1 Yohane 2:1-29
2 Vana vanga lavatsongo, ndzi mi tsalela swilo leswi leswaku mi nga tshuki mi endla xidyoho.+ Kambe, loko mani na mani a endla xidyoho, hi ni mupfuni+ eka Tatana, a nga Yesu Kreste, loyi a lulameke.+
2 Naswona yena i gandzelo+ ra ku vuyelelana+ ra swidyoho swa hina,+ kambe ku nga ri swa hina ntsena,+ ni swa misava hinkwayo.+
3 Kutani hi ku endla leswi hi va ni vutivi bya leswaku se ha n’wi tiva, hileswaku, loko hi ya emahlweni hi hlayisa swileriso+ swa yena.
4 Loyi a nge: “Se ndza n’wi tiva,”+ kasi a nga hlayisi swileriso swa yena,+ i muhembi, naswona munhu yoloye a nga na ntiyiso.+
5 Kambe mani na mani la hlayisaka rito ra yena,+ entiyisweni rirhandzu ra Xikwembu ri hetisekisiwile eka munhu yoloye.+ Hi ku endla leswi hi va ni vutivi bya leswaku hi ni vun’we na yena.+
6 Loyi a nge u tshama a ri ni vun’we+ na yena u boheka ku tama a fambisa leswi yena a fambiseke swona.+
7 Varhandziwa, ndzi mi tsalela xileriso, ku nga ri lexintshwa, kambe xileriso xa khale+ lexi mi xi tweke ku sukela eku sunguleni.+ Xileriso lexi xa khale i rito leri mi ri tweke.
8 Nakambe, ndzi mi tsalela xileriso lexintshwa, mhaka leyi nga ntiyiso eka yena ni le ka n’wina, hikuva munyama+ wa hundza naswona ku vonakala+ ka ntiyiso se ka voninga.
9 Loyi a vulaka leswaku u le ku vonakaleni kasi u venga+ makwavo, u le munyameni ni sweswi.+
10 Loyi a rhandzaka makwavo u tshama eku vonakaleni,+ naswona a ku na xa ku n’wi khunguvanyisa.+
11 Kambe loyi a vengaka makwavo u le munyameni, u famba emunyameni,+ naswona a nga ku tivi lomu a yaka kona,+ hikuva munyama wu n’wi dlaye mahlo.
12 Ndza mi tsalela n’wina, vana lavatsongo, hikuva mi rivaleriwe swidyoho swa n’wina hikwalaho ka vito ra yena.+
13 Ndza mi tsalela n’wina, vatatana, hikuva se ma n’wi tiva loyi a nga kona ku sukela eku sunguleni.+ Ndza mi tsalela n’wina, majaha,+ hikuva mi hlule lowo homboloka.+ Ndza mi tsalela n’wina, vana lavatsongo,+ hikuva se ma n’wi tiva Tatana.+
14 Ndza mi tsalela n’wina, vatatana,+ hikuva se ma n’wi tiva loyi a a ri kona ku sukela eku sunguleni.+ Ndza mi tsalela n’wina, majaha, hikuva mi ni matimba,+ rito ra Xikwembu ri tshamile eka n’wina+ naswona mi hlule lowo homboloka.+
15 Mi nga rhandzi misava kumbe swilo leswi nga emisaveni.+ Loko mani na mani a rhandza misava, rirhandzu ra Tatana a ri kona eka yena;+
16 hikuva hinkwaswo leswi nga emisaveni+—ku navela ka nyama+ ni ku navela ka mahlo+ ni ku bombisa rifuwo ra munhu ra vutomi+—a swi humi eka Tatana, kambe swi huma emisaveni.+
17 Ku tlula kwalaho, misava ya hundza ni ku navela ka yona,+ kambe loyi a endlaka ku rhandza+ ka Xikwembu u tshama hi masiku.+
18 Vana lavatsongo, i nkarhi wo hetelela,+ naswona, hilaha mi tweke hakona leswaku mukaneti wa Kreste wa ta,+ hambi sweswi ku ni vakaneti va Kreste vo tala;+ ku nga mhaka leyi hi kumaka eka yona vutivi bya leswaku se i nkarhi wo hetelela.
19 Va humile eka hina, kambe a va nga ri va wona muxaka wa hina;+ hikuva loko a va ri va muxaka wa hina, a va ta va va tshame na hina.+ Kambe va humile leswaku swi ta vonaka leswaku a hi hinkwavo va nga va muxaka wa hina.+
20 Kambe n’wina mi totiwe hi mukwetsimi;+ hinkwenu mi ni vutivi.+
21 Ndza mi tsalela, ku nga ri swona leswaku a mi tivi ntiyiso,+ kambe hileswi mi wu tivaka,+ ni leswi ku nga riki na mavunwa lama humaka entiyisweni.+
22 Muhembi i mani loko ku nga ri loyi a landzulaka leswaku Yesu i Kreste?+ Yoloye i mukaneti wa Kreste,+ loyi a landzulaka Tatana ni N’wana.+
23 Mani na mani la landzulaka N’wana a nga na yena Tatana.+ Loyi a pfumelaka+ N’wana u na yena Tatana.+
24 Loko ku ri n’wina, tshamani ni leswi mi swi tweke eku sunguleni.+ Loko mi tshama ni leswi mi swi tweke eku sunguleni, mi ta tlhela mi tshama mi ri ni vun’we+ ni N’wana ni ku tshama mi ri ni vun’we na Tatana.+
25 Ku tlula kwalaho, lowu i nchumu wa xitshembiso lexi a hi tshembiseke xona, ku nga vutomi lebyi nga heriki.+
26 Swilo leswi ndzi mi tsalela swona mayelana ni lava ringetaka ku mi xisa.+
27 Loko ku ri n’wina, ku totiwa+ loku mi ku amukeleke eka yena ku tshame eka n’wina, kutani a mi lavi munhu wa ku mi dyondzisa;+ kambe, tanihi leswi ku totiwa loku amukeriweke eka yena ku mi dyondzisaka swilo hinkwaswo,+ naswona ku nga ntiyiso,+ ku nga ri mavunwa, hilaha mi dyondzisiweke hakona, tshamani mi ri ni vun’we+ na yena.
28 Kutani ke, vana lavatsongo,+ tshamani mi ri ni vun’we+ na yena, leswaku loko a humelela+ hi swi kota ku va ni ntshunxeko wo vulavula,+ hi nga khomiwi hi tingana eka vukona byakwe.+
29 Loko mi swi tiva leswaku u lulamile,+ mi kuma vutivi bya leswaku mani na mani la hanyaka hi ku lulama u velekiwe hi yena.+
