Eksoda 40:1-38
40 Kutani Yehovha a vulavula na Muxe a ku:
2 “Esikwini ra n’hweti yo sungula,+ hi siku ro sungula ra n’hweti, u ta yimisa tabernakela ya ntsonga wa nhlangano.+
3 U fanele u veka areka ya vumbhoni+ eka yona ivi u pfala ndlela leyi yaka eArekeni hi nguvu leyi sirhelelaka.+
4 U fanele u nghenisa tafula,+ u lulamisa swilo swa rona hi ndlela ya kona, u fanele u nghenisa ni xo tlhoma rivoni+ u lumeka timboni ta xona.+
5 U fanele u veka alitari ya nsuku ya murhi wa risuna+ emahlweni ka areka ya vumbhoni, u hayeka xiavanyiso xa nyangwa ya tabernakela endhawini ya xona.+
6 “U fanele u veka alitari+ ya gandzelo ro hisiwa emahlweni ka nyangwa ya tabernakela ya ntsonga wa nhlangano,
7 naswona u fanele u veka xihlambelo exikarhi ka ntsonga wa nhlangano ni alitari kutani u chela mati eka xona.+
8 U fanele u endla xivava+ xi yi rhendzela ivi u yimisa xiavanyiso xa nyangwa ya xivava.+
9 U fanele u teka mafurha ya ku tota+ u tota tabernakela ni leswi nga eka yona hinkwaswo,+ u fanele u yi hlawulekisa ni swingolongondzwana swa yona hinkwaswo, hikwalaho swi ta va nchumu wo kwetsima.
10 U fanele u tota alitari ya gandzelo ro hisiwa ni swingolongondzwana swa yona hinkwaswo kutani u hlawulekisa alitari,+ hikwalaho yi ta va alitari yo kwetsima ngopfu.+
11 U fanele u tota xihlambelo ni xiangamo xa xona u swi hlawulekisa.
12 “Kutani u fanele u tshineta Aroni ni vana vakwe ekusuhi ni nyangwa ya ntsonga wa nhlangano u va hlambisa hi mati.+
13 U fanele u ambexa Aroni tinguvu to kwetsima+ u n’wi tota ni ku n’wi hlawulekisa,+ hikwalaho u ta va muprista wa mina.
14 Endzhaku ka sweswo u ta tshineta vana vakwe ekusuhi, u va ambexa tinguvu to leha.+
15 U fanele u va tota hilaha u toteke tata wa vona hakona,+ hikwalaho va ta va vaprista va mina, kutani ku totiwa ka vona ku fanele ku va vuprista emahlweni ka vona, hilaha ku nga riki na makumu eswitukulwaneni swa vona.”+
16 Muxe a endla hinkwaswo hilaha Yehovha a n’wi leriseke hakona.+ U endle tano.
17 Hikwalaho hi n’hweti yo sungula, elembeni ra vumbirhi, hi siku ro sungula ra n’hweti, tabernakela yi yimisiwa.+
18 Kuteloko Muxe a yimisa tabernakela, a veka minkotloto+ ya yona ehansi, kutani a yimisa marimba+ ya yona, a nghenisa ni swigogo+ swa yona naswona a yimisa tiphuphu ta yona.+
19 Hiloko a andlala ntsonga+ ehenhla ka tabernakela, a veka xifunengeto+ xa ntsonga ehenhla ka yona, hilaha Yehovha a leriseke Muxe hakona.
20 Endzhaku ka sweswo a teka Vumbhoni+ a byi veka endzeni ka Areka+ kutani a veka tinsika+ eArekeni naswona a veka xifunengeto+ ehenhla ka Areka.+
21 Hiloko a nghenisa Areka etabernakeleni kutani a hayeka nguvu+ leyi sirhelelaka ya xiavanyiso endhawini ya yona, a pfala ndlela leyi yaka earekeni ya vumbhoni,+ hilaha Yehovha a lerisiseke Muxe hakona.
22 Endzhaku ka sweswo, a veka tafula+ entsongeni wa nhlangano etlhelweni ra tabernakela ku ya en’walungwini ehandle ka nguvu leyi sirhelelaka,
23 kutani a hlela layini ya xinkwa+ ehenhla ka rona emahlweni ka Yehovha, hilaha Yehovha a leriseke Muxe hakona.
24 Hiloko a veka xo tlhoma rivoni+ entsongeni wa nhlangano emahlweni ka tafula, etlhelweni ra tabernakela ku ya edzongeni.
25 Kutani a lumeka timboni+ emahlweni ka Yehovha, hilaha Yehovha a leriseke Muxe hakona.
26 Endzhaku ka sweswo, a veka alitari ya nsuku+ entsongeni wa nhlangano emahlweni ka nguvu leyi sirhelelaka,
27 leswaku a ta mbulukisa xinun’hweriso xa murhi wa risuna ehenhla ka yona,+ hilaha Yehovha a leriseke Muxe hakona.
28 Eku heteleleni a veka xiavanyiso+ xa nyangwa ya tabernakela endhawini ya xona.
29 Kutani a veka alitari+ ya gandzelo ro hisiwa enyangweni ya tabernakela ya ntsonga wa nhlangano, leswaku a ta humesela gandzelo ro hisiwa+ ni gandzelo ra mavele ehenhla ka yona, hilaha Yehovha a leriseke Muxe hakona.
30 Hiloko a veka xihlambelo exikarhi ka ntsonga wa nhlangano ni alitari kutani a chela mati ya ku hlamba eka xona.+
31 Muxe na Aroni ni vana vakwe va hlamba mavoko ni milenge eka xona.
32 A va hlamba loko va ya entsongeni wa nhlangano niloko va ya ekusuhi ni alitari,+ hilaha Yehovha a leriseke Muxe hakona.
33 Eku heteleleni a yimisa xivava+ xi rhendzela tabernakela ni alitari kutani a hayeka xiavanyiso xa nyangwa ya xivava.+
Hikwalaho Muxe a heta ntirho.
34 Kutani papa+ ri sungula ku funengeta ntsonga wa nhlangano, naswona ku vangama ka Yehovha ku tata tabernakela.
35 Muxe a nga swi kotanga ku nghena entsongeni wa nhlangano hikuva papa+ a ri tshame ehenhla ka wona naswona ku vangama ka Yehovha a ku tate tabernakela.+
36 Loko papa ri tlakuka ehenhla ka tabernakela, vana va Israyele a va hahlula mixaxa hinkwako lomu a va famba va yima kona.+
37 Kambe, loko papa ri nga tlakuki, a va nga yi hahluli mixaxa ku fikela siku leri ri nga ta tlakuka ha rona.+
38 Hikuva papa ra Yehovha a ri ri ehenhla ka tabernakela ninhlikanhi kasi ndzilo wu hambete wu ri ehenhla ka yona nivusiku ematihlweni ya yindlu hinkwayo ya Israyele, hinkwako lomu a va famba kona.+
