Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Disemba 2015

Yu Ting Pita Em i Fes Pop?

Yu Ting Pita Em i Fes Pop?

“Misin i makim Kadinal Jorge Mario Bergoglio, S.J. long kamap Pop. Em i namba 265 man long kisim ples bilong Pita.”—VATICAN INFORMATION SERVICE, VATIKEN SITI, MAS 13, 2013.

“Bisop bilong Rom i gat rait long bosim olgeta wok bilong Misin Katolik, long wanem, em i kisim ples bilong Santu Pita, em man Jisas Krais i makim bilong go pas long mekim ol wok lotu.”—THE PRIMACY OF THE BISHOP OF ROME DURING THE FIRST THREE CENTURIES, 1903, VINCENT ERMONI I BIN RAITIM.

“Sapos wanpela man i tok . . . Pop i no kisim ples bilong Pita em man i kisim blesing long Jisas, orait dispela man i bikhet long Misin.”—NAMBA WAN VATIKEN KIBUNG, JULAI 18, 1870.

PLANTI milion Katolik long olgeta hap bilong graun i tingim tok ol i pasim long Namba 1 Vatiken Kibung long 1870 olsem wanpela bilip bilong ol em ol i mas bihainim. Tasol yumi laik save, Baibel i as bilong dispela bilip? Yu ting Pop Francis i kisim ples bilong aposel Pita? Olsem wanem? Pita em i fes pop?

“LONG DISPELA BIKPELA STON BAI MI WOKIM KONGRIGESEN BILONG MI”

Long 1870, Kibung Bilong Vatiken i kamapim lo bilong makim ol man long kamap pop, long wanem, ol i ting dispela i stret wantaim tok bilong Baibel long Matyu 16:16-19 na Jon 21:15-17. Stori bilong Jisas na Pita em yumi ritim long ol dispela ves, na tu, ol arapela skripsa long Baibel i soim olsem aposel Pita i gat bikpela wok long mekim taim lotu Kristen i kamap long taim bilong ol aposel. Long namba 1 taim Jisas i bungim Pita, em i luksave olsem Pita inap long go pas long mekim ol wok lotu, olsem na em i givim em nem Sifas, mining bilong en “ston.” (Jon 1:42) Tasol yu ting dispela tok i makim olsem Krais i givim namba long Pita?

Long Baibel long Matyu 16:17, 18, Jisas i tokim Pita olsem: “Yu Pita [nem bilong en i makim “Wanpela Hap Ston”], na long dispela bikpela ston bai mi wokim kongrigesen bilong mi.” Yu ting tok bilong Jisas i makim olsem Pita bai stap olsem hetman bilong kongrigesen na bosim ol disaipel bilong Jisas? Taim Jisas i mekim dispela tok long Pita, ol aposel i gat wanem tingting? Gutnius Bilong Baibel i stori olsem planti taim ol aposel i tok pait long husat i stap namba 1 namel long ol. (Matyu 20:20-27; Mak 9:33-35; Luk 22:24-26) Sapos long dispela taim Jisas i bin makim Pita long i stap hetman bilong ol, orait bilong wanem ol aposel i tok pait long husat i stap namba 1?

Yu ting Pita i kliagut long tok bilong Jisas? Pita i bilong lain Israel, olsem na em i save long ol tok profet Hibru i stori long wanpela “ston” o “strongpela ston tru.” (Aisaia 8:13, 14; 28:16; Sekaraia  3:9) Taim Pita i kamapim tok bilong Ol Skripsa Hibru long pas em i raitim long ol wanbilip, em i tokaut olsem tok profet long “strongpela ston tru” i makim Bikpela Jisas Krais, em Mesaia. Pita i yusim tok Grik pe’tra (Jisas i kolim wankain tok long Matyu 16:18) na dispela i makim Krais wanpela tasol.—1 Pita 2:4-8.

