Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Novemba 2015

 BAIBEL I SAVE SENISIM I STAP BILONG MAN

Mi Ting Olsem Mi Stap Amamas Tru

Mi Ting Olsem Mi Stap Amamas Tru
  • YIA MI BON: 1982

  • KANTRI: POLAN

  • BIPO: KISIM DRAK, WOK MANI I GAT BIKNEM, PAIT NA BAGARAPIM MAN

LAIP BILONG MI LONG BIPO:

Mi bon long wanpela liklik taun long Polan, klostu long boda bilong Jemani. Mipela i stap long ples we i gat ol fam na bikbus. Papamama bilong mi i laikim tru mipela na ol i laik bai mipela i gat gutpela laip, kisim ol gutpela mak long skul, na kisim wok mani i gat biknem.

Hevi i painim mi long taim mi go skul bilong kamap loya long yunivesiti bilong biktaun Wrocław. Mi stap longwe long papamama, olsem na mi bung wantaim ol poroman nogut. Mi laik tru long pilai soka, na ol nupela pren bilong mi i mekim na mi kamap hapman bilong sapotim lain bilong pilai soka. Feiveret tim bilong mi i bilong biktaun Warsaw, na long olgeta wiken mi save go long ol ples ol i go bilong pilai long en. Long ol dispela raun mipela i save dring planti, kisim drak, na sampela taim mipela i save pait wantaim ol sapota bilong narapela tim. Mi ting olsem taim mi mekim ol dispela samting, mi inap lusim tingting long ol hevi bilong wan wan de. Tasol long wankain taim mi save olsem sapos polis i arestim mi, dispela bai bagarapim gutnem bilong mi olsem wanpela loya.

Mi na ol pren bilong mi i save amamas long go long ol klap na haus disko, tasol planti taim mipela i save insait long ol pait. Na sampela taim polis i arestim mi, tasol mi no go long kalabus samting, long wanem, mi save baim ol arapela long helpim mi. Mi bin ting olsem mi stap amamas tru. Maski i olsem, mi save olsem ol samting mi mekim i no stret. Olgeta Sande mi go long lotu, long wanem, mi ting dispela bai givim mi bel isi.

BAIBEL I SENISIM I STAP BILONG MI:

Long 2004, tupela Witnes Bilong Jehova i bungim mi long haus bilong mi, na mi amamas long ol i ken stadi long Baibel wantaim mi. Taim mi kisim save long ol samting ol Kristen i mas mekim, nau maus bilong bel i kotim mi. Mi save olsem mi mas lusim pasin bilong dring planti, kisim drak, na bung wantaim ol man husat i no save bihainim ol stretpela lo bilong Baibel. Na tu, mi luksave olsem mi mas senisim pasin bilong mi long belhat hariap na pait. Maski i olsem, mi wok yet long bihainim ol pasin i no stret.

Wanpela nait mi pait wantaim 8-pela man. Mi inap tingim olsem ol i paitim na kikim mi long het, na mi slip long rot. Dispela hevi i senisim tingting bilong mi. Mi pilim olsem klostu bai mi dai, olsem na mi beten na tok: “Mi sori Jehova olsem mi no bin bihainim tok bilong yu. Mi promis olsem sapos mi stap laip, bai mi stadi long Baibel wantaim  ol Witnes na senisim ol pasin bilong mi.” Mi tenkyu olsem mi no lusim laip bilong mi long dispela nait, olsem na mi truim promis bilong mi long stadi long Baibel.

Long 2006, mi go stap long Inglan. Mi laik bungim planti mani na bai mi ken go bek long Polan bilong kisim sampela moa skul long kamap loya. Taim mi wok long kisim save long Baibel, wanpela skripsa i helpim mi tru. Aposel Pol i tok: “Mi tingim olgeta samting i olsem samting nating, na as bilong dispela tingting em nambawan gutpela save long Krais Jisas, Bikpela bilong mi. Long em tasol, mi orait long olgeta samting i lus na mi tingim ol olsem pipia nating. Mi mekim olsem bai mi ken kisim Krais.” (Filipai 3:8) Olsem aposel Pol mi kisim bikpela skul bilong kamap loya, na tu, mi man bilong belhat na pait. (Aposel 8:3) Maski i olsem, Pol i luksave olsem pasin bilong mekim wok bilong God na bihainim pasin bilong Jisas inap helpim em long i stap amamas. Taim mi tingim eksampel bilong Pol, mi luksave olsem wok mani i gat bikpela pe na pasin bilong pait i no inap long helpim i stap bilong man. Mi bilip olsem sapos Pol inap long mekim ol senis long i stap bilong en, orait mi tu inap long mekim olsem. Olsem na mi stap long Inglan na mi no go long Polan bilong kisim digri long lo.

Taim mi wok long kisim save long Jehova, dispela i helpim mi long go klostu moa long em. Mi pilim tru tok promis bilong en olsem em i save fogivim ol man husat i wok strong long bihainim stretpela pasin. (Aposel 2:38) Na taim mi tingim tok bilong 1 Jon 4:16 olsem, “God em i pasin laikim,” dispela i helpim mi long luksave long risen na em i no laikim pasin bilong pait.

Mi laik bung wantaim ol Witnes em i bikpela lain brata husat i stap amamas tru

Na tu, mi kirap nogut long pasin bilong ol Witnes. I klia tru olsem ol i wok strong long bihainim ol stretpela lo bilong Baibel. Mi laik bung wantaim ol, long wanem, ol i stap olsem bikpela lain brata i stap amamas tru. Olsem na mi wok strong na mekim sampela senis long i stap bilong mi, na long 2008 mi kisim baptais olsem wanpela Witnes Bilong Jehova.

Mi na Esther i amamas tru long skulim ol man long Baibel, em ol man i mekim tokples Polan

GUTPELA SAMTING I PAINIM MI:

Tok bilong Baibel i helpim mi long senisim tingting bilong mi long pait, kisim drak, dring planti, kisim bikpela skul, na sapotim lain bilong pilai soka. Nau mi stap olsem wokman bilong God na mi amamas long skulim ol arapela long tok bilong Baibel. Mi amamas yet long lukim ol man i pilai soka, tasol dispela samting i no stap olsem namba 1 samting long i laip bilong mi.

Mi amamas olsem mi marit long Esther, em wanbilip bilong mi husat i lotuim Jehova. Mipela i amamas tru long skulim ol man long Baibel, em ol man i mekim tokples Polan na ol i stap long hap not-wes bilong Inglan. Em namba 1 taim mi pilim olsem mi stap amamas tru. Maus bilong bel bilong mi i stap klin na laip bilong mi i gat as bilong en.