesu a n’wi hlamula a ku: “Loko ndzi nga ku hlambisi,+ a wu na xiavelo eka mina.”
9 Simoni Petro a ku eka yena: “Hosi, ku nga ri milenge ya mina ntsena, kambe ni mavoko ya mina ni nhloko ya mina.”
10 Yesu a ku eka yena: “Loyi a hlambeke+ a swi laveki leswaku a hlambisiwa swin’wana handle ka milenge yakwe, kambe u base hi ku helela. Naswona n’wina mi basile, kambe ku nga ri hinkwenu.”
11 Hakunene, a a n’wi tiva munhu loyi a n’wi xengaka.+ Hi yona mhaka leyi a nga te: “A hi hinkwenu lava baseke.”
12 Kuteloko a heta ku va hlambisa milenge a tlhela a ambala tinguvu takwe ta le handle kutani a vurhama etafuleni, a ku eka vona: “Xana ma swi tiva leswi ndzi mi endleke swona?
13 Mi ndzi vula, ‘Mudyondzisi,’+ ni ‘Hosi,’+ naswona ma vurisa, hikuva ndzi tano.+
14 Hikokwalaho, loko mina, hambileswi ndzi nga Hosi ni Mudyondzisi, ndzi mi hlambise milenge,+ na n’wina mi fanele ku hlambisana+ milenge.
15 Hikuva ndzi mi vekele ntila, leswaku, hilaha ndzi endleke hakona eka n’wina, na n’wina mi endla hakona.+
16 Hakunene ndzi tiyisile ndzi ri eka n’wina, Hlonga a ri n’wi tluli n’wini wa rona hi vukulu, naswona loyi a rhumiweke a nga n’wi tluli loyi a n’wi rhumeke hi vukulu.+
17 Loko mi tiva swilo leswi, ma tsaka loko mi swi endla.+
18 A ndzi vulavuli ha n’wina hinkwenu; ndza va tiva lava ndzi va hlawuleke.+ Kambe swi endleriwa leswaku ku hetiseka+ Tsalwa leri nge, ‘Loyi a a tshamela ku dya xinkwa xa mina u ndzi tlakusele xirhendze xa yena.’+
19 Ku sukela enkarhini lowu ndzi mi byela swi nga si humelela,+ leswaku loko swi humelela mi kholwa leswaku ndzi yena.
20 Hakunene ndzi tiyisile ndzi ri eka n’wina, Loyi a amukelaka un’wana ni un’wana loyi ndzi n’wi rhumaka, wa ndzi amukela na mina.+ Nakambe loyi a ndzi amukelaka, wa n’wi amukela ni loyi a ndzi rhumeke.”+
21 Endzhaku ko vula swilo leswi, Yesu a karhateka emoyeni, kutani a nyikela vumbhoni a ku: “Hakunene ndzi tiyisile ndzi ri eka n’wina, Un’wana wa n’wina u ta ndzi xenga.”+
22 Vadyondzisiwa va sungula ku langutana, va nga swi tivi leswaku a a vula mani.+
23 Un’wana wa vadyondzisiwa vakwe a a vurhame emahlweni ka xifuva xa Yesu, naswona Yesu a a n’wi rhandza.+
24 Hikokwalaho Simoni Petro a n’wi kowetela hi nhloko a ku eka yena: “Hi byele munhu loyi a vulaka yena.”
25 Kutani yena a khegetela exifuveni xa Yesu ivi a ku eka yena: “Hosi, i mani?”+
26 Hikokwalaho Yesu a hlamula a ku: “Hi loyi ndzi nga ta n’wi nyika xiphemu lexi ndzi nga ta xi peta.”+ Kuteloko a xi petile xiphemu xa kona, a xi teka a xi nyika Yudasi, n’wana wa Simoni Iskariyota.
27 Kutani endzhaku ka xiphemu lexi Sathana a nghena eka yena.+ Hikokwalaho, Yesu a ku eka yena: “Leswi u swi endlaka swi endle hi ku hatlisa.”
28 Hambiswiritano, eka lava vurhameke etafuleni a nga kona loyi a a tiva leswaku a a n’wi byela sweswo hi xikongomelo xihi.
29 Entiyisweni, van’wana a va anakanya leswaku, leswi Yudasi a a khoma bokisi ra mali,+ Yesu a a n’wi byela leswaku: “Xava swilo swa nkhuvo leswi hi swi lavaka,” kumbe leswaku u fanele ku nyika swisiwana+ swo karhi.
30 Hikokwalaho, endzhaku ko amukela xiphemu xa kona, a huma hi ku hatlisa. Kutani a byi ri vusiku.+
31 Hikwalaho loko a humile, Yesu a ku: “N’wana wa munhu u vangamisiwile,+ naswona Xikwembu xa vangamisiwa mayelana na yena.
32 Xikwembu xi ta n’wi vangamisa,+ xi n’wi vangamisa hi ku hatlisa.
33 Vana lavatsongo,+ ndza ha ta va na n’wina nkarhinyana. Mi ta ndzi lava; naswona hilaha ndzi vuleke hakona eka Vayuda, ‘Laha ndzi yaka kona a mi nge ti,’+ ndza mi byela na n’wina sweswi.
34 Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke,+ rhandzanani na n’wina.+
35 Hinkwavo va ta tiva leswaku mi vadyondzisiwa va mina, loko mi rhandzana.”+
36 Simoni Petro a ku eka yena: “Hosi, u ya kwihi?” Yesu a hlamula a ku: “Laha ndzi yaka kona a wu nge ndzi landzeli sweswi, kambe u ta ndzi landzela endzhakunyana.”+
37 Petro a ku eka yena: “Hosi, ha yini swi nga koteki leswaku ndzi ku landzela sweswi? Ndzi ta nyiketa moya-xiviri wa mina hikwalaho ka wena.”+
38 Yesu a hlamula a ku: “Xana u ta nyiketa moya-xiviri wa wena hikwalaho ka mina? Hakunene ndzi tiyisile ndzi ri eka wena, Nkuku a wu nge ringi u nga si ndzi ala kanharhu.”+