Narapela disaipel husat i bilip na bihainim Bikpela Jisas em aposel Pol. Yu ting Pol i bilip olsem Jisas i makim Pita long stap hetman bilong ol? Long pas Pol i raitim, em i stori long ol gutpela wok Pita i mekim long ol kongrigesen Kristen long pastaim, na em i tok Pita em i wanpela bilong “ol man i gat nem olsem ol strongpela pos.” Pol i luksave olsem i gat ol arapela tu i stap olsem ol “strongpela pos” long kongrigesen Kristen. (Galesia 2:9) Tingim, sapos Jisas i bin makim Pita olsem hetman bilong kongrigesen, orait bilong wanem ol wanbilip bilong em i kolim em olsem wanpela bilong ol man i stap olsem ol strongpela pos?

Taim aposel Pol i raitim ol tok i stori long ol pasin kranki bilong Pita, long gutpela pasin Pol i tok: “Mi tokim em stret long pes bilong em olsem em i bin mekim pasin i no stret.” (Galesia 2:11-14) Pol i save olsem Krais i no makim Pita o ol arapela sinman long i stap olsem hetman bilong kongrigesen. Em i bilip olsem Jisas Krais i stap olsem as bilong kongrigesen. Long tingting bilong Pol, ‘dispela ston i makim Jisas Krais.’—1 Korin 3:9-11; 10:4.

“YU PITA . . . ”

Wanem insait bilong tok bilong Jisas olsem: “Yu Pita, na long dispela bikpela ston bai mi wokim kongrigesen”? Bilong kliagut long tok bilong en, yumi ken ritim ol ves i stap klostu long dispela skripsa. Jisas na Pita i stori long wanem samting? Jisas i bin askim ol disaipel bilong en olsem: “Yupela yet i tok mi husat?” Wantu Pita i bekim tok olsem: “Yu dispela Krais, Pikinini bilong dispela God i stap laip.” Na Jisas i tok amamas long en na i tok  em bai wokim kongrigesen long “bikpela ston,” em man Pita i bilip long en, dispela i makim Jisas.—Matyu 16:15-18.

Wanem insait bilong tok bilong Jisas olsem: “Yu Pita, na long dispela bikpela ston bai mi wokim kongrigesen”?

Planti Tisa Bilong Lotu i tok dispela ston em Matyu 16:18 i stori long en em Krais. Olsem, Ogastin i stap long 450 C.E. samting i tok: “Bikpela i tok: ‘Long dispela bikpela ston bai mi wokim kongrigesen,’ long wanem, Pita i tokim em olsem: ‘Yu dispela Krais, Pikinini bilong God i stap laip.’ Olsem na yu (Jisas) tokaut olsem long dispela bikpela ston, bai mi wokim kongrigesen.” Inap planti taim Ogastin i tok “dispela bikpela Ston (Petra) i makim Krais.”

Sapos Misin Katolik i skelim ol tok bilong Ogastin na ol arapela husat i gat wankain tingting long em, ating Misin bai tok bilip bilong ol dispela man i no stret. Ulrich Luz em wanpela saveman long Swiselan i tok, long nau ol saveman bilong Baibel i kamapim tingting bilong ol long dispela tok Jisas i mekim long Pita. Tasol sapos Vatiken Kibung bilong 1870 i kamap long nau, ol bai i no orait long ol man i kamapim tingting bilong ol.

YU TING POP I SENIS BILONG PITA?

Aposel Pita i no save long dispela biknem “pop.” Kirap long 850 C.E. samting, planti bisop husat i no bilong Rom i givim dispela biknem long ol yet. Maski i olsem, Misin i no givim dispela namba long ol pop inap long 1150 C.E. samting. Na tu, ol Kristen bilong pastaim i no ting olsem Jisas i makim Pita olsem pop, na bihain ol arapela bai kisim ples bilong en, nogat. Olsem na Martin Hengel em wanpela saveman bilong Jemani i tok: “Ol stori bilong bipo na ol tok bilong Baibel i no sapotim disisen bilong Misin long makim ol man long stap olsem pop.”

Yumi laik save long bekim bilong ol dispela askim: Yu ting Pita em i fes pop? Na i gat ol man i bin stap olsem senis bilong en? Yu ting Baibel i as bilong bilip bilong ol Katolik long makim ol man bilong stap olsem pop? Bekim bilong olgeta dispela askim em nogat. Baibel i kamapim klia olsem Jisas i stap olsem as ston bilong kongrigesen. (Efesus 2:20) Olsem na yumi wan wan i laik askim yumi yet olsem, Mi painim pinis dispela kongrigesen?