Genesa 3:1-24
3 Nyoka+ a yi ri ni vuxiyaxiya+ ngopfu ku tlula swivandzana hinkwaswo swa nhova leswi Yehovha Xikwembu a swi endleke.+ Kutani yi ku eka wansati:+ “Xana hakunene i ntiyiso leswaku Xikwembu xi vule leswaku mi nga tshuki mi dya eka murhi wun’wana ni wun’wana wa ntanga?”+
2 Hiloko wansati a ku eka nyoka: “Mbhandzu wa mirhi ya ntanga hi nga dya.+
3 Kambe loko ku ri ku dya mbhandzu wa murhi lowu nga exikarhi ka ntanga,+ Xikwembu xi te, ‘mi nga tshuki mi dya eka wona, e-e, mi nga tshuki mi wu khumba leswaku mi nga fi.’”+
4 Hiloko nyoka yi ku eka wansati: “Entiyisweni mi nga ka mi nga fi.+
5 Hikuva Xikwembu xi tiva leswaku siku mi nga ta dya eka wona, mahlo ya n’wina ma ta pfuleka kutani mi ta fana ni Xikwembu, mi ta tiva leswinene ni leswo biha.”+
6 Kutani wansati a vona leswaku murhi a wu fanelekela ku dyiwa nileswaku a wu navetisa mahlo, ina, murhi a wu languteka+ wu naveleka. Hiloko a teka mbhandzu wa wona a dya. Endzhaku ka sweswo a teka wun’wana a nyika nuna wakwe loko a ri na yena, na yena a dya.+
7 Hiloko mahlo ya vona havambirhi ma pfuleka kutani va sungula ku swi vona leswaku a va nga ambalanga nchumu.+ Kutani va rhungelela matluka ya nkuwa va tiendlela+ swo tifunengeta masenge.
8 Endzhakunyana va twa rito ra Yehovha Xikwembu loko a famba entangeni hi nkarhi wa rimoyana ra siku,+ kutani wanuna ni nsati wakwe va famba va ya tumbela exikarhi ka mirhi ya ntanga+ leswaku va nga voni xikandza xa Yehovha Xikwembu.
9 Kutani Yehovha Xikwembu a vitana wanuna hi ku phindha-phindha a ku eka yena: “Xana u kwihi?”+
10 Eku heteleleni wanuna a ku: “Ndzi twe rito ra wena entangeni kambe ndzi chava hikuva a ndzi nga ambalanga nchumu, hikwalaho ndzi tifihlile.”+
11 Hiloko a ku: “I mani la ku byeleke leswaku a wu ambalanga nchumu?+ Xana u dye+ eka murhi lowu ndzi nga ku lerisa leswaku u nga tshuki u dya eka wona?”
12 Wanuna a ya emahlweni a ku: “Wansati loyi u ndzi nyikeke leswaku ndzi tshama na yena, u ndzi nyike mbhandzu wa murhi hiloko ndzi wu dya.”+
13 Kutani Yehovha Xikwembu a ku eka wansati: “Xana i yini leswi u swi endleke?” Wansati a hlamula a ku: “I nyoka—hi yona yi nga ndzi xisa hiloko ndzi dya.”+
14 Kutani Yehovha Xikwembu a ku eka nyoka:+ “U rhukaniwile eka swifuwo hinkwaswo ni le ka swivandzana hinkwaswo swa nhova hikwalaho ka leswi u swi endleke. U ta famba hi khwiri naswona u ta dya ntshuri vutomi+ bya wena hinkwabyo.
15 Ndzi+ ta veka vulala+ exikarhi ka wena+ ni wansati+ ni le xikarhi ka mbewu+ ya wena ni mbewu+ ya yena. Yi+ ta ku pfotlosa+ nhloko+ kutani wena+ u ta yi+ luma xirhendze.”+
16 Eka wansati a ku: “Ndzi ta engetela swinene switlhavi swa ku tika+ ka wena; u ta twa ku vava loko u veleka vana+ va wena naswona ku navela ka wena ku ta va eka nuna wa wena, yena u ta ku fuma.”+
17 Kutani a ku eka Adamu: “Hikwalaho ka leswi u yingiseke rito ra nsati wa wena, u dya eka murhi lowu ndzi ku leriseke+ ndzi ku, ‘U nga tshuki u dya eka wona,’ misava yi rhukaniwile hikwalaho ka wena.+ U ta dya swakudya swa yona hi ku karhateka vutomi+ bya wena hinkwabyo.
18 Yi ta ku mirisela mitwa ni swigatlu+ kutani wena u ta dya swimila swa nhova.
19 U ta dya xinkwa hi nyuku wa xikandza xa wena kukondza u tlhelela emisaveni hikuva u humesiwe+ eka yona. Hikuva u ntshuri u ta tlhelela entshurini.”+
20 Endzhaku ka sweswo Adamu a thya nsati wakwe vito ra Evha,+ hikuva a a ta va mana wa hinkwavo lava hanyaka.+
21 Kutani Yehovha Xikwembu a endlela Adamu ni nsati wakwe tinguvu to leha ta dzovo, a va ambexa.+
22 Yehovha Xikwembu a ya emahlweni a ku: “Sweswi munhu u fana na hina hi ku tiva leswinene ni leswo biha,+ kunene leswaku a nga tshambuluti voko a teka mbhandzu wa murhi wa vutomi+ a dya kutani a hanya hilaha ku nga heriki,—”
23 Hiloko Yehovha Xikwembu a n’wi humesela ehandle ka ntanga wa Edeni+ leswaku a ya rima misava leyi a endliweke+ hi yona.
24 Kutani a hlongolela munhu ehandle, a veka evuxeni bya ntanga wa Edeni+ makerubu+ ni banga leri pfurhaka malangavi, leri a ri tshama ri ndziwika leswaku ri rindza ndlela leyi yaka emurhini wa vutomi.
